Kebala inoꞌ dara te budu abaꞌ bijak
25
“Pas tengan nyaꞌ Pemrintah Tuhan Allah upa medaꞌ sepuloh inoꞌ dara te ngemaiꞌ kelita abaꞌ angkat ngusong penganten laki. 2 Limaꞌ ikoꞌ budu abaꞌ limaꞌ ikoꞌ bijak. 3 Limaꞌ ikoꞌ inoꞌ dara te budu nyaꞌ ngemaiꞌ kelita, uleh niseꞌ nyetok binyak. 4 Limaꞌ ikoꞌ inoꞌ dara te bijak nyaꞌ ngemaiꞌ kelita abaꞌ adai nyetok binyak alam jebol. 5 Uleh nema penganten te laki nyaꞌ jong nadai datai, sidaꞌ ngantok abaꞌ tinok.6 Pas tengah malam adai goꞌ te ngangau, ‘Penganten laki datai! Entang ke ya!’
7 Kebala inoꞌ dara nyaꞌ dani abaꞌ ngapes sumu kelita sidaꞌ. 8 Kebala inoꞌ dara te budu nyaꞌ madah ke kebala inoꞌ dara te bijak, ‘Bereꞌ ke kami siket binyak kelita kitaꞌ nyaꞌ. Kelita kami nyau kaꞌ padam.’
9 Uleh sawot kebala inoꞌ dara te bijak nyaꞌ, ‘Ah ngai kami, mali nadai bayah lah ngau kita. Kasa kitaꞌ angkat meli de teban urang te nyual binyak.’
10 Tengan sidaꞌ angkat ngigaꞌ binyak, nadai mang-mang datai mah penganten laki nyaꞌ. Kebala inoꞌ dara te udah siap nyaꞌ tamaꞌ ke teban te jalai gawai abaꞌ penganten te laki nyaꞌ. Udah nyaꞌ pintu detikop abaꞌ desepak.
11 Udah nyaꞌ inoꞌ dara te budu nyaꞌ datai abaꞌ madah, ‘Pak, pak, bukaꞌ ke pintu ke kami.’
12 Uleh penganten te laki nyaꞌ nyawot, ‘Ah ngai Ku, Ku nadai ngelala kitaꞌ.’
13 Kebaꞌ nyaꞌ, kitaꞌ alah selareh siap nema kitaꞌ nitauꞌ badaꞌ kemaya ari abaꞌ jam Anak Ensia kaꞌ datai.”
Pemantoꞌ te setia abaꞌ te nadai
14 “Pas tengan nyaꞌ, Pemrintah Tuhan Allah sama upa medaꞌ urang te kaꞌ angkat ke menua te jaoh. Sebedau angkat, ya ngumai kebala pemantoꞌ ya. Ya nyuroh kebala pemantoꞌ nyaꞌ ngintu reta bena ya selamaꞌ ya angkat. 15 Pemantoꞌ te semaru debereꞌ ya limaꞌ ribu duet mas, pemantoꞌ te kedua debereꞌ ya dua ribu duet mas, abaꞌ pemantoꞌ te ketiga debereꞌ ya seribu duet mas. Sidaꞌ debereꞌ nunaꞌ penalah sidaꞌ. Udah nyaꞌ ya angkat. 16 Pemantoꞌ te debereꞌ limaꞌ ribu duet mas lansong angkat meranak duet nyaꞌ, abaꞌ ya buleh untong limaꞌ ribu duet mas. 17 Pemantoꞌ te debereꞌ dua ribu duet mas sigeꞌ mulah piyaꞌ, abaꞌ ya buleh untong dua ribu duet mas. 18 Uleh pemantoꞌ te buleh seribu duet mas nyaꞌ angkat abaꞌ ngali lubang de tanah abaꞌ napok duet tuan ya diyaꞌ.
