<<    <   Denu Sa Medoo Datù 18   >    >> 
18
Ini Sa Egoh I Iliyas Mig-ikagi Diyà Si Abdiyas
1 Na, egoh di meuma sa ketelu di gepalay sa lugay pengagdaw, mig-ikagi Datù Nemula i diyà si Iliyas. Guwaen di, “Angay ka diyà si Datù Akab, enù ka buyu dé peudanen ku.” 2 Hê, mig-ipanaw dé Iliyas i enù ka mangay diyà si Akab.
Na, egoh iya, tigtu dakel sa bitil diyà sa tanà Samaliya. 3 Huenan di, igsasà i Datù Akab Abdiyas i sa atung umipat sa dalesan di. Na, tigtu egpigtuu Abdiyas i diyà si Datù Nemula. 4 Ini sa tandà di, egoh i Hésabil sawa i Datù Akab egpeimatay sa medoo tegesugkow kagi i Nemula, inalukan i Abdiyas sa melatuh geetaw tegesugkow kagi i Nemula owoy pinelidung di kagda tiglimaway pulù diyà sa duwa dakel takub. Owoy binegayan di ma kagda kaenen owoy wayeg. 5 Na, mig-ikagi Akab i diyà si Abdiyas, guwaen di, “Mipanaw ki mangay tumelow sa langun tebulan wayeg owoy sa medoo lawa’t wayeg diyà siini uwang tanà Samaliya. Petow ki daa mekehaa ki sa medoo keluwen anì mehagtay sa medoo kudà ta owoy sa medoo asnu ta selubangig kudà anì endà imatayan ta duu.” 6 Agulé nesesuway da owoy sineluh da egtimbul sa uwang tanà Samaliya.
7 Na, egoh i Abdiyas telibubu eg-ipanaw, petow dé nesiegungan di Iliyas i owoy nekilala di. Hê, miglagkeb diyà tanà, owoy mig-ikagi, guwaen di, “Aba, si Datù Iliyas polo ini i.”
8 Mig-ikagi Iliyas i, guwaen di, “Hoò, aken. Na, angay ko tuloni sa datù ko sa egoh ku dahini a.”
9 Dodoo mig-ikagi Abdiyas i, guwaen di, “O Datù, ngadan sa salà binaelan ku sa pesuwan ko egpeimatay kenak diyà si Datù Akab? 10 Ipengibet ku danà di melalù Datù Nemula i, sa Nemula egpigtuuwen ko, endà duen sa sebaen tanà diyà siini sinukub langit kenà i Akab endà egpelagbet keniko. Uman tumulon sa medoo datù inigsaan di endà diyà ka sa hagdi uwang tanà, endà egpigtuuwen i Akab duu, huenan di pinepengibet di kagda amuk tuu endà hinaa da duu kuna. 11 Enù di ya, suguen ko aken ini egoh di anì tulonen ku diyà kenagdi sa egoh ko dahini ka? 12 Amuk mesalidan ku kuna, petow ki daa uwiten ka sa Suguy i Datù Nemula diyà sa kenà endà nepatik ku duu, agulé amuk tulonon ku Akab i sa egoh ko dahini owoy amuk endà mehaa di duu kuna, imatayan di doo aken. Na, pehiduhidu a diyà keniko, enù ka aken ma sa tigtu egpigtuu diyà si Datù Nemula edung egoh ku batà pelawà taman ini egoh di. 13 Endà netiigan ko duu kéen duen sa melatuh tegesugkow kagi i Datù Nemula inalukan ku egoh i Hésabil egkelukuy mimatay kenagda. Pinelidung ku kagda tiglimaway pulù diyà sa duwa dakel takub, owoy egbegayan ku ma kagda kaenen owoy wayeg. 14 Enù di ya, suguen ko aken petulon diyà si Akab sa egoh ko dahini ka? Imatayan di doo aken.”
15 Agulé migsagbì Iliyas i, guwaen di, “Endà mebaelan ko iya wé. Ipengibet ku danà di melalù Datù Nemula i sa Nemula épê dakel egkegaga egpangunutan ku, pehaa a doo diyà si Datù Akab ini egoh di.”
Ini Sa Egoh I Iliyas Migsigbolow Sa Medoo Tegesugkow Kagi I Baal
16 Na, mig-angay Abdiyas i diyà si Datù Akab owoy tinulon di sa egoh i Iliyas dahiya dé. Hê, medelamet Akab i eg-angay egtelabuk si Iliyas sa tegesugkow kagi i Nemula. 17 Agulé egoh da nesehaa, mig-ikagi Akab i, guwaen di, “Kuna doo mabes sa tegebogo diyà siini tanà Islaél.”
