Ini Sa Igsulat Denu Si
LUT
1
Ini Sa Egoh Da I Ilimélék Mighalì Dutu Moab Dò
1 Na, egoh anay egoh sa medoo kaunutan ginelal i Nemula sa egsabà sa tanà Islaél, duen sa bitil dahiya. Huenan di, duen sa sebaen maama tegeBétlihém diyà sa uwang tanà Huda mig-angay da sa sawa di owoy sa duwa anak da maama eg-ugpàugpà diyà sa tanà Moab. 2 Na, iya sa ngadan iya wé maama si Ilimélék, owoy sa sawa di si Naomi, owoy si Malon owoy si Kiliyon sa ngadan sa duwa anak da maama. Kagda sa tugod i Ipelaim tegeBétlihém diyà sa uwang tanà Huda. Na, egoh da pelawà dutu Moab dò, 3 nematay Ilimélék i, owoy si Naomi daen sa eg-ipat sa duwa anak da maama. 4 Agulé migsawa sa duwa anak di diyà sa duwa bayi tegeMoab, si Opela owoy si Lut. Agulé egoh di buyu neuma sa kesepulù di gepalay, 5 nematay ma Malon i owoy si Kiliyon. Hê, si Naomi daen sa nesamà, endà dé duen sawa di owoy endà ma duen anak di.
Ini Sa Egoh I Naomi Owoy Si Lut Migpelikù Dutu Bétlihém Dò
6 Na, egoh di nelugaylugay, dinineg i Naomi sa egoh i Datù Nemula migtabang sa medoo etaw di danà di migbegay diyà kenagda sa mepion ketebas da. Huenan di, mig-igkes Naomi i enù ka lumegkà da lapeg sa duwa awas di kedu diyà sa tanà Moab. 7 Neseunut da eg-ipanaw eglikù dutu tanà Huda dò. Dodoo egoh da diyà dalan, 8 mig-ikagi Naomi i diyà sa duwa awas di, guwaen di, “Likù yu angay diyà sa kenà sa inay yu. Ungayà ku hiduwan i Datù Nemula kiyu lagà mendaa sa kehidu yu kenak owoy sa kehidu yu sa sawa yu nematay. 9 Owoy ungayà ku ma pesawaen i Datù Nemula dema kiyu anì dumuen sa kenà yu umugpà sa malayan yu.”
Agulé pinengadekan i Naomi kagda enù ka eg-ebalen di. Dodoo migsinegaw da 10 owoy mig-ikagi da diyà kenagdi, guwaen da, “Meked ké lumikù. Munut ké polo keniko mangay diyà sa kenà sa medoo duma ko.”
11 Guwaen i Naomi, “O Okon, mepion amuk lumikù yu polo. Maen di ya meiyap yu umunut kenak? Enù di ya, umanak a pa atu uman anì dumuen dema sa maama umited keniyu? 12 Likù yu polo, Okon, enù ka lukes a dé owoy endà dé sumawa a dulì. Apiya di pa duen sa ungayà ku sumawa, ataw ka sumawa a igkani sigep anì umanak a maama, 13 enù di ya, meangatan yu pa atu taman sa egoh di kumedakel? Owoy metigkelan yu pa atu sa egoh yu endà sumawa sa liyu etaw? O Okon, netiigan yu doo endà mebaluy iya wé. Enù ka kinuntelà i Datù Nemula aken, owoy egkedaetan pedu ku ma kiyu danà sa nebaelan yu.”
14 Agulé egsesinegaway da dema. Hê, pinengadekan i Opela sa nugangan di enù ka lumikù dé. Dodoo si Lut, endà miglengà di eg-unut-unut diyà si Naomi. 15 Agulé mig-ikagi Naomi i, guwaen di, “O Lut, lumikù dé sa idos ko diyà sa kenà medoo duma di owoy diyà sa nemula egpigtuuwen di. Mepion amuk umunut ka ma kenagdi lumikù.”
16 Dodoo migsagbì Lut i, guwaen di, “Yaka egsugù kenak pesalid diyà keniko. Munut-unut a polo diyà keniko. Sumalà dé sa angayan ko, iya ma sa angayan ku. Owoy sumalà dé sa kenà ko umugpà, iya ma sa kenà ku umugpà. Owoy sa medoo duma ko, mebaluy kagda ma sa duma ku. Owoy sa Nemula egpigtuuwen ko, mebaluy iya ma sa Nemula pigtuuwen ku. 17 Sumalà dé sa kenà ko mematay, iya ma sa kenà ku mematay, owoy sa kenà ku ilebeng. Mepion amuk tigtu mepigtamayan i Datù Nemula aken amuk tumangkà a diyà keniko, liyu daa sa kepatay ta.”
18 Na, egoh i Naomi neketiig sebaen daa sa pedu i Lut umunut-unut diyà kenagdi, endà dé uman di eg-ikagi.
19 Na, eglagbas da eg-ipanaw taman nekeuma da diyà sa menuwa Bétlihém. Egoh da migtebow, negaip sa langun etaw dahiya owoy mig-ikagi sa medoo bayi, guwaen da, “Enù di ya, si Naomi ini i?”
20 Migsagbì, guwaen di, “Yoko eg-ikagi ya si Naomi sa ngadan ku, dodoo pengadani yu polo aken si Mala,a enù ka lagà mepait sa binaelan i Nemula épê dakel egkegaga diyà kenak. 21 Egoh ku miglegkang dahini, duen pelà sawa ku owoy medoo anak ku ma owoy sa medoo langun taman ku. Dodoo endà dé duen sa nesamà egoh i Datù Nemula migpelikù kenak dahini. Yoko dé egpengadanan kenak si Naomi enù ka kinuntelà i Datù Nemula épê dakel egkegaga aken owoy pinelihay di ma aken.”
22 Na, iya sa ukit da i Naomi si Lut awas di tegeMoab nekepelikù kedu diyà sa tanà Moab. Egoh da migtebow diyà sa menuwa Bétlihém, iya ma sa egoh sa medoo etaw eg-edung egketu sa sebada.