Lut 4

Ini Sa Egoh I Boos Migsawa Si Lut

¹ Na, mig-angay Boos i diyà sa kenà sa medoo ulu-ulu egkesetipon diyà sa bengawan kutà sa menuwa da, owoy migpenuu dahiya. Hê, mig-ukit dahiya siedò duma telahadi i Ilimélék sa maama tinulon i Boos diyà si Lut. Agulé mig-ikagi Boos i diyà kenagdi, guwaen di, “O Akay, angay ka dini owoy penuu ka.” Huenan di, mig-angay ma egpenuu dahiya. ² Agulé sinetipon i Boos sa sepulù ulu-ulu diyà sa menuwa, owoy guwaen di, “Penuu yu ma dini.” Egoh da migpenuu dé, ³ mig-ikagi Boos i diyà siedò duma telahadi di, guwaen di, “Na, miglikù dé Naomi i kedu tanà Moab dò, owoy ungayà di dagangen di sa hinemulaan i Ilimélék sa duma telahadi ta. ⁴ Iya sa penemdem ku mepion amuk metiigan ko iya wé. Na, amuk meiyapan ko iya wé hinemulaan, beli ko diyà sa taengan siini medoo ulu-ulu diyà sa menuwa ta. Dodoo amuk endà meiyapan ko duu, tulon ko diyà kenak, enù ka kuna sa muna mebaluy meli iya wé hinemulaan, agulé aken sa mebaluy sumetugdug.”

Migsagbì sa maama, guwaen di, “Beliyen ku.”

⁵ Agulé mig-ikagi Boos i, guwaen di, “Na, amuk beliyen ko sa hinemulaan diyà si Naomi, mebaluy sawa ko ma si Lut sa bayi balu tegeMoab, anì umanak sa lagà anak doo sa tapay sawa di nematay owoy mehagdi ma sa hinemulaan sa nematay.”

⁶ Migsagbì sa maama, guwaen di, “Amuk hediya, endà mebeli ku duu sa hinemulaan. Enù ka amuk beliyen ku, endà ma mekuwa sa medoo anak ku duu amuk mematay a. Huenan di, kuna dé sa meli, enù ka meked a.”

⁷ Na, egoh iya, ini sa adat sa medoo tegeIslaél anì metandaan da sa kedagang da ataw ka amuk sesambiay da sa langun taman da. Eglengaen sa tegedagang sa sebaen bakiyà di diyà sa lisen di owoy ibegay di diyà sa etaw egbeli. Iya sa egbaelan da diyà sa tanà Islaél anì metandaan da neubus dé sa antang da. ⁸ Huenan di, egoh sa maama mig-ikagi diyà si Boos, guwaen di, “Kuna dé sa beli,” agulé linengà di sa bakiyà di owoy igbegay di diyà si Boos. ⁹ Agulé mig-ikagi Boos i diyà sa medoo ulu-ulu sa menuwa owoy sa langun etaw nesetipon dahiya, guwaen di, “Neketiig yu langun ini egoh di sa egoh ku migbeli diyà si Naomi sa langun taman da i Ilimélék owoy si Kiliyon owoy si Malon, owoy metulon yu ma kani sa hinaa yu. ¹⁰ Owoy lagà bineli ku ma si Lut tegeMoab sa nebalu diyà si Malon anì sawaen ku. Huenan di, mebaluy diyà sa malayan i Malon sa langun taman di taman melugay, owoy endà ma mekedan sa ngadan di diyà sa medoo duma telahadi di owoy diyà sa menuwa di ma. Netiigan yu dé ini i binaelan ku ini egoh di owoy metulon yu ma kani sa hinaa yu.”

¹¹ Agulé mig-ikagi sa medoo ulu-ulu sa menuwa owoy sa medoo liyu etaw dahiya, guwaen da, “Hoò, hinaa ké dé sa binaelan yu. Ungayà ké pelagaen i Datù Nemula ini i bayi sawaen ko diyà si Lakél owoy si Liya sa tupù sa medoo tegeIslaél egoh anay. Ungayà ké ma kumawasà ka diyà sa medoo tugod i Épelata owoy lumalag ka ma diyà sa menuwa Bétlihém. ¹² Ungayà ké ma pedoowen i Datù Nemula sa anak ko diyà siini bayi batàbatà pelawà anì adatan da etaw lagà sa medoo tugod i Palés sa anak i Huda owoy si Tamal egoh anay.”

Ini Denu Sa Tugod I Boos

¹³ Na, neketuu sa inikagi i Boos, huenan di inuwit di si Lut diyà sa dalesan di anì sawaen di. Egoh da neseuma lawa, tinabangan i Datù Nemula kagdi owoy migkelalingen, agulé mig-anak maama. ¹⁴ Huenan di, mig-ikagi sa medoo bayi diyà si Naomi, guwaen da, “Meolò Datù Nemula i. Binegayan di kuna ini egoh di sa bébê ko anì umipat keniko. Ungayà ké lumalag ma diyà sa tanà Islaél. ¹⁵ Eghiduwan sa awas ko kuna, owoy uman pa mepion sa kebael di keniko diyà sa kebael sa pitu inanak ko maama amuk duen. Mig-anak dé sa awas ko ini egoh anì duen sa bébê ko maama sa egpebagel keniko owoy sa eg-ipat keniko amuk kumelukes ka dé.”

¹⁶ Agulé kinuwa i Naomi sa batà owoy sinekepu di owoy eg-ipaten di ma. ¹⁷ Pinengadanan sa medoo bayi duma di nesedapag dalesan sa batà si Obéd, owoy tinulon da diyà sa langun etaw, guwaen da, “Duen dé sa bébê i Naomi maama.”

Na, egoh di nelugaylugay, mig-anak Obéd i si Hési, owoy umanak Hési i si Dabid. ¹⁸ Na, ini sa medoo tugod i Palés. Umanak Palés i si Islon. ¹⁹ Umanak Islon i si Alam. Umanak Alam i si Abinadab. ²⁰ Umanak Abinadab i si Naason. Umanak Naason i si Salmon. ²¹ Umanak Salmon i si Boos. Umanak Boos i si Obéd. ²² Umanak Obéd i si Hési. Umanak Hési i si Dabid.