19 Lamaꞌ amat udah nyaꞌ, tuan nyaꞌ pulai. Ya ngumai kebala pemantoꞌ ya abaꞌ britong abaꞌ sidaꞌ. 20 Pemantoꞌ te nerimaꞌ limaꞌ ribu duet mas nyaꞌ datai abaꞌ ngemaiꞌ untong limaꞌ ribu duet mas, jakoꞌ ya, ‘Tuan, tilek wan limaꞌ ribu duet mas te wan bereꞌ ke ku, udah ku peranak limaꞌ ribu duet mas.’
21 Baroꞌ tuan ya nyawot, ‘Bayek amat te depulah meh nyaꞌ, pemantoꞌ ku te bayek abaꞌ setia; meh udah setia abaꞌ utai te met, ku kaꞌ mereꞌ ke meh utai te lebeh besai. Boh cerigah gaga abaꞌ ku.’
22 Baroꞌ datai mah pemantoꞌ te nerimaꞌ dua ribu duet mas nyaꞌ, ya madah, ‘Pak, tilek wan dua ribu duet mas te wan bereꞌ ke ku, udah ku peranak ke dua ribu duet mas.’
23 Baroꞌ tuan ya nyawot, ‘Bayek amat te depulah meh nyaꞌ, pemantoꞌ ku te bayek abaꞌ setia. Meh udah setia abaꞌ utai te met, ku kaꞌ mereꞌ ke meh utai te lebeh besai. Boh cerigah gaga abaꞌ ku.’
24 Udah nyaꞌ pemantoꞌ te nerimaꞌ seribu duet mas datai abaꞌ madah, ‘Pak ku tauꞌ badaꞌ wan toꞌ urang te kerampak. Wan nyamai-nyamai ngetau utai te nadai kalaꞌ wan unsai abaꞌ mutek utai te nadai kalaꞌ wan tamak, kami mati-mati kerja. 25 Kebaꞌ nyaꞌ ku takot abaꞌ angkat napok duet mas wan nyaꞌ alam tanah. Toꞌ teh duet wan!’
26 Baroꞌ tuan nyaꞌ nyawot, ‘Meh toꞌ pemantoꞌ te jat abaꞌ luntos! Meh udah tauꞌ badaꞌ ku ngetau utai te nadai kalaꞌ ku unsai abaꞌ mutek utai te nadai kalaꞌ ku tamak! 27 Tunaꞌ des meh alah meranak duet ku nyaꞌ, isaꞌ pas ku pulai ku nerimaꞌ anak abaꞌ inai duet nyaꞌ.
28 Baroꞌ tuan nyaꞌ madah ke pemantoꞌ te kebukai ameꞌ ke duet nyaꞌ ari ya, abaꞌ bereꞌ ke urang te empu sepuloh ribu duet mas nyaꞌ. 29 Nema ngenap urang te nguna apa te sidaꞌ empu, buleh lebeh mayoh ageꞌ. Sidaꞌ kaꞌ buleh lebeh mayoh ageꞌ ari apa te sidaꞌ perlu. Uleh urang te nadai nguna apa te sidaꞌ empu, ugaꞌ te adai de sidaꞌ kaꞌ deameꞌ ari sidaꞌ. 30 Abaꞌ buai ke pemantoꞌ te niseꞌ guna nyaꞌ ke teban te ma petang. Den ya kaꞌ nyabak abaꞌ lampar ngasa pemedeh sampai begetar beganyar.’ ”
Anak Ensia kaꞌ nyidang ugaꞌ urang
31 “Pas Anak Ensia datai ngau Raja, Ya kaꞌ detrudi kebala mlikat Ya abaꞌ Ya kaꞌ dudok mrintah ngau Raja de bangku Ya te luar biasa. 32 Baroꞌ ugaꞌ kebala bansa kaꞌ dekumpol de mua Ya abaꞌ Ya kaꞌ nyemeh sidaꞌ dua kelumpok upa gemala nyemeh dumba ari kameng. 33 Ya kaꞌ nepoꞌ kebala dumba bong ke kanan abaꞌ kebala kameng bong ke kibaꞌ Ya.
