Amos 3

¹ Na, o medoo tegeIslaél, dinegdineg yu siini kagi tinulon i Datù Nemula denu keniyu i langun etaw linaun di kedu diyà sa tanà Igiptu. ² Guwaen di, “Na, kiyu daa sa etaw hinemilì ku diyà sa langun balangan etaw diyà siini sinukub langit. Huenan di, pigtamayan ku doo kiyu danà sa medoo salà yu.”

Ini Denu Sa Galebek Sa Tegesugkow Sa Kagi I Nemula

³ Na, endà meseunut sa duwa etaw mipanaw amuk endà muna da neseenggat. ⁴ Endà uminigel sa liyun diyà sa ketalunan amuk endà duen sa hemueden di hinaa di. Owoy endà ma uminigel sa anak liyun diyà sa kenà di liyu daa amuk egdaes. ⁵ Endà gapenen litag sa manuk ketalunan amuk endà duen sa epan di. Owoy endà ma mepekas sa litag amuk endà duen sa mekas. ⁶ Melimedangan doo sa medoo etaw amuk dinegen da sa tegbuli diyà sa menuwa da enù ka iya sa tandà di dumuen sa gila. Endà duen sa mekepesu mebaelan diyà sa sebaen menuwa liyu daa amuk beken si Datù Nemula sa migbael.

⁷ Tuu ma doo, endà duen sa egbaelan i Datù Nemula amuk endà muna di duu ipetiig diyà sa medoo etaw di atung tegesugkow sa kagi di.

⁸ Mig-inigel dé sa liyun, huenan di nelimedangan sa langun etaw. Na, mig-ikagi dé Datù Nemula i, huenan di endà mebaluy di amuk umeked sa etaw sumugkow sa kagi di.

Ini Denu Sa Kepigtamay I Nemula Diyà Sa Menuwa Samaliya

⁹ Na, mig-ikagi Nemula i diyà sa tegesugkow sa kagi di, guwaen di, “Ikagiyi ko sa medoo ulu-ulu diyà sa menuwa Asdod owoy diyà sa tanà Igiptu anì mesetipon da dutu siedò getan-getan nekeulingut diyà sa menuwa Samaliya anì sugpayalen da sa dakel keseginaluway owoy sa medoo balangan medaet binaelan etaw dahiya.”

¹⁰ Mig-ikagi Datù Nemula i, guwaen di, “Endà netiigan siini medoo etaw duu sa mepion egbaelan da. Nepenù sa medoo dalesan da sa medoo langun taman linampas da. ¹¹ Huenan di, seulingutan sa medoo kuntelà da sa tanà da. Gubalen da ma sa medoo kutà diyà sa menuwa da, owoy lampasen da ma sa medoo langun taman diyà sa medoo dalesan da. Aken si Datù Nemula sa eg-ikagi ini i.”

¹² Ini sa kagi i Datù Nemula, guwaen di, “Amuk umaluk hedem sa tegeipat kebilibili sa kebilibili di hinemued sa liyun, iya daen sa nepeka di sa duwa lisen owoy sa telinga di. Hediya ma, mealukan doo sa medoo tegeIslaél eg-ugpà diyà Samaliya, dodoo iya daen sa mekuwa da sa lisen bangkù owoy sa bekut kamah daa.”

¹³ Mig-ikagi Datù Nemula i, sa Nemula épê dakel egkegaga, guwaen di diyà kenak, “Dinegdineg ko ini i, owoy sasai ko diyà sa medoo tugod i Hakob. ¹⁴ Amuk meuma sa agdaw egoh ku migtamay sa medoo tegeIslaél danà sa salà da, pedaetan ku sa medoo atung kenà da eg-ulow sa ibegay da diyà sa egpenemulawen da diyà sa menuwa Bétél. Apiya sa éhê palas sidung diyà sa epat pisuk sa kenà da eg-ulow sa igbegay da, metepù doo owoy menabù ma diyà tanà. ¹⁵ Gubalen ku sa medoo dalesan atung kenà da mugpà amuk sasang megenaw owoy sa medoo dalesan atung kenà da mugpà amuk sasang meedup. Gubalen ku ma sa medoo metolol dalesan da, owoy anan medaetan sa medoo dakel dalesan da. Aken si Datù Nemula eg-ikagi ini i.”