Lut 2

Ini Sa Egoh I Lut Miggalebek Diyà Sa Hinemulaan I Boos

¹ Na si Naomi, duen sa duma di si Boos. Kagdi sa sebaen duma telahadi i Ilimélék sawa i Naomi nematay. Mapulù etaw Boos i owoy kawasà ma. ² Na, mig-ikagi Lut i sa tegeMoab diyà si Naomi, nugangan di, guwaen di, “Pandayà ko aken mangay diyà sa hinemulaan anì umalal a sa bunga sebada diyà sa hinemulaan kenà sa épê di pealal kenak.”

Migsagbì Naomi i, guwaen di, “Na Okon, ipanaw ka dé.”

³ Huenan di, mig-angay Lut i diyà sa hinemulaan owoy tinultul di sa inukitan sa medoo tegeketu, owoy kinuwa di sa medoo singgelanggelangay sebada netangtang da. Na, iya sa kenà di nekealal sa hinemulaan i Boos sa duma telahadi i Ilimélék. ⁴ Agulé migtebow Boos i kedu diyà sa menuwa Bétlihém, owoy sinaluan di sa medoo tegeketu, guwaen di, “Ungayà ku tulikan i Datù Nemula kiyu.”

Sinagbian da ma, guwaen da, “Ungayà ké metabangan i Datù Nemula kuna.”

⁵ Agulé mig-igsà Boos i diyà sa egsugùsuguen di sa kaunutan sa medoo tegeketu, guwaen di, “Ngadan sa malayan siedò kenogon?”

⁶ Migsagbì sa kaunutan sa medoo tegeketu, guwaen di, “Kagdi sa bayi tegeMoab mig-unut diyà si Naomi kedu Moab dò. ⁷ Migpegeni diyà kenak anì tultulen di sa medoo tegeketu anì alalen di sa medoo sebada netangtang. Eggalebek dahini edung magtu kesimag owoy migdalut daa eghelung diyà sa kemeluman.”

⁸ Agulé mig-ikagi Boos i diyà si Lut, guwaen di, “Na, Okon, dinegdineg ko siini ikagiyen ku diyà keniko. Yaka dé eg-angay ya eg-alal diyà sa hinemulaan sa liyu etaw. Dodoo unut-unut ka daa diyà sa medoo bayi tegeketu dahini. ⁹ Hahaa ko sa kenà da egketu owoy tultul ko daa sa inukitan da. Sinasà ku ma sa medoo maama eggalebek diyà kenak anì endà bogowen da kuna. Owoy amuk egkelupahan ka, angay ka inem diyà sa medoo buyung pinenù da wayeg.”

¹⁰ Agulé miglagkeb Lut i taman neketenà sa kilay di diyà tanà, owoy mig-ikagi diyà si Boos, guwaen di, “Maen di ya egsagipaen ko aken owoy eghiduwan ko ma aken i beken etaw Hudiyu?”

¹¹ Migsagbì Boos i, guwaen di, “Dinineg ku sa langun binaelan ko diyà sa nugangan ko edung egoh sa sawa ko nematay. Netiigan ku sa egoh ko migsalid diyà sa emà ko owoy sa inay ko owoy sa tanà kenà ko neetaw, owoy netiigan ku ma sa egoh ko mig-angay dahini anì mugpà ka diyà sa medoo etaw endà nelayaman ko duu egoh anay. ¹² Ungayà ku mebegayan i Datù Nemula kuna untung danà sa mepion binaelan ko, owoy ungayà ku ma tigtu megulub sa untung ko ibegay i Datù Nemula sa egpigtuuwen sa medoo tegeIslaél enù ka kagdi sa inangayan ko egpetabang.”

¹³ Sinagbian i Lut, guwaen di, “O Datù, tigtu mepion sa kebael ko kenak. Pinepion ko sa pedu ku danà sa mepion inikagi ko diyà kenak, apiya di pa beken a lagà sa sebaen bayi diyà sa medoo egsugùsuguen ko.”

¹⁴ Na, egoh di neuma sa ulas da kumaen, mig-ikagi Boos i diyà si Lut, guwaen di, “Angay ka dini, enù ka kumaen ki dé. Kaen ka sa epan, owoy damui ko diyà sa sabaw.” Huenan di, migpenuu Lut i diyà sa dapag sa medoo tegeketu egpenuu, owoy binegayan i Boos ma sa sebada sinelal. Migkaen taman sa egoh di nebesug owoy duen pa sa samà di egkaen. ¹⁵ Agulé egoh i Lut miglegkang dema eg-angay eg-alal sa sebada, mig-ikagi Boos i diyà sa medoo tegegalebek di, guwaen di, “Pandayà yu dé sa kealal di, apiya di pa diyà sa kenà sa medoo inay sebada binegkes. Yoko eghawid duu. ¹⁶ Owoy hugut yu ma sa duma di diyà sa medoo binegkes, owoy tangtang yu anì dumuen sa mealal di. Yoko ma egbulit duu.”

¹⁷ Huenan di, mig-alal Lut i sa sebada diyà sa hinemulaan taman sa egoh di umeled sa agdaw. Agulé egoh di mig-elik dé, nekeuma sakalatà sa nekuwa di sebada. ¹⁸ Inuwit di diyà sa menuwa owoy igpehaa di diyà sa nugangan di sa kedoo nealal di. Igbegay di ma diyà kenagdi sa samà di egkaen. ¹⁹ Agulé inigsaan i Naomi, guwaen di, “Ngadan sa kenà ko mig-alal ini i medoo sebada ini egoh di? Ngadan di etaw épê sa hinemulaan kenà ko mig-alal? Ungayà ku metabangan i Nemula iya wé maama mehidu keniko.”

Agulé tinulon i Lut diyà si Naomi sa kenà di mig-alal, guwaen di, “Iya sa épê sa hinemulaan kenà ku mig-alal si Boos.”

²⁰ Mig-ikagi Naomi i, guwaen di, “Ungayà ku metabangan i Datù Nemula Boos i. Enù ka igpetuu i Datù Nemula doo sa igpasad di diyà sa medoo nehagtay owoy diyà sa medoo nematay.” Owoy guwaen i Naomi ma, “Siedò maama sa duma telahadi ta, huenan di danà sa adat ké, kagdi ma sa sebaen mekeipat kenita.”

²¹ Agulé guwaen i Lut tegeMoab, “Inikagi di ma diyà kenak peumanen di aken petultul diyà sa medoo tegeketu di taman sa egoh da meubus dé kumetu.”

²² Mig-ikagi Naomi i diyà si Lut, guwaen di, “O Okon, mepion amuk tumultul ka daa diyà sa medoo bayi eggalebek diyà sa hinemulaan i Boos, enù ka petow ki daa mebogo ka amuk mangay ka diyà sa liyu épê hinemulaan.” ²³ Na, takà egtultul Lut i diyà sa medoo bayi eggalebek diyà sa hinemulaan i Boos anì alalen di sa medoo egketangtang taman meubus da kumetu sa sebada owoy teligo ma. Owoy tapay doo eg-ugpà diyà sa kenà sa nugangan di.