Kebala pemimpen Yahudi bepekat kaꞌ munoh Isa
26
Udah Isa ngajar ugaꞌ nyaꞌ, Ya madah ke kebala muret Ya, 2 “Kitaꞌ tauꞌ badaꞌ ageꞌ dua ari mah jalai ari besai Paskah Yahudi. Pas nyaꞌ mah Anak Ensia kaꞌ deserah ke kebala munsoh Ya isaꞌ desaleb.”a3 Pas tengan nyaꞌ kebala kepalaꞌ imam abaꞌ kebala pemimpen Yahudi begugoꞌ de rumah te besai empu Imam Besai Kayapas, 4 diyaꞌ sidaꞌ bepekat kati cara nangkap abaꞌ munoh Isa, uleh nadai deketauꞌ urang banyau. 5 Uleh sidaꞌ madah, “Nang pas urang tengan ngeramai ari besai Paskah, mali kebala urang belayaꞌ tegal nyaꞌ.”
Sikoꞌ urang inoꞌ nuwang binyak wangi ke palaꞌ Isa
6 Pas Isa tengan de kampong Betania, de rumah Simon te udah kenaꞌ penyaket kulet kusta meliyaꞌ, 7 datai mah sikoꞌ urang inoꞌ ngusong Ya ngemaiꞌ jebol te depulah ari batu pualam. Jebol nyaꞌ beiseꞌ binyak wangi te lampar mahal. Baroꞌ ya nuwang binyak wangi nyaꞌ ke palaꞌ Isa te tengan dudok makai.
8 Medaꞌ piyaꞌ kebala muret Isa begisek abaꞌ sama direꞌ jakoꞌ sidaꞌ, “Ngapa weh ya ngeruwaꞌ binyak nyaꞌ? 9 Binyak nyaꞌ bah tauꞌ dejual ngau rega te mahal, abaꞌ duet rega binyak nyaꞌ tauꞌ deꞌ bereꞌ ke kebala urang te misken.”
10 Uleh Isa tauꞌ badaꞌ pemiker sidaꞌ, baroꞌ Ya madah, “Ngapa piyaꞌ kitaꞌ nganoꞌ inoꞌ toꞌ? Ya bah mulah te bayek ngau Ku. 11 Enteꞌ kitaꞌ bamat kaꞌ nulong urang mesken bah, sidaꞌ selareh adai nungaꞌ kitaꞌ, uleh Ku toꞌ nadai selareh abaꞌ kitaꞌ sengabot.b 12 Inoꞌ toꞌ nuwang binyak ke tuboh Ku, ngau nyiap ari Ku dekubor. 13 Ku madah ke kitaꞌ, pas Brita Bayek depadah de ugaꞌ dunia, apa te depulah inoꞌ toꞌ sigeꞌ detusoi ngau urang ngingat ya.”
Yudas Iskariot kaꞌ nyerah Isa
14 Baroꞌ Yudas Iskariot, sikoꞌ ari dua belas muret Isa, angkat ngusong kebala kepalaꞌ imam. 15 Ya madah, “Apa upah te kaꞌ kitaꞌ juwaꞌ ke ku, enteꞌ ku nyerah Isa ke kitaꞌ?” Sidaꞌ mereꞌ ke ya tiga puloh kepeng duet pirak. 16 Belaboh ari nyaꞌ mah, Yudas ngigaꞌ senta te pas ngau ya nyerah Isa ke sidaꞌ.
Isa makai pemakai Paskah abaꞌ kebala muret Ya
17 Pas semaru belaboh ari besai Ruti te Nadai Beragi,c kebala muret Ya datai abaꞌ nanyaꞌ, “Guru, dini Wan kaꞌ kami ngageh pemakai Paskah ngau Wan?”
18 Isa nyawot sidaꞌ, “Angkat jaꞌ kitaꞌ ke kuta Yerosalem ngusong sikoꞌ urang, padah ke ya, ‘Jakoꞌ Guru, senta Ku nyau semak, Ku kaꞌ ngeramai Paskah de rumah meh abaꞌ kebala muret Ku.’ ”
19 Baroꞌ kebala muret Isa nunaꞌ apa te desuroh Isa ke sidaꞌ. Sidaꞌ angkat ngageh pemakai Paskah nyaꞌ.
20 Nyau malam, Isa dudok berama makai abaꞌ dua belas muret Ya. 21 Pas tengan sidaꞌ makai, Isa madah, “Ku madah ke kitaꞌ sikoꞌ ari entara kitaꞌ kaꞌ nyerah Ku ke kebala munsoh Ku.”