18 Migsagbì Iliyas i, guwaen di, “Beken aken sa takà egbogo diyà sa tanà Islaél, dodoo kuna polo owoy sa malayan i emà ko, enù ka tinipay yu sa medoo uledin i Datù Nemula owoy egpenemulawen yu ma sa medoo Baal. 19 Na, setipon ko diyà sa getan Kalmél sa langun tegeIslaél owoy sa epat gatus lima pulù geetaw tegesugkow kagi i Baal gaa owoy sa epat gatus ma tegesugkow kagi i Astolot gaa sa egsegastuwan sa sawa ko si Hésabil.”
20 Huenan di, sinetipon i Akab diyà sa getan Kalmél sa langun tegeIslaél owoy sa medoo tegesugkow kagi i Baal owoy tegesugkow sa kagi i Astolot ma. 21 Egoh da nesetipon dé, mig-angay Iliyas i diyà sa taengan da, owoy mig-ikagi, guwaen di, “Ngadan pa lugay sa pedu yu egkeduwa? Amuk si Datù Nemula sa tigtu Nemula, kagdi daa sa pangunuti yu. Dodoo amuk si Baal polo sa tigtu Nemula, mebaluy kagdi sa mepangunutan yu.”
Dodoo endà egpekesagbì sa medoo etaw. 22 Agulé mig-ikagi dema Iliyas i, guwaen di, “Aken daen sa tegesugkow kagi i Datù Nemula nesamà. Dodoo si Baal, epat gatus lima pulù geetaw sa tegesugkow kagi di gaa. 23 Huenan di, begayi yu diyà kenami sa duwa tudu sapì. Ipehemilì ku diyà kenagda sa hagda imatayan, owoy sapuen da ma, agulé itenà da diyà sa medoo kayu inuhu da, dodoo endà pedeketan da duu apuy. Hediya ma sa kebael ku sa sebaen sapì. Itenà ku ma diyà sa medoo kayu inuhu ku, dodoo endà ma pedeketan ku duu apuy. 24 Amuk meubus iya wé, umow yu sa nemula yu. Hediya ma sa naken kebael, umowen ku ma Datù Nemula i. Agulé sumalà dé sa sumagbì pineukit diyà sa apuy, metiigan ta kagdi sa tigtu Nemula.”
Migsagbì sa langun etaw, guwaen da, “Hoò, baelan ta iya wé.”
25 Agulé mig-ikagi Iliyas i diyà sa medoo tegesugkow kagi i Baal, guwaen di, “Danà di medoo yu kiyu i, huna yu hemilì sa egkeiyapan yu diyà siini duwa tudu sapì. Agulé tapay yu dé baeli owoy tenai yu diyà sa medoo kayu inuhu yu dodoo yoko egpedeketan duu apuy. Umow yu polo diyà sa nemula yu anì petow dé dumuen apuy diyà sa inuhu yu.” 26 Agulé kinuwa da sa sebaen tudu sapì owoy tinapay da dé egsapù. Edung magtu kesimag taman nekebugsang, takà da egsimbà diyà sa Baal sa egpenemulawen da, guwaen da, “O Baal, dinegdineg ko kami.” Pinetaled da sa kagi da, owoy takà da ma egdelayaw egoh da migseulingutan sa atung kenà da eg-ulow sa ibegay da diyà sa Baal. Dodoo endà duen sa egsagbì kenagda, owoy endà ma duen sa eghauwen da apuy.
27 Agulé egoh di nekebugsang dé, egpelononon i Iliyas kagda, guwaen di, “Uman yu pa petaled sa kagi yu, enù ka kagdi gaa sa nemula. Egkelakà kéen danà sa liyu egbaelan di, ataw ka eg-ipanaw kéen, ataw ka egtudug kéen huenan di peenaw yu doo.” 28 Hê, inuman da dema egpetaled sa keikagi da. Owoy pinalian da sigpù owoy sundang sa lawa da enù ka iya sa adat da. Huenan di, neseluh depanug sa lawa da. 29 Takà da egpetaled eg-umow taman sa egoh di egketeliwadaan egpenaug sa agdaw egoh di neuma dé sa atas kebegay sa medoo etaw diyà si Datù Nemula. Dodoo tapay doo endà duen sa egdinegen da egsagbì diyà kenagda owoy endà ma duen sa eghauwen da apuy.
