27
Ini Denu Sa Kesalig Ta Diyà Si Nemula
1 Si Datù Nemula sa legdaw ku owoy sa tegealuk ku ma, huenan di endà duen sa egkelimedangan ku. Si Datù Nemula sa tigtu eg-ipat kenak, huenan di endà duen sa egpesuwan ku.
2 Amuk pengayawen a sa medoo etaw tegebael medaet owoy imatayan da aken hedem, kagda polo sa mekedagsà owoy sa mematay. 3 Apiya di pa seulingutan a sa medoo sundalu, endà doo melimedangan a. Owoy apiya di pa gebeken da aken, tapay a doo sumalig diyà si Nemula.
4 Sebaen daa sa egpegeniyen ku diyà si Datù Nemula sa egoh ku mekeugpà diyà sa dalesan di taman sa egoh ku nehagtay, anì takaan ku menemdem sa tigtu mepion adat di owoy sumimbà a ma diyà sa metolol dalesan di. 5 Enù ka ipaten di aken amuk meuma sa sasang medaet. Ilidung di aken diyà sa dalesan di owoy lagà peugpaen di aken diyà sa mehagtaw getan anì endà meuma a sa medaet. 6 Huenan di, petabanen di aken diyà sa medoo kuntelà ku nekeulingut diyà kenak. Agulé mekeunut sa kepetibos ku egkeanggan diyà sa kebegay ku sa medoo hinagtay eg-ulowen diyà sa Dalesan i Nemula. Duyuyen ku Datù Nemula i owoy oloen ku ma.
7 O Datù Nemula, dinegdineg ka amuk eg-umowen ku kuna. Hiduwi ko aken owoy sagbì ka ma. 8 Enù ka iya sa kagi ko, guwaen ko, “Pedapag yu owoy simbà yu diyà kenak.” Huenan di, migsagbì a, guwaen ku, “O Datù Nemula, pedapag a doo diyà keniko.” 9 Yaka eglidungan kenak amuk egpengauwen ku kuna. Yaka egbulit kenak, owoy yaka ma eg-iniyugan kenak, aken i egsuguen ko, enù ka kuna sa atung egtabang diyà kenak. Yaka eg-eked kenak owoy yaka ma egpandayà kenak, enù ka kuna, o Nemula, sa tegealuk kenak. 10 Apiya di pa pandayaen a sa emà ku owoy sa inay ku, si Nemula doo sa umipat kenak.
11 O Datù Nemula, tului ko diyà kenak sa mepion egbaelan ku owoy pehauwi ko diyà kenak sa dalan metudà, enù ka medoo sa kuntelà ku egpengaa sa kenà ku medaetan. 12 Yaka egpandayà duu sa kebael da medaet diyà kenak, enù ka medoo sa butbuten egtipu kenak owoy egpelihayen da ma aken. 13 Dodoo netiigan ku doo, o Datù Nemula, kuna sa umaluk kenak anì hauwen ku sa dakel kehidu ko kenak egoh ku nehagtay pelà diyà tanà.
14 Na, salig yu diyà si Datù Nemula. Pebagel yu sa pedu yu owoy yoko egkelimedangan na. Salig yu daa diyà si Datù Nemula.