22 Ninga piyaꞌ kebala muret Isa ma reyu. Baroꞌ sidaꞌ beganteꞌ nanyaꞌ ke Ya, jakoꞌ sidaꞌ, “Ukai ku, weh Tuhan?”
23 Sawot Ya, “Urang te abaꞌ Ku encalop ruti ke pingan toꞌ, nyaꞌ mah te kaꞌ nyerah Ku ke kebala munsoh Ku.d 24 Anak Ensia pesti mah kaꞌ mati upa te udah detules alam Kitab Suci, uleh aja merinsaꞌ amat mah idop urang te nyerah Anak Ensia nyaꞌ. Lebeh bayek enteꞌ ya nadai deadai ke dunia toꞌ.”
25 Baroꞌ Yudas te kaꞌ nyerah Isa madah, “Ukai ku weh guru te jakoꞌ Wan nyaꞌ?”
Sawot Isa, “Meh mah ya.”
Isa makai brama abaꞌ kebala muret Ya
26 Pas tengan sidaꞌ makai, Isa ngameꞌ ruti abaꞌ ngucap sukor ke Tuhan Allah. Baroꞌ ya mungaꞌ ruti nyaꞌ ngau jari Ya abaꞌ mereꞌ ke kebala muret Ya blumaꞌ madah, “Nah, ameꞌ ke ruti toꞌ abaꞌ pakai. Toꞌ mah tuboh Ku.”
27 Udah nyaꞌ Ya ngameꞌ cawan te beiseꞌ aiꞌ angor abaꞌ ngucap sukor ke Tuhan Allah. Baroꞌ Ya mereꞌ cawan nyaꞌ ke kebala muret Ya blumaꞌ madah, “Nginom ari cawan toꞌ ugaꞌ ke mah kitaꞌ. 28 Nema aiꞌ angor toꞌ mah darah Ku, darah toꞌ ngau kelaiꞌ danyi baru Tuhan Allah abaꞌ ensia abaꞌ desioh ngau ngampon dusa urang mayoh.e 29 Ku madah ke kitaꞌ, belaboh ari entoꞌ Ku nadai nginom aiꞌ angor ageꞌ datai ke senta kita nginom aiꞌ angor te baru alam Pemrintah Apai Ku.”
30 Baroꞌ sidaꞌ menanyi suteꞌ lagu ngau muji Tuhan Allah, udah nyaꞌ sidaꞌ angkat ke buket Saiton.
Isa madah enteꞌ Petros kaꞌ madah direꞌ nadai ngelala Ya
31 Baroꞌ Isa madah ke kebala muret Ya, “Malam toꞌ, ugaꞌ kitaꞌ kaꞌ rari nudi Ku. Nema alam Kitab Suci detules pemadah Tuhan Allah upa pitoꞌ,
‘Ku kaꞌ munoh gemala nyaꞌ
abaꞌ kebala dumba nyaꞌ kaꞌ pamar-piyar.’f
32 Uleh asa Ku udah idop ageꞌ lah, Ku dulau lah ari kitaꞌ ke Galelia.”
33 Sawot Petros, “Biyar mah sidaꞌ te ke bukai nudi Wan, ku nadai ngamoꞌ nudi Wan!”
34 Isa madah, “Ku madah ke meh, malam toꞌ sebedau manok engkukok, tiga kaleꞌ meh madah direꞌ nadai ngelala Ku.”
35 Sawot Petros, “Biyar mah ku mati abaꞌ Wan, ku nadai ngamoꞌ madah direꞌ nadai ngelala Wan.” Kebala muret Isa te kebukai sigeꞌ madah piyaꞌ gaꞌ.
Isa bradua de Getsemani
36 Udah nyaꞌ Isa abaꞌ kebala muret ya angkat ke teban te nama Getsemani. Diyaꞌ Ya madah ke kebala muret Ya, “Ditoꞌ mah kitaꞌ dudok, Ku angkat bradua ken lai.” 37 Isa ngemaiꞌ Petros, Yakubos, abaꞌ Yohanes anak Sebedios abaꞌ Ya. Ya belaboh ngasa reyu abaꞌ saban. 38 Ya madah ke kebala muret Ya nyaꞌ, “Ati Ku lampar reyu, asa-asa te kaꞌ mati. Ditoꞌ mah kitaꞌ bejaga abaꞌ Ku.”
39 Udah nyaꞌ Ya angkat jaoh geꞌ, baroꞌ Ya tesungkor abaꞌ bradua. Jakoꞌ Ya, “O Apai, enteꞌ tauꞌ jaoh ke pemedeh toꞌ ari Ku, uleh nang nunaꞌ penekaꞌ Ku, pulah jaꞌ nunaꞌ penekaꞌ Wan.”
