Isa nganoꞌ kebala sidaꞌ te ahli alam Prator Musa abaꞌ kebala sidaꞌ Parisi
23
Baroꞌ Isa madah ke kebala urang banyau abaꞌ ke kebala muret Ya, jakoꞌ Ya, 2 “Kebala sidaꞌ te ahli alam Prator Musa abaꞌ kebala sidaꞌ Parisi adai hak nyelas Prator Musa. 3 Kebaꞌ nyaꞌ patoh abaꞌ tunaꞌ ke ugaꞌ utai te deajar sidaꞌ ke kitaꞌ, uleh nang nunaꞌ pengidop sidaꞌ. Nema sidaꞌ nadai mulah apa te deajar sidaꞌ. 4 Sidaꞌ mulah kebala prator te pedeh abaꞌ maksa urang mulah prator nyaꞌ. Uleh sidaꞌ kedireꞌ datai ke sesingkar siloꞌ mah nadai mulah prator nyaꞌ.5 Sidaꞌ gah ngau kutak te beiseꞌ ayat Alkitaba te lebeh besai ari sengket abaꞌ namet de jari abaꞌ palaꞌ sidaꞌ abaꞌ sidaꞌ ngau jubah te beramai panyai.b Ugaꞌ te sidaꞌ pulah nyaꞌ, isaꞌ sidaꞌ pedaꞌ urang jaꞌ. Bukai ari nyaꞌ gaꞌ,c 6 sidaꞌ gah dudok de teban te penteng teban urang gawai, abaꞌ de teban te penteng de rumah te jalai sidaꞌ Yahudi nyemah Tuhan Allah. 7 Sidaꞌ gaga dehormat urang de teban urang te ramai abaꞌ gaga dekumai urang ‘Guru’.
8 Uleh nema ugaꞌ kitaꞌ menyadeꞌ seiman, kebaꞌ nang kitaꞌ kaꞌ dekumai urang ‘Guru’, nema peroꞌ sikoꞌ mah Guru. 9 Nang kitaꞌ ngumai ‘Apai’ ngau kitaꞌ hormat ke urang de dunia toꞌ, nema peroꞌ sikoꞌ mah Apai kitaꞌ, nyaꞌ mah Ya te de sruga. 10 Nang gaꞌ kitaꞌ semengkauꞌ dekumai urang pemimpen, nema peroꞌ sikoꞌ mah pemimpen kitaꞌ, nyaꞌ mah Al Maseh. 11 Urang te paleng penteng de entara kitaꞌ alah jadi pelayan kitaꞌ. 12 Abaꞌ sapa jaꞌ urang te ningeꞌ direꞌ, Tuhan Allah kaꞌ ngemaroh ya. Uleh urang te ngemaroh direꞌ, kaꞌ detingeꞌ Tuhan Allah.
13 Rugi amat kitaꞌ kebala urang te ahli alam Prator Musa abaꞌ sidaꞌ Parisi! Kitaꞌ toꞌ urang te budi-budi bayek, nema kitaꞌ udah nikop pintu te ngau tamaꞌ ke Pemrintah Tuhan Allah, uleh kitaꞌ kedireꞌ nadai tamaꞌ ke alam nyaꞌ, abaꞌ urang te berusaha kaꞌ tamaꞌ kiyaꞌ kitaꞌ aru kah.
[ 14 Rugi amat kitaꞌ kebala urang te ahli alam Prator Musa abaꞌ sidaꞌ Parisi! Kitaꞌ toꞌ urang te budi-budi bayek, nema kitaꞌ ngameꞌ reta bena kebala inoꞌ te balu. Abaꞌ ngau napok pemenyaiꞌ kitaꞌ nyaꞌ, kitaꞌ bradua panyai-panyai isaꞌ deangap urang bayek. Jemah lah kitaꞌ pesti mah nerimaꞌ ukom te berat.]
15 Rugi amat kitaꞌ kebala urang te ahli alam Prator Musa abaꞌ sidaꞌ Parisi! Kitaꞌ toꞌ urang te budi-budi bayek, nema kitaꞌ nyemerang laot abaꞌ niti jalai darat isaꞌ kitaꞌ buleh sikoꞌ urang tamaꞌ agama kitaꞌ. Abaꞌ udah ya tamaꞌ agama kitaꞌ, kitaꞌ nyuroh ya jadi urang te dua kaleꞌ lebeh patot tamaꞌ neraka ari kitaꞌ.
