2
Ini Sa Egoh I Isikiyél Nebaluy Tegesugkow Kagi I Nemula
1 Na, duen sa eg-kagi diyà kenak, guwaen di, “O anak etaw daa diyà tanà, tigdeg ka enù ka duen sa ikagiyen ku diyà keniko.” 2 Hê, egoh di eg-ikagi diyà kenak, linuhub a sa Suguy i Nemula owoy pinetigdeg di aken. Agulé mig-uman eg-ikagi diyà kenak, 3 guwaen di, “O anak etaw daa diyà tanà, suguen ku kuna mangay diyà sa medoo tegeIslaél sa medoo etaw metegas egtuluen. Kagda owoy sa medoo tupù da, anan da migtipay diyà kenak taman ini egoh di. 4 Metegas sa ulu da owoy endà ma eg-adat da diyà kenak. Dodoo peangayen ku kuna diyà kenagda, owoy tulon ko diyà kenagda sa ipeikagi ku, aken i Datù Nemula. 5 Amuk hediya, metiigan da duen doo sa tegesugkow kagi i Nemula diyà kenagda, iling ka duminegdineg da ataw ka endà, enù ka kagda sa metegas egtuluen. 6 Dodoo kuna, o anak etaw daa diyà tanà, yaka egkelimedangan na diyà kenagda, apiya di pa limedangen da kuna owoy apiya di pa lagà ka neketeliwadà diyà sa sepinitpinit owoy lagà ka mig-ugpà diyà sa kenà sa medoo menipit. Yaka egkelimedangan na diyà sa medoo ikagiyen da ataw ka diyà sa palas da, enù ka kagda sa metegas egtuluen. 7 Tulon ko sa medoo kagi ku diyà kenagda, iling ka duminegdineg da ataw ka endà, enù ka kagda sa metegas egtuluen. 8 Dodoo kuna, o anak etaw daa diyà tanà, dinegdineg ko sa eg-ikagiyen ku diyà keniko. Yaka egpetegas sa niko ulu lagà sa hagda. Ginganga ka owoy kaen ko sa ibegay ku diyà keniko.”