34
Ini Sa Keolò Denu Sa Dakel Kehidu I Nemula
1 Pesalamat a takà diyà si Datù Nemula, owoy endà ma sumabuh a umolò kenagdi. 2 Si Datù Nemula daa sa pedakelen ku danà sa medoo mepion binaelan di. Na, o medoo etaw egkepelihay, dinegdineg yu owoy keanggan yu ma. 3 Peunut yu diyà sa keolò ku si Datù Nemula owoy sesebaenay ki umolò sa mapulù ngadan di.
4 Migsimbà a diyà si Datù Nemula owoy sinagbian di aken, enù ka kinedanan di sa langun kekelimedang ku. 5 Meanggan sa etaw petabang diyà si Nemula, owoy endà ma duen sa pesuwan da memala. 6 Endà duen sa liyu etaw meketabang kenak, huenan di eg-umow a diyà si Datù Nemula. Hê, sinagbian di owoy inalukan di ma aken diyà sa langun kelikutan ku. 7 Enù ka sa egsugùsuguen i Nemula sa egtulik sa medoo etaw épê kekelimedang diyà si Nemula, owoy alukan di ma kagda amuk duen sa kelikutan da.
8 Tepengi yu anì hauwen yu amuk mepion Datù Nemula i. Tigtu meanggan sa etaw egsalig diyà kenagdi. 9 Adati yu Nemula i, kiyu i medoo etaw di, enù ka endà duen kulang sa etaw eg-adat kenagdi. 10 Apiya sa liyun, duen doo sa egoh da egkeimetan kaenen owoy egpeketues da ma. Dodoo sa etaw egsalig diyà si Nemula, endà dumuen sa kulang di diyà sa mepion hagtay di.
11 O medoo loyuk ku batàbatà pelà, angay yu dinegdineg diyà kenak, enù ka itulù ku diyà keniyu sa ukit yu eg-adat diyà si Nemula. 12 Amuk eg-ungayà yu sa mepion hagtay yu owoy sa lalù endà meelut di owoy sa kekeanggan yu, 13 ini sa baeli yu. Tulik yu anì endà mekeikagi yu medaet owoy yoko ma egbutbut ta. 14 Ekedi yu sa medaet egbaelan. Dodoo baeli yu polo sa mepion, owoy udesi yu ma sa melanih keugpà yu.
15 Tulikan i Datù Nemula sa etaw egbael mepion owoy dinegen di ma sa keingonoy da. 16 Dodoo egkuntelaen di sa medoo etaw tegebael medaet, huenan di melipengan dé sa medoo etaw diyà tanà kagda amuk mematay da.
17 Amuk eg-ingonoy da diyà si Datù Nemula sa medoo etaw egbael mepion, dinegen di kagda owoy alukan di ma diyà sa langun kelikutan da. 18 Medapag Nemula i diyà sa medoo etaw egkedaet pedu, owoy alukan di ma sa medoo etaw tigtu negulub kelikutan.
19 Medoo sa kelikutan egkehaa sa metiengaw etaw, dodoo si Datù Nemula doo sa umaluk kenagda diyà sa langun kelikutan da. 20 Enù ka tigtu eg-ipaten i Nemula, owoy endà duen sa sebaen tuelan da metepù.