40 Udah nyaꞌ Isa bebalek ageꞌ ngusong tiga ikoꞌ muret Ya, abaꞌ medaꞌ sidaꞌ tengan tinok. Ya madah ke Petros, “Nadai piyaꞌ kitaꞌ talah bejaga abaꞌ Ku sejam jaꞌ? 41 Bejaga abaꞌ bradua ke kitaꞌ isaꞌ kitaꞌ nadai laboh enteꞌ pas decuba. Ati kitaꞌ amat mah kaꞌ mulah utai te kenaꞌ, uleh tuboh kitaꞌ lemah. ”
42 Baroꞌ Ya angkat kedua kaleꞌ abaꞌ bradua, jakoꞌ Ya, “O Apai Ku, enteꞌ pemedeh toꞌ alah Ku asa, abaꞌ nitauꞌ mah dejaoh ari Ku, pulah jaꞌ nunaꞌ kedekaꞌ Wan.”
43 Udah nyaꞌ Isa bebalek ageꞌ, abaꞌ medaꞌ sidaꞌ tengan tinok, nema mata sidaꞌ nyau berat amat. 44 Isa angkat ageꞌ ari nyaꞌ abaꞌ bradua te ketiga kaleꞌ munyi pradua Ya te udah.
45 Udah nyaꞌ Ya ngusong kebala muret Ya abaꞌ madah ke sidaꞌ, “Ageꞌ kitaꞌ tinok abaꞌ blepa? Pedaꞌ! Toꞌ nyau mah senta Anak Ensia deserah ke kebala urang te dusa. 46 Dani ke kitaꞌ, boh kita angkat. Ya te nyerah Ku nyau datai!”
Isa detangkap
47 Tengan Isa ageꞌ becakap datai mah Yudas sikoꞌ ari dua belas muret Ya. Yudas datai detrudi kebala urang banyau te ngemaiꞌ isau abaꞌ kayu. Sidaꞌ desuroh kebala kepalaꞌ imam abaꞌ kebala pemimpen Yahudi. 48 Yudas te kaꞌ nyerah Isa, udah madah kelaiꞌ ke sidaꞌ te ni Isa. Ya madah, “Urang te ku siyom ke pipi nyaꞌ mah Isa. Tangkap ke Ya.”
49 Baroꞌ ya ngusong Isa abaꞌ madah, “Selamat malam Guru.” Baroꞌ ya nyiyom Isa.
50 Uleh Isa madah ke ya, “Kawan, toꞌ mah weh te ngasoh meh datai?”
Baroꞌ kebala urang datai ngerantak abaꞌ nangkap Ya. 51 Uleh sikoꞌ muret Isa te tengan nungaꞌ Ya, nadai mang-mang nyintak isau abaꞌ mantap peneng pemantoꞌ Imam Besai sampai putos.
52 Isa madah ke ya, “Pajak ke sarong ageꞌ isau meh nyaꞌ. Nema sapa te munoh urang ngau isau, ya kaꞌ mati uleh isau. 53 Sangkaꞌ meh Ku nitauꞌ mintaꞌ tulong Apai Ku, isaꞌ Ya ngirem lebeh ari dua belas ribu pasukan mlikat mantoꞌ Ku? 54 Uleh enteꞌ Ku mulah piyaꞌ, apa te detules alam Kitab Suci ke Ku nadai temoꞌ.”
55 Baroꞌ Isa madah ke kebala urang banyau te diyaꞌ, “Kitaꞌ miker Ku toꞌ perampok, ngasoh kitaꞌ datai lengkap kaꞌ nangkap Ku ngemaiꞌ isau abaꞌ kayu? Bataꞌ ngenap ari mah Ku dudok ngajar de laman Rumah Kudos Tuhan Allah abaꞌ kitaꞌ nadai nangkap Ku. 56 Uleh ugaꞌ toꞌ alah tejadi isaꞌ nemoꞌ apa te detules alam kitab kebala nabi.” Baroꞌ ugaꞌ muret nyaꞌ nudi Ya abaꞌ ngelari direꞌ.
Isa debaiꞌ ke mua Pengadel Agama
57 Udah sidaꞌ nangkap Isa, sidaꞌ ngemaiꞌ Ya ngusong Imam Besai Kayapas. Diyaꞌ kebala urang te ahli alam Prator Musa abaꞌ pemimpen Yahudi udah begugoꞌ. 58 Petros ari jaoh nerudi Isa datai ke laman rumah Imam Besai. Nyau sidaꞌ tamaꞌ ya dudok abaꞌ kebala penyaga Rumah Kudos Tuhan Allah kaꞌ ngetauꞌ apa te kaꞌ depulah sidaꞌ ke Isa.
