Honas 3

Ini Sa Egoh I Honas Migpangunut Diyà Sa Igsugù I Nemula

¹ Na, mig-ikagi dema Datù Nemula i diyà si Honas. ² Guwaen di, “Ipanaw ka angay dutu siedò dakel menuwa Niniba, owoy tulon ko diyà sa medoo etaw di sa inikagi ku diyà keniko.” ³ Agulé migpangunut Honas i diyà si Datù Nemula, huenan di mig-angay Niniba dò. Na, tigtu melabel sa menuwa Niniba, huenan di amuk umedung sa etaw diyà sa sebaen kilidan di mangay diyà sa sebaen ma kilidan di, telu agdaw eg-ipanawen asal egpanteken. ⁴ Agulé mig-awuh Honas i diyà sa menuwa Niniba. Hê, egoh di segdu dé eg-ipanaw dalem sa menuwa, migpetaled eg-ikagi, guwaen di, “Medaetan sa menuwa Niniba amuk meuma epat pulù agdaw edung ini egoh di.”

⁵ Na, egoh sa medoo tegeNiniba migdineg sa kagi i Nemula tinulon i Honas, migpigtuu da. Huenan di, migsasà da diyà sa kedoowon da anì peulanen da langun sa kekaen da, owoy migkawal ma sa langun etaw sa binekas sakù, edung diyà sa kawasà taman sa pubeli, anì metandaan sa egoh da nesenulê.

⁶ Na, egoh sa datù tegeNiniba migdineg denu iya wé, miglegkang kedu diyà sa metolol bangkù di. Hê, linuwas di sa metolol kawal di, owoy migkawal polo sa binekas sakù owoy mig-angay eg-ugsad diyà sa megenaw dé abuh. ⁷ Owoy migpeuwit ma kagi anì ipetiig di diyà sa medoo duma di tegeNiniba, guwaen di, “Aken i datù yu owoy sa medoo salu ku, egsuguen ké kiyu anì peulanen ta langun sa kekaen ta owoy sa keinem ta, lapeg sa medoo hinagtay ta ma. ⁸ Owoy sa langun etaw, kumawal ki sa binekas sakù owoy lagbungi yu sakù sa iyug sa medoo hinagtay. Owoy tumemù ki sumimbà diyà si Nemula owoy ekedan ta ma sa medaet adat ta owoy sa medaet egbaelan ta. ⁹ Enù ka mepelumanan kéen sa penemdem i Nemula owoy endà bulitan di duu kita kéen. Amuk hediya, endà mepigtamayan di duu kita.”

¹⁰ Na, hinaa i Nemula sa binaelan da egoh da mig-iniyug sa medaet adat da. Huenan di, nepelumanan sa penemdem di owoy endà igpetuu di duu sa mekelimedang kepigtamay di kenagda, apiya di pa iya sa igpetulon di diyà si Honas.