Honas 1

Ini Sa Igsulat Denu Si

HONAS

Ini Sa Egoh I Honas Endà Migpangunut Diyà Sa Igsugù I Nemula

¹ Na, sebaen agdaw mig-ikagi Datù Nemula i diyà si Honas anak i Amitayi. ² Guwaen di, “Ipanaw ka angay dutu siedò dakel menuwa Niniba, owoy petaled ko sa keikagi ko eg-indaw sa medoo etaw dutu enù ka netiigan ku tigtu medaet sa langun egbaelan da.” ³ Dodoo ungayà i Honas pelaguyan di hedem Datù Nemula i, huenan di migsalibang polo eg-angay diyà sa menuwa Hopi kenà di mighaa sa kumpit mangay Espaniya dò. Agulé migsukay Honas i eg-edà anì peunut kenagda mangay Espaniya dò enù ka egpelaguyan di hedem Datù Nemula i.

⁴ Dodoo egoh sa kumpit eg-ipanaw dé diyà dagat, pineduen i Datù Nemula sa tigtu meleges kelamag diyà sa dagat kenà da. Huenan di, buyu egkedaetan sa kumpit inedaan di. ⁵ Hê, tigtu egkelimedangan sa medoo eggalebek diyà sa kumpit, owoy uman sebaen diyà kenagda egpegeni da tabang diyà sa munoy nemula da. Agulé egsenabuen da diyà dagat sa medoo iglulan da anì lumagpuk sa kumpit. Dodoo si Honas, mig-angay polo egtudug diyà sa sebaen luwang kumpit denu leketanà.

⁶ Agulé hinaa sa kapitan kumpit Honas i owoy inikagiyan di, guwaen di, “Maen ko i egtudug? Enaw ka owoy pegeni ka tabang diyà sa nemula ko. Petow ki daa kumehidu, owoy alukan di kita.”

⁷ Agulé neseolom sa medoo tegegalebek diyà kumpit, guwaen da, “Sebunutay ki anì metiigan ta ngadan tayu di etaw sa pesuwan siini kelikutan eghauwen ta.” Hê, egoh da migsebunutay, iya sa nehauwan da sa ngadan i Honas. ⁸ Huenan di, mig-ikagi da diyà kenagdi, guwaen da, “Kuna mabes sa pesuwan ini i kelikutan ta. Ngadan sa egbaelan ko dahini? Ngadan di menuwa keduwan ko i? Ngadan ko i balangan etaw kuna i?”

⁹ Migsagbì Honas i, guwaen di, “Etaw Hibelu a, owoy sa Nemula egsimbaan ku sa Nemula diyà langit sa migbael dagat owoy tanà.” ¹⁰ Agulé tinulonon di ma kagda sa egoh di egpelaguy hedem diyà si Datù Nemula.

Huenan di, tigtu egkelimedangan sa medoo tegegalebek diyà kumpit, owoy mig-ikagi da diyà si Honas, guwaen da, “Mekepesu iya wé binaelan ko.” ¹¹ Ligò di egkeumanan ma egkeleges sa kelamag, huenan di inigsaan sa medoo tegegalebek diyà kumpit Honas i, guwaen da, “Ngadan sa kebael ké keniko anì luminek siini dagat?”

¹² Migsagbì Honas i, guwaen di, “Nabù yu aken diyà dagat anì sumabuh sa meleges kelamag owoy luminek ma sa dagat. Enù ka netiigan ku aken sa pesuwan di tinebow ki siini meleges kelamag.”

¹³ Dodoo eg-udes da egpula sa medoo tegegalebek diyà kumpit anì mekepelikù da hedem diyà sa mantadan. Dodoo endà egpekegaga da enù ka egkeumanan polo sa keleges sa kelamag. ¹⁴ Huenan di, egpegeni da tabang diyà si Datù Nemula, guwaen da, “O Datù Nemula, egpegeni ké anì endà pigtamayan ko duu kami danà ké mimatay siini etaw owoy anì endà ma imatayan ko duu kami danà ini i baelan ké. Enù ka netiigan ké, o Datù Nemula, kuna doo sa pesuwan di nehaa ké ini i enù ka danà sa ungayà ko doo.” ¹⁵ Agulé hinenat da Honas i owoy ninabù da diyà dagat. Hê, petow dé migsabuh sa kelamag owoy miglinek ma dé sa dagat. ¹⁶ Agulé tigtu nelimedangan sa medoo tegegalebek diyà kumpit diyà si Datù Nemula. Huenan di, mig-imatay da sa hinagtay ibegay da uloy diyà si Nemula, owoy migpasad da ma sa egoh da mangunut diyà kenagdi.

¹⁷ Agulé igpeamah i Datù Nemula Honas i diyà sa dakel sedà. Hê, telu agdaw owoy telu gesigep sa lugay i Honas dalem getek sa sedà.