2
1 Na, mig-ikagi Datù Nemula i denu sa tanà Moab, guwaen di, “Medoo dé gulê sa kebael da salà sa medoo etaw tegeMoab. Huenan di, endà dé mekepeuloy ku duu sa salà da, dodoo pigtamayan ku kagda. Apiya sa medoo tuelan sa datù tegeIdom daen, inulow da doo taman sa egoh di nebaluy abuh. 2 Huenan di, peudanan ku apuy sa tanà Moab anì meulow sa medoo kutà diyà sa menuwa Keliot. Hê, sa medoo etaw tegeMoab, mematay da danà gila ligò sa medoo sundalu egpetibos owoy eghiyupen da ma sa tegbuli da. 3 Imatayan ku sa datù tegeMoab lapeg sa langun salu di. Aken si Datù Nemula sa eg-ikagi ini i.”
Ini Sa Kepigtamay I Nemula Diyà Sa Medoo TegeHuda
4 Na, mig-ikagi Datù Nemula i, guwaen di, “Medoo dé gulê sa kebael da salà sa medoo tegeHuda. Huenan di, endà dé mekepeuloy ku duu sa salà da, dodoo pigtamayan ku kagda. Pineulan da sa medoo uledin ku owoy endà ma pinangunutan da duu sa igsugù ku. Neakalan da danà sa medoo nemula-mula egpenemulawen sa medoo tupù da egoh anay. 5 Huenan di, peudanan ku apuy sa tanà Huda anì meulow sa medoo kutà diyà sa menuwa Hélusalém.”
Ini Sa Kepigtamay I Nemula Diyà Sa Medoo TegeIslaél
6 Na, mig-ikagi Datù Nemula i, guwaen di, “Medoo dé gulê sa kebael da salà sa medoo etaw tegeIslaél. Huenan di, endà dé mekepeuloy ku duu sa salà da, dodoo pigtamayan ku kagda. Dinagang da sa medoo etaw épê metiengaw adat anì meudipen da danà da daa endà egpekebayad sa utang da. Apiya di pa tukééy daa sa utang da lagà sa sebaen bakiyà daa, dinagang da doo sa medoo pubeli anì meudipen da. 7 Eg-utuhan da sa medoo etaw endà duen egkegaga lagà daa kepung tanà, owoy endà egsagipaen da duu sa ketuu sa medoo etaw egkepasangan. Egsumbungen da sa mapulù ngadan ku enù ka duen sa etaw teleanak eg-inumawen lawa da sa sebaen daa bayi. 8 Apiya diyà sa liyu sa kenà da egsimbà, igsagpi da doo eghibat sa medoo kawal igsandà sa etaw nekeutang diyà kenagda. Owoy diyà sa dalesan kenà da egsimbà diyà sa nemula da, eg-inemen da sa wain nekuwa da diyà sa etaw pinesalà da.
9 “Dodoo taa yu sa binaelan ku diyà sa medoo etaw ku. Pinedaetan ku sa medoo tegeAmoliya egoh sa medoo etaw ku anay migtebow diyà siini tanà. Apiya di pa éhê kehagtaw sa kayu sidelo sa tegeAmoliya owoy lagà da sa ketegas sa kayu ensina, pinedaetan ku doo sa bunga da owoy sa dalid da ma. 10 Linaun ku kiyu kedu diyà sa tanà Igiptu, owoy inuwit ku ma kiyu mig-ukit diyà sa melabel tanà mediyù dalesan taman epat pulù gepalay anì mekebegay ku diyà keniyu sa tanà sa medoo tegeAmoliya. 11 Hinemilì ku sa duma anak yu maama anì mebaluy da tegesugkow sa kagi ku, owoy hinemilì ku ma sa liyu anak yu maama anì mebaluy da etaw Nasalo.a O medoo tegeIslaél, netiigan yu doo tuu ini i. Aken si Datù Nemula sa eg-ikagi ini i. 12 Dodoo pineinem yu wain sa etaw Nasalo anì meketipay da sa uledin ku, owoy hinawidan yu ma sa medoo tegesugkow kagi ku anì endà tumulon da sa igpeikagi ku.
13 “Huenan di, tuméen ku dé kiyu, lagà sa kalitun nekelebeng diyà tanà danà di mebegat sa lulan di éhê palay. 14 Apiya di pa sa metéél lumetu, endà doo mekepelaguy di, owoy mekedanan ma bagel sa medoo mebekal. Apiya sa sundalu, endà doo mealukan di duu sa hagdi munoy lawa. 15 Apiya sa metagleng egpanà, mekeesud-esud doo. Apiya sa metéél egletu, endà ma doo mekepelaguy di, owoy apiya sa etaw migkudà, endà ma doo mekelesò di. 16 Asal meuma iya wé agdaw, apiya sa tigtu mebalaw sundalu, metangtang sa kinemkem di amuk melaguy. Aken si Datù Nemula sa eg-ikagi ini i.”