Rumah Kudos Tuhan Allah kaꞌ deruboh
24
Pas Isa angkat ari Rumah Kudos Tuhan Allah, kebala muret Ya datai ngusong Ya abaꞌ madah, “Guru, pedaꞌ Wan lampar bayek Rumah Kudos Tuhan Allah abaꞌ kebala rumah te nungaꞌ nyaꞌ.” 2 Isa madah ke sidaꞌ, “Pedaꞌ bamat-amat ke ugaꞌ nyaꞌ, Ku madah ke kitaꞌ datai ke sigeꞌ mah niseꞌ batu te dengaꞌ betipan ageꞌ jemah lah. Ugaꞌ nyaꞌ kaꞌ deruboh.”Kebala urang te pecayaꞌ mayoh ngasa pemedeh
3 Pas Isa tengan dudok de buket Saiton, kebala muret Ya datai becakap kedireꞌ abaꞌ Ya. Jakoꞌ sidaꞌ, “Guru, kemaya Rumah Kudos Tuhan Allah kaꞌ deruboh abaꞌ apa tana penatai Wan abaꞌ pemadoꞌ jeman toꞌ?
4 Isa nyawot sidaꞌ, “Ati-ati ke kitaꞌ isaꞌ kitaꞌ nadai deakal urang! 5 Nema mayoh urang kaꞌ datai ngau nama Ku abaꞌ madah, ‘Ku mah Al Maseh,’ abaꞌ sidaꞌ kaꞌ mayoh nesat urang. 6 Kitaꞌ kaꞌ ninga brita perang abaꞌ adai te meruntak diyaꞌ-ditoꞌ uleh nang kitaꞌ saban. Nema ugaꞌ utai nyaꞌ alah dulau datai, uleh nyaꞌ ukai gaꞌ bereti senta pemadoꞌ dunia toꞌ. 7 Suku te suteꞌ kaꞌ beperang ngelawan suku te kebukai, abaꞌ negara te suteꞌ kaꞌ nyerang negara te kebukai. Diyaꞌ-ditoꞌ kaꞌ adai rama lapar te rat amat abaꞌ kaꞌ adai gempa bumi. 8 Uleh pemedeh ugaꞌ nyaꞌ baroꞌ belaboh mah, upa pemedeh urang inoꞌ te baroꞌ kaꞌ beranak.
9 Tengan nyaꞌ kitaꞌ kaꞌ deserah isaꞌ deprisa abaꞌ debunoh. Kitaꞌ kaꞌ dekareh ugaꞌ bansa tegal kitaꞌ nerudi Ku. 10 Pas tengan nyaꞌ mayoh urang te pecayaꞌ nadai pecayaꞌ ke Ku ageꞌ. Sidaꞌ kaꞌ areh ke pangan bukai abaꞌ nyerah sama direꞌ ke munsoh. 11 Mayoh kebala nabi te nesat kaꞌ timol abaꞌ nesat mayoh urang. 12 Abaꞌ nema pemenyaiꞌ urang empala betamah, kaseh ke pangan bukai nadai upa sengket. 13 Uleh urang te betan datai ke pemadoꞌ kaꞌ selamat. 14 Abaꞌ Brita Bayek upa kati Pemrintah Tuhan Allah kaꞌ depadah de ugaꞌ dunia isaꞌ ugaꞌ urang ninga Brita Bayek nyaꞌ. Udah nyaꞌ baroꞌ mah pemadoꞌ jeman toꞌ datai.”
Pemedeh te rat amat abaꞌ kebala urang te ngakoꞌ direꞌ Al Maseh
15 Isa nyamong ageꞌ cakap Ya, jakoꞌ Ya, “Kitaꞌ kaꞌ medaꞌ lah sikoꞌ urang te paleng jat mulah utai te najes te nyuroh Rumah Kudos Tuhan Allah nadai kudos ageꞌ, upa te udah depadah nabi Daniel. (Te maca toꞌ alah nyarok bamat-amat ke utai toꞌ!)a 16 Pas tengan nyaꞌ, kitaꞌ te diyau de Yudia toꞌ alah rari selabok ke buket. 17 Kitaꞌ te tengan de atau atap, nang ngameꞌ kebala utai ari alam bilek, uleh alah lansong rari selabok ke buket gaꞌ. 18 Piyaꞌ gaꞌ kitaꞌ te tengan de uma nang bebalek ngameꞌ kebala selawar baju.
