Denu Sa Medoo Datù 11

Ini Sa Egoh I Salomon Mig-iniyug Diyà Si Nemula

(1 Medoo Datù 11:1-13)

¹ Na, medoo sa bayi kedu diyà sa medoo balangan tanà egkeiyapan i Datù Salomon. Duen sa bayi anak i Palo tegeIgiptu sinawa di, owoy duen ma sa bayi tegeMoab owoy sa bayi tegeAmoniya owoy sa bayi tegeIdom owoy sa bayi tegeSidon owoy sa bayi tegeHétiyo sinawa di. ² Sinawa di kagda apiya di pa hinawidan i Datù Nemula sa medoo tegeIslaél anì endà sawaen da duu sa medoo liyu balangan etaw. Guwaen di, “Yoko egsawa duu sa etaw beken duma yu tugod i Islaél, enù ka enggaten da doo kiyu egpenemula sa medoo liyu egpenemulawen da.” Dodoo egkeiyapan i Salomon polo egsawa siedò medoo bayi. ³ Pitu latuh sa kedoo sawa di anan anak datù, owoy telu latuh ma sa bayi udipen egsehulidhuliden di. Netuing sa pedu i Salomon kedu diyà si Nemula danà sa medoo sawa di.

⁴ Na, egoh i Salomon migkelukes dé, inenggat sa medoo sawa di kagdi egpenemula sa medoo liyu nemula. Huenan di, endà dé meeles sa keunut di diyà si Datù Nemula lagà sa keeles keunut sa emà di si Dabid diyà si Nemula. ⁵ Enù ka migpenemula polo diyà sa inetaw Astalot sa egpenemulawen sa medoo tegeSidon, owoy pinenemula di ma si Milkom sa nemula medaet atul egpenemulawen sa medoo tegeAmoniya. ⁶ Huenan di, nebaelan i Salomon sa medaet diyà sa kehaa i Datù Nemula. Endà dé egkeeles sa keunut di diyà si Nemula lagà sa keunut i Dabid sa emà di diyà si Nemula.

⁷ Agulé diyà sa getan denu tebowon agdaw amuk diyà ki Hélusalém, binaelan i Salomon sa kenà da egpenemula si Kimos sa nemula medaet atul egpenemulawen sa medoo tegeMoab, owoy binaelan di ma sa kenà da egpenemula si Molok sa nemula medaet atul egpenemulawen sa medoo tegeAmoniya. ⁸ Hediya ma, binaelan di ma sa medoo simbaan kenà sa langun sawa di beken etaw tegeIslaél eg-ulow sa mepion ngadeg owoy eg-imatay da ma hinagtay enù ka iya sa ukit da egpenemula sa medoo nemula da.

⁹ Huenan di, binulitan i Datù Nemula Salomon i enù ka ininiyugan di Datù Nemula i sa Nemula egpigtuuwen sa medoo tegeIslaél, owoy endà sinagipà di duu sa duwa gulê kepehaa i Nemula diyà kenagdi. ¹⁰ Apiya di pa hinawidan i Nemula Salomon i egpenemula sa medoo liyu egpenemulawen, endà doo pinangunutan di duu sa igsugù i Datù Nemula. ¹¹ Huenan di, mig-ikagi Datù Nemula i diyà si Salomon, guwaen di, “Danà ko migtipay sa nesepasadan ta owoy danà ko ma endà migpangunut diyà sa medoo igsugù ku keniko, huenan di kedanan ku diyà keniko sa kedatuan ko owoy ibegay ku polo diyà sa sebaen salu ko. ¹² Dodoo danà sa emà ko si Dabid, endà pelawà ipetuu ku duu iya wé egoh ko nehagtay pelawà. Dodoo ipetuu ku pa amuk sa anak ko dé sa kumedatù. ¹³ Na, danà sa dakel kehidu ku si Dabid sa sinaligan ku egoh anay, owoy danà di ma Hélusalém sa menuwa hinemilì ku, huenan di endà kedanan ku duu diyà sa anak ko sa langun kedatuan. Dodoo samaen ku polo sa segeumpung tugod i Islaél kenà sa anak ko kumedatù.”

Ini Sa Egoh I Nemula Migpasad Sa Egoh I Héloboam Kumedatù

(1 Medoo Datù 11:28-33, 36-40)

²⁸ Na, duen sa maama épê egkegaga, si Héloboam. Egoh i Salomon mighaa sa kegelol di eggalebek, igsalig di diyà kenagdi sa langun tegegalebek diyà sa uwang tanà sa medoo tugod i Manasa owoy sa medoo tugod i Ipelaim.

