Honas 2

Ini Sa Egoh I Honas Migsimbà

¹ Na, egoh i Honas dalem dé getek sa sedà, migsimbà diyà si Datù Nemula, sa Nemula egpigtuuwen di. ² Guwaen di, “O Datù Nemula, mig-umow a diyà keniko danà siini kelikutan ku, owoy sinagbian ko aken. Egoh ku diyà bayà, migpegeni a tabang owoy dinineg ko aken. ³ Igbuung ko aken diyà sa pused dagat taman nekeuma a diyà sa getan dagat. Inuwit a sa leges dagat danà di egpekedelegpà diyà kenak sa dakel lambeg pineangay ko. ⁴ Iya sa penemdem ku nehemagawan a dé kedu diyà keniko owoy endà dé hauwen ku duu uman sa mapulù dalesan ko. ⁵ Sinelut a sa wayeg owoy egkepagkus a ma. Nelimunan a sa dagat owoy nebedbed ma keluwen dagat sa ulu ku. ⁶ Nekeangay a diyà sa pesu tuduk diyà sa pused dagat, kenà sa bengawan endà meukaan di taman melugay sa kenà ku endà mekelaun. Dodoo, o Datù Nemula sa Nemula egpigtuuwen ku, inuwit ko doo aken nehagtay kedu diyà sa pused dagat. ⁷ Egoh ku egtugedam buyu egkebugtus sa ginawa ku, migsimbà a diyà keniko, o Datù Nemula, owoy dinineg ko doo aken kedu diyà sa mapulù dalesan ko. ⁸ Na, sa medoo etaw egpenemula sa inetaw endà duen ulan, ininiyugan da polo kuna sa tigtu mehidu. ⁹ Dodoo aken, umolò a keniko owoy megay a ma diyà keniko sa hinagtay ulowen ku amuk sumimbà a owoy ipetuu ku ma sa igpasad ku. Enù ka kedu diyà keniko, o Datù Nemula, sa kealuk etaw.”

¹⁰ Agulé sinugù i Datù Nemula sa sedà anì suwahen di Honas i diyà sa mantadan. Hê, migpangunut sa sedà.