19 Uleh kaseh badaꞌ kebala inoꞌ te tengan nganong abaꞌ te nusu miyak rama nyaꞌ, nema sidaꞌ pedeh ngelari direꞌ. 20 Bradua ke Tuhan Allah isaꞌ pas kitaꞌ ngelari direꞌ nadai tengan rama ujan abaꞌ tengan ari Sabat. 21 Nema pas rama nyaꞌ kaꞌ datai pemedeh te rat amat. Bedau kalaꞌ urang ngasa pemedeh te upa nyaꞌ, belaboh ari Tuhan Allah mulah dunia toꞌ datai ke entoꞌ, abaꞌ pemedeh te upa nyaꞌ nadai kaꞌ tejadi ageꞌ.b 22 Enteꞌ rama nyaꞌ nadai dejangkaꞌ Tuhan Allah, niseꞌ urang te tauꞌ betan idop. Uleh tegal urang te depileh Ya, Tuhan Allah nyangkaꞌ rama nyaꞌ.
23 Pas tengan nyaꞌ enteꞌ adai urang te madah ke kitaꞌ, ‘Pedaꞌ, Al Maseh adai ditoꞌ,’ abaꞌ urang bukai madah, ‘Al Maseh adai den!’ Nang kitaꞌ pecayaꞌ. 24 Nema te ngangkoꞌ direꞌ Al Maseh abaꞌ kebala nabi te nesat kaꞌ timol abaꞌ sidaꞌ kaꞌ mulah kebala tana te luar biasa, abaꞌ sidaꞌ kaꞌ berusaha nesat urang te depileh Tuhan Allah. 25 Ingat ke lah! Utai toꞌ udah Ku padah ke kitaꞌ sebedau utai nyaꞌ datai.
26 Enteꞌ adai urang te madah ke kitaꞌ, ‘Pedaꞌ, Al Maseh adai de tanah luah te beengkrangan,’ nang kitaꞌ angkat ken. Abaꞌ enteꞌ adai urang te madah, ‘Pedaꞌ, Al Maseh adai alam bilek,’ nang kitaꞌ pecayaꞌ. 27 Nema upa kilat te bejelar mancar ari timor ke barat, upa piyaꞌ gaꞌ penatai Anak Ensia jemah lah. 28 Senta Ku datai ageꞌ lah, ugaꞌ urang tauꞌ ugaꞌ mah badaꞌ penatai Ku, nema ‘Dini adai bangkai, diyaꞌ mah adai burong te makai bangkai begugoꞌ.’ ”
Penatai Anak Ensia
29 “Nadai lamaꞌ udah rama pedeh te rat amat nyaꞌ,
‘Mataari nadai kaꞌ besinar ageꞌ,
abaꞌ bulan nadai bedawar ageꞌ.
Kebala piyanau kaꞌ laboh ari langet,
abaꞌ kebala utai te adai de langet nadai tentu rudu.’c
30 Kebala urang kaꞌ medaꞌ utai de langet kelaiꞌ enteꞌ Anak Ensia kaꞌ datai. Ugaꞌ suku bansa de bumi kaꞌ nyabak tegal takot medaꞌ Anak Ensia nyaꞌ datai de atau awan ngau kuasa te lampar besai abaꞌ besinar terang.d 31 Pas trumpet te ma sareng de sepu, Ya kaꞌ ngutos kebala mlikat Ya ke ugaꞌ dunia ngumpol ugaꞌ urang te depileh Ya.”