34 Udah nyaꞌ Raja nyaꞌ kaꞌ madah ke kebala urang te bong ke kanan Ya, ‘Ayoh kitaꞌ te udah debereꞌ Apai Ku berkat. Trimaꞌ ke Pemrintah Ya te udah deageh Ya ke kitaꞌ belaboh ari dunia depulah. 35 Nema jalai Ku lapar, kitaꞌ mereꞌ Ku makai, jalai Ku awos kitaꞌ mereꞌ Ku nginom. Jalai Ku niseꞌ teban te jalai bemalam kitaꞌ ngasoh Ku bemalam de rumah kitaꞌ. 36 Jalai Ku niseꞌ kebala selawar baju, kitaꞌ mereꞌ ku selawar baju. Jalai ku pedeh, kitaꞌ ngintu Ku. Jalai Ku dapenyara, kitaꞌ masau Ku.’
37 Baroꞌ kebala urang te udah nunaꞌ kedekaꞌ Tuhan nyaꞌ madah, ‘Tuhan kemaya kami medaꞌ Wan lapar abaꞌ mereꞌ Wan makai, medaꞌ Wan awos abaꞌ mereꞌ Wan nginom? 38 Kemaya kami medaꞌ Wan niseꞌ teban te jalai bemalam abaꞌ ngasoh Wan bemalam de rumah kami? Kemaya kami medaꞌ Wan nadai ngau selawar baju abaꞌ mereꞌ selawar baju ke Wan? 39 Kemaya kami medaꞌ Wan pedeh abaꞌ dapenyara abaꞌ kami datai masau Wan?’
40 Raja nyaꞌ kaꞌ nyawot, ‘Ku madah ke kitaꞌ, ugaꞌ utai te kitaꞌ pulah ke kebala menyadeꞌ Ku, amat mah ya de penadai urang, nyaꞌ sama mah abaꞌ kitaꞌ mulah ke Ku.’
41 Baroꞌ Raja nyaꞌ madah gaꞌ ke kebala urang te de sepiyak kibaꞌ Ya, ‘Tuhan Allah udah mutos ngukom kitaꞌ! Rari ke kitaꞌ ari mua Ku ke alam api neraka te nitauꞌ padam te udah deageh ngau Ibles abaꞌ kebala roh jat te nerudi ya. 42 Nema jalai Ku lapar, kitaꞌ ngai mereꞌ Ku makai. Jalai Ku awos, kitaꞌ ngai mereꞌ Ku nginom. 43 Jalai Ku niseꞌ teban te jalai bemalam, kitaꞌ ngai jalai Ku bemalam de rumah kitaꞌ. Jalai Ku niseꞌ selawar baju, kitaꞌ ngai mereꞌ selawar baju ke Ku. Jalai Ku pedeh abaꞌ de penyara, kitaꞌ ngai masau Ku.’
44 Baroꞌ kebala sidaꞌ te nadai kaꞌ nunaꞌ kedekaꞌ Tuhan madah, ‘Tuhan kemaya kami medaꞌ Wan lapar, awos, niseꞌ selawar baju, pedeh, dapenyara, abaꞌ kami nadai nulong Wan?’
45 Raja nyaꞌ nyawot sidaꞌ, ‘Ku madah ke kitaꞌ, nema kitaꞌ ngai nulong kebala menyadeꞌ Ku te de penadai urang, nyaꞌ sama mah abaꞌ kitaꞌ ngai nulong Ku.’
46 Baroꞌ kebala sidaꞌ nyaꞌ kaꞌ deukom niseꞌ pemadoꞌ. Uleh kebala urang te nunaꞌ kedekaꞌ Tuhan Allah kaꞌ jong idop abaꞌ Tuhan Allah sengabot.”a