3
1 Agulé mig-ikagi dema Nemula i diyà kenak, guwaen di, “O anak etaw daa diyà tanà, kaen ko siini kalatas dinilin, agulé angay ka ikagi diyà sa medoo tegeIslaél.” 2 Huenan di migginganga a, owoy igbegay di diyà kenak sa kalatas dinilin anì kaenen ku. 3 Agulé mig-ikagi diyà kenak, guwaen di, “O anak etaw daa diyà tanà, kaen ko anì mebesug ka.” Huenan di, kinaen ku owoy éhê keemis teneb sa nanam di.
4 Agulé mig-ikagi dema diyà kenak, guwaen di, “O anak etaw daa diyà tanà, angay ka diyà sa medoo tegeIslaél owoy ikagi ko diyà kenagda sumalà dé sa ipeikagi ku diyà keniko. 5 Endà peangayen ku duu kuna diyà sa medoo etaw endà mesabutan ko duu sa kagi da, dodoo peangayen ku polo kuna diyà sa medoo duma ko tegeIslaél. 6 Endà peangayen ku duu kuna diyà sa medoo balangan etaw liyu kagi endà mesabutan ko duu. Amuk peangayen ku kuna diyà kenagda, dingdinegen da doo sa eg-ikagiyen ko. 7 Dodoo sa medoo tegeIslaél peangayan ku keniko, endà dinegdinegen da duu sa eg-ikagiyen ko. Apiya aken, endà egsagipaen da duu, enù ka anan da metegas ulu owoy mebagel lingoyen da. 8 Dodoo pebagelen ku sa pedu ko owoy petegasen ku ma sa ulu ko lagà sa hagda. 9 Pelagaen ku ketegas sa batu sangilan sa ketegas sa ulu ko. Huenan di, yaka egkelimedangan na diyà kenagda owoy yaka egpesu ya diyà sa palas da, enù ka kagda sa metegas egtuluen.”
10 Mig-uman eg-ikagi Nemula i diyà kenak, guwaen di, “O anak etaw daa diyà tanà, dinegdineg ka owoy tagui ko diyà sa pedu ko sa langun eg-ikagiyen ku diyà keniko. 11 Agulé angay ka diyà sa medoo tegeIslaél duma ko neseunut nesigkem owoy tulon ko diyà kenagda sa kagi ku, aken i Datù Nemula, iling ka duminegdineg da ataw ka endà.”