13
Ini Sa Egoh I Nemula Migpigtamay Si Héloboam Danà Sa Salà Di
1 Na, sebaen agdaw duen sa sebaen tegesugkow kagi i Nemula kedu diyà Huda sinugù i Datù Nemula eg-angay Bétél dò. Hê, egoh di migtebow dutu, egsimbà Héloboam i egtigdeg dapag diyà sa atung kenà da eg-ulow. 2 Tinubad sa tegesugkow kagi i Nemula iya wé atung kenà da eg-ulow danà i Datù Nemula egsugù kenagdi. Huenan di, mig-ikagi, guwaen di, “O atung kenà da eg-ulow, dineg ko sa kagi i Datù Nemula. Dumuen sa maama anaken sa sebaen tugod i Datù Dabid owoy iya sa ngadan di si Hosiya. Imatayan di diyà keniko sa medoo tegesimbà atung eg-ipat sa medoo simbaan diyà sa getan-getan, sa medoo tegeimatay hinagtay diyà keniko, owoy ulowen di ma diyà keniko sa medoo tuelan etaw.”a