16 Rugi amat kitaꞌ kebala urang te ahli alam Prator Musa abaꞌ sidaꞌ Parisi! Kati kitaꞌ tauꞌ ngireng urang? Kitaꞌ jaꞌ butaꞌ! Kitaꞌ madah, ‘Enteꞌ sikoꞌ urang bedanyi demi Rumah Kudos Tuhan Allah, ya nadai alah mulah danyi ya nyaꞌ. Uleh enteꞌ sikoꞌ urang bedanyi demi mas de Rumah Kudos Tuhan Allah, ya alah mulah apa te udah dedanyi ya nyaꞌ.’ 17 Eh kitaꞌ kebala urang budu te butaꞌ! Nadai piyaꞌ kitaꞌ tauꞌ badaꞌ enteꞌ Rumah Kudos Tuhan Allah nyaꞌ lebeh penteng ari mas te adai alam nyaꞌ? Rumah Kudos Tuhan Allah nyaꞌ mah te nyuroh mas nyaꞌ kudos.
18 Kitaꞌ madah gaꞌ, ‘Enteꞌ sikoꞌ urang bedanyi demi mesbah, ya nadai alah mulah danyi ya nyaꞌ. Uleh enteꞌ sikoꞌ urang bedanyi demi kurban pesemah te adai de atau mesbah nyaꞌ, ya alah mulah apa te udah dedanyi ya nyaꞌ.’ 19 Eh kitaꞌ kebala urang te butaꞌ! Nadai piyaꞌ kitaꞌ tauꞌ badaꞌ enteꞌ mesbah nyaꞌ lebeh penteng ari kurban pesemah te adai de atau nyaꞌ? Mesbah nyaꞌ mah te nyuroh kurban pesemah nyaꞌ kudos. 20 Kebaꞌ nyaꞌ ngenap urang te bedanyi demi mesbah, ya bedanyi demi mesbah abaꞌ ugaꞌ kurban pesemah te adai de atau nyaꞌ gaꞌ. 21 Abaꞌ enteꞌ sikoꞌ urang bedanyi demi Rumah Kudos Tuhan Allah, bereti ya bedanyi demi Rumah Kudos Tuhan Allah abaꞌ demi Tuhan Allah te diyau diyaꞌ. 22 Abaꞌ enteꞌ sikoꞌ urang bedanyi demi sruga, breti ya bedanyi demi bangku raja teban Tuhan Allah dudok mrintah, abaꞌ demi Tuhan Allah te dudok de atau bangku raja nyaꞌ.d
23 Rugi amat kitaꞌ kebala urang te ahli alam Prator Musa abaꞌ sidaꞌ Parisi! Kitaꞌ toꞌ urang te budi-budi bayek, nema kitaꞌ rajen ngemaiꞌ persepuluhan ari rempah te ngau kebala bumu asel kebon kitaꞌ ke Tuhan Allah. Uleh te adel, kaseh, abaꞌ setia te lebeh penteng alam Prator Musa nadai kitaꞌ pulah. Tunaꞌ des nyaꞌ te alah kitaꞌ pulah, abaꞌ nadai menadai te kebukai.e 24 Eh kitaꞌ kebala pemimpen te butaꞌ! Lalat kitaꞌ tapes ke ari aiꞌ te kitaꞌ inom, uleh unta te diyaꞌ kitaꞌ telan.
25 Rugi amat kitaꞌ kebala urang te ahli alam Prator Musa abaꞌ sidaꞌ Parisi! Kitaꞌ toꞌ urang te budi-budi bayek, uleh ati kitaꞌ lampar kutor nema kitaꞌ nipu urang bukai abaꞌ peroꞌ kaꞌ ngenyamai direꞌ. Kitaꞌ upa urang te masok cawan abaꞌ pingan te bong ke luar jaꞌ, uleh te bong ke dalam lampar kutor. 26 Eh kebala sidaꞌ Parisi te butaꞌ! Basok lenges ke cawan abaꞌ pingan kitaꞌ te bong ke dalam, isaꞌ te bong keluar nyaꞌ breseh gaꞌ.