30 Agulé mig-ikagi Iliyas i diyà sa langun etaw dahiya, guwaen di, “Angay yu dapag diyà kenak.” Hê, nesetipon da langun diyà kenagdi. Agulé inupion di sa atung kenà da eg-ulow sa ibegay da diyà si Datù Nemula enù ka nelugay dé nelukat. 31 Kinuwa di sa sepulù owoy duwa batu anì tandaan di sa sepulù owoy duwa geumpung tugod sa medoo anak i Hakob, sa maama pinengadanan i Datù Nemula si Islaél.a 32 Danà siedò medoo batu, binaelan di sa atung kenà da eg-ulow sa ibegay da diyà si Datù Nemula. Agulé kinakalan di ulingut anì meawuhan wayeg duwa pulù kalitelu. 33 Agulé inuhu di sa medoo kayu diyà sa atung kenà da eg-ulow sa ibegay da diyà si Nemula. Hê, inimatayan di sa sebaen tudu sapì, agulé sinapù di owoy igtenà di diyà sa medoo kayu inuhu. Agulé sinugù di sa duma etaw, guwaen di, “Angay yu penù wayeg sa epat buyung owoy hudud yu diyà siini ibegay ta diyà si Nemula, lapeg sa medoo kayu inuhu.” Hê, iya sa binaelan da. 34 Agulé mig-ikagi dema Iliyas i, guwaen di, “Uman yu dé.” Hê, binaelan da dema. Agulé mig-ikagi Iliyas i, guwaen di, “Segulê yu pa baeli.” Hê, telu gulê hinududan da wayeg sa ibegay da diyà si Nemula, 35 taman migdelug sa wayeg diyà sa kilidan di owoy nepenù wayeg sa kakal nekeulingut diyà sa atung kenà da eg-ulow sa ibegay da diyà si Nemula.
36 Na, egoh di neteliwadaan dé egpenaug sa agdaw egoh di neuma sa atas kebegay da diyà si Datù Nemula, mig-angay egtigdeg Iliyas i diyà sa taengan sa atung kenà da eg-ulow sa ibegay da diyà si Nemula owoy migsimbà, guwaen di, “O Datù Nemula, sa Nemula egpigtuuwen da i Ablaham si Isak owoy si Hakob, petiigi ko ini egoh di kuna sa tigtu Nemula diyà sa tanà Islaél owoy petiigi ko ma aken sa etaw ko migbael langun ini i danà sa igsugù ko kenak. 37 O Datù Nemula, sagbii ko ini i igsimbà ku anì metiigan siini medoo etaw kuna daa sa tigtu Nemula owoy anì metiigan da ma pepelikuen ko kagda ini egoh di anì mangunut da dema diyà keniko.”
38 Hê, petow dé migtenà sa apuy i Datù Nemula anì meulow iya wé igbegay da. Neulow ma sa kayu owoy netunag ma sa medoo batu owoy nekeling ma sa tanà owoy neeti ma sa wayeg diyà sa kakal nekeulingut. 39 Na, egoh sa medoo etaw mighaa iya wé, miglagkeb da diyà tanà owoy mig-ikagi da, guwaen da, “Si Datù Nemula sa tigtu Nemula. Si Datù Nemula daa sa tigtu Nemula.”
40 Agulé sinugù i Iliyas kagda, guwaen di, “Sigkem yu dé sa medoo tegesugkow kagi i Baal. Apiya sebaen, endà duen sa pepelaguyen ta.” Hê, sinigkem da kagda langun. Agulé inuwit i Iliyas eg-angay diyà sa wayeg Kison. Agulé igpeimatay di kagda dahiya.
Ini Sa Egoh Di Eg-udan Dema
41 Na, mig-ikagi Iliyas i diyà si Datù Akab, guwaen di, “Angay yu dé kaen enù ka egdinegen ku sa pegawpaw sa udan.” 42 Hê, mig-angay Akab i egkaen. Dodoo si Iliyas, mig-uman egtekedeg diyà sa lantung Kalmél. Migligkued diyà tanà owoy miglusuk taman nekeuma sa kilay di diyà sa lulud di enù ka migsimbà diyà si Nemula. 43 Agulé mig-ikagi Iliyas i diyà sa egsugùsuguen di, guwaen di, “Tekedeg ka pa uman, angay ka sugpayal denu dagat.”
Hê, migtekedeg uman sa egsugùsuguen di owoy migsugpayal. Egoh di migpelikù, guwaen di, “Endà duen sa eghauwen ku dutu.” Na, taman pitu gulê anan hediya sa kesugù i Iliyas sa egsugùsuguen di. 44 Agulé egoh sa kepitu di gulê sa kesugpayal sa egsugùsuguen di, mig-umow, guwaen di, “Duen sa eghauwen ku tukééy gaeb éhê kelabel kagpa belad kedu diyà dagat eg-angay diyà awang.”
Agulé sinugù i Iliyas sa egsugùsuguen di, guwaen di, “Téél ka dé. Angay ko tuloni Datù Akab i anì tapayen di ipekagat sa kalitun diyà sa kudà anì lumikù anì endà meuma di udan.”
45 Hê, endà iseg di nelugay, egdugkelum sa langit owoy migkeleges ma sa kelamag owoy egtemù ma dé eg-udan. Mig-edà kalitun Akab i anì mapes tumebow dutu Héslil dò. 46 Dodoo tinunungan i Datù Nemula Iliyas i. Agulé igleget di sa melomboy kawal di anì kumetéél lumetu. Hê, egletu Iliyas i egkehunawan di sa kudà eggodoy sa kalitun inedaan i Akab taman sa egoh da nekeuma Héslil dò.