Lut 3

Ini Sa Egoh I Boos Migpasad Sa Ketabang Di Si Lut

¹ Na, sebaen agdaw mig-ikagi Naomi i diyà si Lut, guwaen di, “O Okon, mepion amuk lagbetan ku kuna sa maama sawaen ko, anì dumuen sa malayan ko kenà ko umugpà. ² Netiigan ko doo neduma telahadi ta Boos i sa ulu-ulu sa medoo bayi duma ko eggalebek. Na, igkani sigep eliken di sa medoo sebada. ³ Huenan di, pedigus ka owoy lulowi ko sa lana mepion ngadeg owoy kawali ko sa tigtu mepion ginis ko. Agulé angay ka diyà sa kenà di eg-elik, dodoo yaka pelawà egpehaa ya diyà kenagdi taman endà meubus di kumaen owoy uminem. ⁴ Owoy amuk humibat, patikpatik ko sa kenà di. Agulé amuk egtudug dé, angay ko lengih sa kayab diyà sa takem lisen di owoy hibat ka dahiya, enù ka iya sa ukit ko egpegeni sa ketabang di keniko. Agulé tulonen di diyà keniko sa baelan ko.”

⁵ Migsagbì Lut i, guwaen di, “Baelan ku doo sa langun inikagi ko diyà kenak.” ⁶ Agulé mig-angay diyà sa atung kenà da eg-elik owoy eg-unutan di sa igsugù sa nugangan di diyà kenagdi. ⁷ Agulé egoh i Boos neubus dé egkaen owoy eg-inem, neanggan dé owoy mig-angay eghibat diyà sa kilidan sa medoo sebada sinetipon da. Egoh di egtudug dé, migpeanag-anag Lut i egpedapag, owoy linengih di sa kayab diyà sa takem lisen i Boos owoy mighibat dé dahiya. ⁸ Agulé egoh di buyu teliwadà sigep, petow dé neketikela Boos i owoy migbelikid. Hê, negaip egoh di neketiig duen sa bayi eghibat diyà sa lisenan di. ⁹ Mig-igsà, guwaen di, “Ngadan ko i?”

Migsagbì, guwaen di, “O Datù, si Lut a. Na, danà di kuna sa medapag duma telahadi sa sawa ku nematay, mebaluy kuna sa mekeipat kenak. Huenan di, ited ko aken, hih.”

¹⁰ Mig-ikagi Boos i, guwaen di, “O Okon, ungayà ku metabangan i Datù Nemula kuna. Igpehaa ko uman pa dakel sa kehidu ko sa malayan nugangan ko danà ini i binaelan ko ini egoh diyà sa kedakel kehidu ko igpehaa ko danà sa binaelan ko diyà sa nugangan ko egoh muna, enù ka endà eglagbet ka sa maama batàbatà pa diyà kenak anì sawaen ko, iling ka pubeli ataw ka kawasà. ¹¹ Na, o Okon, yaka egkebukul la, enù ka baelan ku doo sa langun pinegeni ko, enù ka netiigan sa langun etaw diyà siini menuwa kuna sa bayi metulanged. ¹² Tuu doo, aken sa medapag duma telahadi sa tapay sawa ko, huenan di danà sa uledin ta meipat ku doo kuna. Dodoo duen sa sebaen ma maama duma telahadi ké uman pa medapag sa keduma di diyà sa tapay sawa ko diyà sa kedapag sa keduma ku kenagdi. ¹³ Ugpà ka pelawà dahini siini sigep. Amuk sumimag, hauwen ta amuk kagdi sa umited keniko ataw ka endà. Amuk meiyap, mepion doo iya wé, dodoo amuk endà meiyap di, ipengibet ku danà di melalù Datù Nemula i iteden ku doo kuna. Na, hibat ka dé taman sumimag.”

¹⁴ Agulé mighibat dema Lut i diyà sa selatal sa takem lisen i Boos taman sumimag, dodoo mig-enaw egoh di endà pa egtiwaswas sa magtu kesimag anì endà hauwen di sa liyu etaw, enù ka endà egkeiyap Boos i amuk metiigan etaw sa egoh sa bayi mig-angay diyà sa atung kenà di eg-elik. ¹⁵ Mig-ikagi ma Boos i diyà si Lut, guwaen di, “Lengà ko sa kumbung ko owoy bekah ko dini.” Agulé hinudud di sa duwa pulù kakilu sebada, owoy binuligan di ma eghenat. Agulé miglikù Lut i diyà sa menuwa di. ¹⁶ Egoh di migtebow, mig-igsà sa nugangan di, guwaen di, “O Okon, enù egoh sa nebaelan ko?”

Agulé tinulon i Lut diyà sa nugangan di sa langun binaelan i Boos diyà kenagdi. ¹⁷ Owoy guwaen di ma, “Igbegay di diyà kenak siini medoo sebada, enù ka endà mepion di gaa amuk endà duen sa meuwit ku amuk lumikù a diyà keniko.”

¹⁸ Agulé mig-ikagi Naomi i, guwaen di, “O Okon, angati ko taman endà metiigan ko duu sa ketamanan di, enù ka endà umetud Boos i taman endà meubus di duu sa keantang di ini egoh di.”