Isa idop ageꞌ
28
Lam panam ari mingu, Maria Makdalena abaꞌ Maria te kebukai angkat masau kubor Isa.2 Nadai mang-mang adai gempa bumi te lampar kuat, nema sikoꞌ mlikat Tuhan Allah ari langet turon ngenyoꞌ batu penutop kubor abaꞌ dudok de atau batu nyaꞌ. 3 Mua ya upa kilat, abaꞌ baju ya puteh upa salju. 4 Kebala prajuret te bejaga diyaꞌ begetar takot abaꞌ tragaleꞌ upa urang te mati.
5 Mlikat nyaꞌ madah ke kebala inoꞌ nyaꞌ, “Nang takot! Ku tauꞌ badaꞌ kitaꞌ ngigaꞌ Isa te udah desaleb nyaꞌ. 6 Ya niseꞌ ditoꞌ. Ya udah idop ageꞌ munyi te udah depadah Ya. Tamaꞌ abaꞌ pedaꞌ ke abi teban jalai Ya depegaleꞌ. 7 Udah nyaꞌ angkat abaꞌ padah ke kebala muret Ya enteꞌ Ya nyau idop ageꞌ abaꞌ entoꞌ Ya nyau dulau ke Galelia. Den lah kitaꞌ medaꞌ Ya. Ingat ke apa te udah ku padah ke kitaꞌ.”
8 Sidaꞌ beburoh angkat ari kubor nyaꞌ ngau prasa takot bekamoh gaga. Sidaꞌ lampar gaga abaꞌ beguai kaꞌ nusoi ke kebala muret Isa. 9 Nadai mang-mang de tengah jalai Isa ngusong sidaꞌ abaꞌ nanyaꞌ, “Kaꞌ kikai kitaꞌ!” Sidaꞌ ngusong Ya, mangkap kaki Ya abaꞌ nyemah Ya. 10 Baroꞌ Isa madah ke sidaꞌ, “Nang takot. Angkat abaꞌ padah ke kebala menyadeꞌ Ku, isaꞌ sidaꞌ ke Galelia, abaꞌ den lah sidaꞌ kaꞌ medaꞌ Ku.”
Kebala prajuret ngelapor apa te udah tejadi
11 Tengan kebala inoꞌ nyaꞌ angkat kaꞌ nusoi ke kebala muret, dua tiga ikoꞌ prajuret te nyaga kubor nyaꞌ angkat ke kuta. Sidaꞌ nusoi kebala utai te udah tejadi ke kebala kepalaꞌ imam. 12 Udah nyaꞌ kebala kepalaꞌ imam bepekat abaꞌ kebala pemimpen Yahudi. Sidaꞌ nyugoꞌ kebala prajuret ngau duet te lampar mayoh 13 abaꞌ madah, “Kitaꞌ alah madah enteꞌ kebala muret Isa datai malam abaꞌ ngameꞌ bangkai Ya tengan kitaꞌ tinok. 14 Abaꞌ asa brita toꞌ datai ke peneng gubernor lah, kami te becakap abaꞌ ya lah isaꞌ ya nadai nyalah kitaꞌ.” 15 Kebala prajuret nyaꞌ nerimaꞌ duet nyaꞌ abaꞌ mulah nunaꞌ te depadah sidaꞌ. Brita enteꞌ kebala muret Isa ngameꞌ bangkai Ya, nyaꞌ nyebar de entara sidaꞌ Yahudi nyantok ke pitoꞌ.
Isa ngutos kebala muret
16 Baroꞌ sebelas muret nyaꞌ angkat ke Galelia, ke buket te udah depadah Isa ke sidaꞌ. 17 Pas sidaꞌ medaꞌ Isa den, sidaꞌ nyungkon nyemah Ya. Uleh adai dua tiga ikoꞌ sidaꞌ te ageꞌ gamaꞌ. 18 Baroꞌ Isa ngusong kebala muret Ya abaꞌ madah, “Ugaꞌ kuasa te de sruga abaꞌ te de bumi udah debereꞌ ke Ku. 19 Kebaꞌ nyaꞌ angkat, suroh ke ugaꞌ suku bansa jadi muret Ku abaꞌ paneꞌ ke sidaꞌ alam nama Apai, Anak, abaꞌ Roh Kudos. 20 Abaꞌ ajar ke sidaꞌ nunaꞌ te udah Ku printah ke kitaꞌ. Ingat, Ku selareh abaꞌ kitaꞌ sengabot datai ke pemadoꞌ dunia.”