Belajar ari pon ara
32 Baroꞌ Isa nyamong cakap Ya ageꞌ, “Belajar ke kitaꞌ ari pon ara. Asa kitaꞌ medaꞌ pon ara nyaꞌ nyau bebunga, tauꞌ kitaꞌ badaꞌ nadai lamaꞌ ageꞌ lah rama buah. 33 Piyaꞌ gaꞌ asa kitaꞌ medaꞌ ugaꞌ te Ku padah ke kitaꞌ tadeꞌ nyaꞌ datai, tauꞌ kitaꞌ badaꞌ nadai lamaꞌ ageꞌ Ku kaꞌ datai. 34 Ku madah ke kitaꞌ, ugaꞌ nyaꞌ kaꞌ datai sebedau kebala urang jeman toꞌ mati ugaꞌ. 35 Langet abaꞌ bumi toꞌ punas lah, uleh apa te Ku padah nadai ngamoꞌ punas.”
Pengajar isaꞌ selareh siap
36 “Uleh niseꞌ urang te tauꞌ badaꞌ kemaya ari abaꞌ senta utai nyaꞌ datai lah. Kebala mlikat de sruga nitauꞌ badaꞌ, Anak sigeꞌ nitauꞌ badaꞌ. Peroꞌ Apai Ku mah te tauꞌ badaꞌ.
37 Senta Anak Ensia nyaꞌ datai lah, nyaꞌ sama upa de jeman Noh meliyaꞌ.e 38 Nema sebedau aiꞌ besai te ngapot dunia de jeman nyaꞌ datai, sidaꞌ idop upa sengket. Sidaꞌ makai nginom, belaki bini, datai ke senta Noh tamaꞌ ke alam prau te ma besai. 39 Sidaꞌ nitauꞌ badaꞌ enteꞌ aiꞌ besai te ngapot dunia nyaꞌ kaꞌ datai abaꞌ munas sidaꞌ. Upa piyaꞌ gaꞌ enteꞌ Anak Ensia datai lah.f 40 Pas tengan nyaꞌ adai dua urang te tengan kreja de uma, te sikoꞌ kaꞌ debaiꞌ, te sikoꞌ kaꞌ dedudi. 41 Adai dua ikoꞌ urang inoꞌ te tengan ngisar, te sikoꞌ kaꞌ debaiꞌ, te sikoꞌ kaꞌ dedudi.
42 Kebaꞌ nyaꞌ kitaꞌ alah selareh siap, nema kitaꞌ nitauꞌ badaꞌ kemaya Tuhan kitaꞌ kaꞌ datai. 43 Kitaꞌ alah ingat, enteꞌ urang te empu rumah tauꞌ badaꞌ jam berapa urang te kaꞌ encuri datai, pesti mah ya siap bejaga abaꞌ nadai ngengaꞌ rumah direꞌ deslungkar. 44 Kebaꞌ nyaꞌ kitaꞌ alah selareh siap, nema Anak Ensia kaꞌ datai de senta te nadai kitaꞌ sangka.”
Pemantoꞌ te bayek abaꞌ te nadai bayek
45 Isa madah ageꞌ, “Sapa pemantoꞌ te setia abaꞌ panai? Ya urang te deangkat tuan rumah nyaꞌ ngau kepalaꞌ pemantoꞌ. Ya ngatoh ugaꞌ kebala pemantoꞌ te kebukai, abaꞌ nguros kebala pemakai sidaꞌ senta sidaꞌ makai. 46 Betuah amat kepalaꞌ pemantoꞌ nyaꞌ enteꞌ pas tuan ya datai nemu ya tengan ngreja tugas ya. 47 Ku madah ke kitaꞌ, tuan nyaꞌ kaꞌ ngangkat ya jadi urang te tukang nguros kebala reta bena ya. 48 Uleh jakoꞌ alam ati kepalaꞌ pemantoꞌ nyaꞌ asa ya nadai bayek, ‘Tuan ku jong nitauꞌ datai-datai.’ 49 Baroꞌ ya belaboh mangkong-maloꞌ kebala pemantoꞌ te kebukai, abaꞌ ya makai nginom abaꞌ kebala pemabok. 50 Baroꞌ tuan nyaꞌ kaꞌ datai de ari te nadai de sangka abaꞌ de jam te nadai de ketauꞌ ya, 51 abaꞌ tuan ya kaꞌ mangkong maloꞌ ya abaꞌ ngukom ya sebelaꞌ abaꞌ urang te budi-budi bayek. Diyaꞌ sidaꞌ kaꞌ nyabak sampai begetar beganyar.”