27 Rugi amat kitaꞌ kebala urang te ahli alam Prator Musa abaꞌ sidaꞌ Parisi! Kitaꞌ toꞌ urang te budi-budi bayek, nema kitaꞌ sama upa kubor te becat puteh. Pedaꞌ ari luar ma bayek, uleh dalam penoh kebala tulang abaꞌ kebala utai te buntau. 28 Piyaꞌ gaꞌ kitaꞌ depedaꞌ ari luar upa urang te kenaꞌ, uleh ati kitaꞌ bulaꞌ abaꞌ lampar jat.
29 Rugi amat kitaꞌ kebala urang te ahli alam Prator Musa abaꞌ sidaꞌ Parisi! Kitaꞌ toꞌ urang te budi-budi bayek! Kitaꞌ mulah kubor kebala nabi te meliyaꞌ abaꞌ ngelagaꞌ kubor kebala urang te idop bayek. 30 Abaꞌ kitaꞌ madah, ‘Enteꞌ kami idop de jeman puyang jagang kami, pesti mah kami nadai abaꞌ sidaꞌ munoh kebala nabi.’ 31 Uleh ari cakap kitaꞌ nyaꞌ, jelas mah enteꞌ kitaꞌ toꞌ pureh kebala urang te munoh kebala nabi nyaꞌ. Jadi kitaꞌ belaꞌ mah abaꞌ sidaꞌ. 32 Enteꞌ piyaꞌ, pulah ke pulah mah pemenyaiꞌ te udah depulah puyang jagang kitaꞌ nyaꞌ!
33 Eh kitaꞌ kebala ular, pureh ular te bisa, sangkaꞌ kitaꞌ, kitaꞌ tauꞌ selamat ari neraka? Tuhan Allah pesti majak kitaꞌ ke alam api neraka. 34 Kebaꞌ nyaꞌ, dinga ke bamat-amat! Ku kaꞌ ngutos kebala nabi, kebala urang te bijak, abaꞌ kebala urang te ahli alam Prator Musa. Adai kedaꞌ sidaꞌ kaꞌ kitaꞌ bunoh, adai kedaꞌ kaꞌ kitaꞌ saleb, abaꞌ adai kedaꞌ kaꞌ kitaꞌ pangkong paloꞌ de rumah te jalai sidaꞌ Yahudi nyemah Tuhan Allah, abaꞌ kitaꞌ kaꞌ ngagaꞌ sidaꞌ ari kuta te suteꞌ ke kuta te kebukai.
35 Kebaꞌ nyaꞌ kitaꞌ kaꞌ deukom tegal puyang jagang kitaꞌ munoh kebala urang te niseꞌ salah, belaboh ari te munoh Habel,f datai ke te munoh Sakaria anak Berekya,g te debunoh sidaꞌ de entara Rumah Kudos Tuhan Allah abaꞌ mesbah. 36 Ku madah ke kitaꞌ ugaꞌ nyaꞌ kaꞌ detangong kebala urang te idop de jeman toꞌ.”
Isa kaseh badaꞌ ke sidaꞌ Yerosalem
37 “O sidaꞌ Yerosalem, kitaꞌ gah munoh kebala nabi abaꞌ nikam kebala urang te deutos ke kitaꞌ ngau batu sampai mati. Tunaꞌ kepaꞌ Ku kaꞌ ngumpol abaꞌ ngelinong kitaꞌ, upa inoꞌ manok ngumpol abaꞌ ngelinong kebala anak de baroh sayap ya, uleh kitaꞌ te ngai. 38 Pedaꞌ ke bamat-amat! Rumah kitaꞌ kaꞌ sunyeꞌ nema Tuhan Allah nadai diyau abaꞌ kitaꞌ ageꞌ. 39 Ku madah ke kitaꞌ, belaboh ari entoꞌ kitaꞌ nadai medaꞌ Ku ageꞌ datai ke senta kitaꞌ madah,
‘Puji ke Ya te datai deutos alam nama Tuhan Allah.’ ”h