²⁹ Na, sebaen agdaw egoh i Héloboam mig-ipanaw kedu diyà Hélusalém, nesiegungan di Ahiyas i tegeSilo, sa tegesugkow kagi i Nemula. Endà duen sa liyu duma da egoh da nesehaa diyà dalan, owoy duen sa magtu kegal i Ahiyas. ³⁰ Hê, egoh da nesehaa, linengà i Ahiyas sa magtu kegal di owoy sinekisìkisì di sepulù owoy duwa lapin. ³¹ Agulé mig-ikagi diyà si Héloboam, guwaen di, “Na, kuwa ko siini sepulù lapin, enù ka ini sa kagi i Datù Nemula diyà keniko, sa Nemula egpigtuuwen sa medoo tegeIslaél. Medapag dé kedanan i Nemula gaa sa kedatuan i Salomon, owoy ibegay di diyà keniko sa sepulù geumpung tugod i Islaél. ³² Segeumpung daen sa mesamà diyà si Salomon, danà sa dakel kehidu i Nemula si Dabid sa sinaligan di egoh anay owoy danà di ma Hélusalém sa menuwa hinemilì i Nemula diyà sa uwang tanà Islaél. ³³ Iya sa baelan i Nemula enù ka ininiyugan i Salomon Nemula i, owoy neiyapan di polo egpenemula Astalot i sa inetaw éhê palas bayi egpenemulawen sa medoo tegeSidon owoy si Kimos sa egpenemulawen sa medoo tegeMoab owoy si Molok sa egpenemulawen sa medoo tegeAmoniya. Sinekê i Salomon sa uyot i Nemula owoy endà egbaelan di duu sa metiengaw adat diyà sa kehaa i Nemula, owoy endà ma egpangunutan di duu sa medoo uledin i Nemula owoy sa medoo liyu igsugù di, enù ka endà eg-ilingan di duu sa kepangunut sa emà di si Dabid diyà si Nemula egoh anay.”

³⁶ Owoy guwaen i Ahiyas ma, “Na, segeumpung tugod i Islaél daen sa ibegay i Nemula diyà sa anak i Salomon, anì endà mekedan di sa kedatuan diyà sa medoo tugod i Dabid diyà Hélusalém, sa menuwa hinemilì i Nemula kenà ta sumimbà diyà kenagdi. ³⁷ Na, o Héloboam, kuna sa pedatuen i Nemula diyà sa medoo liyu tegeIslaél, owoy kuna ma sa sumabà sa uwang tanà kenà ko egkelukuy kumedatù. ³⁸ Amuk tigtu ka umunut diyà si Nemula owoy amuk mangunut ka diyà sa langun uledin di owoy amuk ilingan ko ma sa mepion adat kenà i Nemula metuuwan, umunut-unut doo Nemula i diyà keniko. Tuu doo, amuk tigtu ka mangunut diyà sa langun uledin i Nemula lagà sa kepangunut i Dabid sa sinaligan di egoh anay, pelugayen i Nemula doo diyà keniko sa kedatuan ko mesetugdugtugdug, lagà sa binaelan i Nemula diyà si Dabid, enù ka kuna sa pedatuen i Nemula diyà sa sepulù geumpung tugod i Islaél. ³⁹ Dodoo danà sa binaelan i Salomon, huenan di pigtamayan i Nemula doo sa medoo tugod i Dabid dodoo endà taman melugay di.”

⁴⁰ Na, egoh i Datù Salomon neketiig iya wé, egkelukuyan di eg-imatay Héloboam i. Dodoo migpelaguy Héloboam i eg-aput diyà si Datù Sisak dutu Igiptu dò owoy mig-ugpà dutu taman sa egoh i Salomon nematay.

Ini Sa Egoh I Salomon Nematay

(1 Medoo Datù 11:42-43)

⁴² Na, epat pulù gepalay sa lugay i Salomon migpedatù diyà sa tanà Islaél egoh di endà pa nebaed sa uwang tanà sinabaan di. Mig-ugpà diyà Hélusalém sa lugay di datù. ⁴³ Agulé egoh di nematay, iglebeng da diyà sa Menuwa i Dabid. Agulé sa anak i Salomon si Loboam sa nekesambì kenagdi migkedatù.