59 Kebala kepalaꞌ imam abaꞌ ugaꞌ Pengadel Agama berusaha ngigaꞌ urang te kaꞌ ngemulaꞌ apa te depulah Isa, isaꞌ adai alasan ngau sidaꞌ ngukom mati Isa. 60 Uleh datai ke suteꞌ mah sidaꞌ niseꞌ nemu bukti, amat mayoh urang te maju ngemulaꞌ. Kepanyai adai dua ikoꞌ urang te maju ke mua. 61 Senikoꞌ madah, “Ensia toꞌ madah pitoꞌ, ‘Ku tauꞌ ngancai Rumah Kudos Tuhan Allah, abaꞌ talah mulah ageꞌ alam tiga ari.’ ”
62 Baroꞌ Imam Besai nyaꞌ diri abaꞌ madah ke Isa, “Kati, nitauꞌ piyaꞌ Wan nyawot te detudoh senikoꞌ nyaꞌ ke Wan?” 63 Uleh Isa sunyeꞌ mah.
Baroꞌ Imam Besai nyaꞌ madah ageꞌ, “Demi Tuhan Allah te idop, padah ke kami, Wan toꞌ Al Maseh, Anak Tuhan Allah sekaleꞌ ke ukai?”
64 Sawot Isa, “Auꞌ, munyi te depadah Wan mah. Ku madah ke kitaꞌ, belaboh ari entoꞌ kitaꞌ kaꞌ medaꞌ Anak Ensia dudok de sepiyak kanan Tuhan Allah te Ma Kuasa abaꞌ datai de atau awan de langet.”g
65 Breta Imam Besai ninga Ya madah piyaꞌ, ya sau blumaꞌ minsak baju direꞌ abaꞌ madah, “Ya toꞌ mejaiꞌ Tuhan Allah nema Ya ngemelaꞌ Direꞌ abaꞌ Tuhan Allah. Nadai kita perlu saksi ageꞌ. Kitaꞌ kedireꞌ udah ninga te jakoꞌ Ya nyaꞌ. 66 Kati enteꞌ jakoꞌ kitaꞌ?”
Sidaꞌ nyawot, “Ya salah, alah deukom mati!”h
67 Baroꞌ sidaꞌ namet mata Isa ngau kayen, sidaꞌ ngeludah mua Ya, ngucoh Ya, abaꞌ nampar Ya.i 68 Sidaꞌ melicak Ya abaꞌ madah, “Eh Al Maseh! Enteꞌ meh amat nabi, padah ke kami, sapa te nampar meh?”
Petros madah direꞌ nadai ngelala Isa
69 Tengan nyaꞌ Petros dudok de luar, de laman. Adai sikoꞌ inoꞌ te jadi pemantoꞌ datai ngusong Petros abaꞌ madah, “Meh sigeꞌ selareh abaꞌ Isa, sidaꞌ Galelia nyaꞌ.”
70 Uleh Petros madah direꞌ nadai ngelala Ya de mua sidaꞌ, jakoꞌ ya, “Nitauꞌ Ku badaꞌ apa te jakoꞌ deꞌ.” 71 Udah nyaꞌ Petros angkat ari laman nyaꞌ. De mua pintu gerbang, pemantoꞌ te kebukai medaꞌ ya abaꞌ madah ke urang te diyaꞌ, “Ensia toꞌ tadeꞌ sigeꞌ abaꞌ Isa sidaꞌ Nasaret nyaꞌ.”
72 Baroꞌ Petros madah ageꞌ, “Brani sumpah, amat mah, nadai ku ngelala ensia nyaꞌ!”
73 Bedau lamaꞌ udah nyaꞌ, kebala urang te adai diyaꞌ datai ngusong Petros abaꞌ madah, “Pesti meh sikoꞌ ari rumong sidaꞌ, nyaꞌ kelala ari cakap meh.”
74 Baroꞌ Petros madah, “Brani sumpah, ku nadai ngelala ensia nyaꞌ! Enteꞌ ku bulaꞌ, isaꞌ mah Tuhan Allah ngukom ku!” Abaꞌ pas tengan nyaꞌ mah manok engkukok. 75 Baroꞌ ingat mah Petros apa te udah depadah Isa ke ya, “Sebedau manok engkukok, udah tiga kaleꞌ meh madah direꞌ nadai ngelala Ku.” Baroꞌ ya keluar blumaꞌ nyabak sikok-sikok.