Amos 1

AMOS

Ini Sa Edungan Kagi I Amos

¹ Na, ini sa kagi i Amos sa sebaen tegeipat kebilibili diyà sa menuwa Tékuwa egoh i Hosiya sa datù diyà sa tanà Huda owoy si Héloboam anak i Hoas sa datù diyà sa tanà Islaél. Egoh di duwa gepalay pa sa egoh di nekeuma sa linug, igpehaa i Nemula diyà si Amos langun ini i denu sa medoo tegeIslaél.

² Mig-ikagi Amos i, guwaen di, “Petaled umikagi Datù Nemula i kedu diyà sa Getan Siyon, owoy mekeseluh sa kagi di kedu diyà sa menuwa Hélusalém. Kumegangu sa medoo keluwen diyà sa kenà egpetabtab hinagtay, owoy lumegupay ma sa medoo keluwen diyà sa getan Kalmél.”

Ini Sa Kepigtamay I Nemula Diyà Sa Medoo Balangan Tanà Medapag Diyà Islaél

³ Na, mig-ikagi Datù Nemula i denu sa tanà Siliya, guwaen di, “Medoo dé gulê sa kebael da salà sa medoo etaw diyà sa menuwa Damasko. Huenan di, endà dé mekepeuloy ku duu sa salà da, dodoo pigtamayan ku kagda. Tigtu egpelihayen da sa medoo etaw eg-ugpà diyà sa tanà Galaad. ⁴ Huenan di, peudanan ku apuy sa metolol dalesan binaelan i Datù Hasawél diyà siedò kutà i Datù Bénadad. ⁵ Lukaten ku sa pakel sa bengawan diyà sa menuwa Damasko, owoy kedanan ku sa medoo etaw eg-ugpà diyà sa Sugud Aben owoy sa ulu-ulu diyà sa menuwa Bétédén. Mesigkem sa medoo etaw tegeSiliya anì mekeangay da diyà sa tanà Kil. Aken si Datù Nemula sa eg-ikagi ini i.”

⁶ Na, mig-ikagi Datù Nemula i denu sa tanà Pilistiya, guwaen di, “Medoo dé gulê sa kebael da salà sa medoo etaw diyà sa menuwa Gasa. Huenan di, endà dé mekepeuloy ku duu sa salà da, dodoo pigtamayan ku kagda. Sinigkem da sa langun etaw diyà sa sebaen balangan tanà owoy dinagang da diyà sa medoo tegeIdom anì meudipen da. ⁷ Huenan di, peudanan ku apuy sa kutà sa menuwa Gasa anì meulow sa langun kutà di apiya di pa megamel. ⁸ Kedanan ku sa medoo ulu-ulu diyà sa menuwa Asdod owoy sa datù diyà sa menuwa Askelon. Pigtamayan ku sa menuwa Ikelon, taman sa egoh di meimet mematay sa medoo tegePilistiya nesamà. Aken si Datù Nemula sa eg-ikagi ini i.”

⁹ Na, mig-ikagi Datù Nemula i denu sa tanà Tilo, guwaen di, “Medoo dé gulê sa kebael da salà sa medoo etaw tegeTilo. Huenan di, endà dé mekepeuloy ku duu sa salà da, dodoo pigtamayan ku kagda. Sinigkem da sa medoo etaw diyà sa medoo dakel menuwa owoy dinagang da diyà sa medoo tegeIdom anì meudipen da dutu. Owoy endà ma pinangunutan da duu sa nesepasadan binaelan da denu sa keseloyukay. ¹⁰ Huenan di, peudanan ku apuy sa kutà sa menuwa Tilo anì meulow sa langun kutà di.”

¹¹ Na, mig-ikagi Datù Nemula i denu sa tanà Idom, guwaen di, “Medoo dé gulê sa kebael da salà sa medoo etaw tegeIdom. Huenan di, endà dé mekepeuloy ku duu sa salà da, dodoo pigtamayan ku kagda. Eglohoten da tumigbas sa medoo duma da tegeIslaél owoy endà duen sa kehidu da. Endà duen taman sa kebulit da, owoy endà ma egsabuhan da duu. ¹² Huenan di, peudanan ku apuy sa menuwa Timan owoy meulow ma sa medoo kutà sa menuwa Basela.”

¹³ Na, mig-ikagi Datù Nemula i denu sa tanà Amon, guwaen di, “Medoo dé gulê sa kebael da salà sa medoo etaw tegeAmon. Huenan di, endà dé mekepeuloy ku duu sa salà da, dodoo pigtamayan ku kagda. Egoh da migpengayaw anì kumelabel sa tanà sakupen da, binaelan da sa medoo medaet diyà sa tanà Galaad enù ka iglapeg da sa medoo bayi obol inebuan da sundang sa getek da. ¹⁴ Huenan di, peudanan ku apuy sa kutà sa menuwa Laba anì meulow sa medoo kutà di apiya di pa megamel. Agulé metibos sa medoo kuntelà da amuk meuma iya wé agdaw da mengayaw lagà kedugsuk sa sepuk neamutan kelamag siling. ¹⁵ Mesigkem sa datù da tegeAmon lapeg sa medoo ulu-ulu da anì mekeangay da mediyù dò. Aken si Datù Nemula sa eg-ikagi ini i.”