10
Ini Sa Egoh Sa Agdaw Mig-ugpà Anì Tabanan I Hosuwa Sa Medoo TegeAmoliya
1 Na, tinabanan i Hosuwa ma sa medoo etaw diyà sa menuwa Hai, lagà mendaa sa binaelan di diyà sa menuwa Héliko. Neulow sa menuwa Hai, owoy inimatayan da ma sa datù di owoy sa langun etaw eg-ugpà dahiya. Agulé nesepasad sa medoo etaw tegeGibayon owoy sa medoo tegeIslaél anì meselanih da eg-ugpà, huenan di neseamut da dé eg-ugpà. Na, egoh sa datù tegeHélusalém si Adonisedek migdineg denu iya wé, 2 tigtu nelimedangan sa medoo etaw tegeHélusalém, enù ka dakel menuwa sa Gibayon lagà sa kedakel sa liyu menuwa épê datù, owoy uman pa sa kedakel di diyà sa menuwa Hai owoy mebalaw ma sa medoo sundalu tegeGibayon.
3 Huenan di, igpeuwit i Datù Adonisedek sa kagi di diyà sa epat datù duma di tegeAmoliya, si Datù Hoham diyà sa menuwa Hibelon, owoy si Datù Piliyam diyà sa menuwa Halmut, owoy si Datù Hapiya diyà sa menuwa Lakis, owoy si Datù Debil diyà sa menuwa Iglon. 4 Guwaen di, “Tigtu egpegeniyen ku sa ketabang yu. Angayen ta mengayaw sa menuwa Gibayon, enù ka nesepasad dé sa medoo tegeGibayon owoy si Hosuwa owoy sa medoo tegeIslaél anì meselanih da eg-ugpà.” 5 Hê, neseunut sa penemdem sa lima datù tegeAmoliya. Huenan di, inangay da egseulingutan sa menuwa Gibayon, agulé ginila da.
6 Agulé migpeuwit kagi sa medoo tegeGibayon diyà si Hosuwa diyà Gilgal kenà sa medoo tegeIslaél mig-esud. Guwaen da diyà kenagdi, “Yaka egpandayà duu kami i medoo egsugùsuguen ko. Petéél ka angay dini anì tabangan ko kami. Aluki ko kami, enù ka neseunut da eggila kenami sa langun datù tegeAmoliya eg-ugpà diyà sa getan-getan.”
7 Huenan di, mig-angay Hosuwa i owoy sa langun sundalu di lapeg sa medoo nelayam eggila kedu diyà sa menuwa Gilgal anì tabangan da sa medoo tegeGibayon. 8 Mig-ikagi Datù Nemula i diyà si Hosuwa, guwaen di, “Yoko egkelimedangan na diyà kenagda, enù ka ipelugpì ku doo kagda diyà keniyu. Apiya sebaen, endà duen sa mekeatu diyà keniyu.” 9 Na, nekeelut sigep sa keipanaw da i Hosuwa owoy sa medoo sundalu di kedu diyà Gilgal. Huenan di, nepetow sa medoo sundalu nekeulingut diyà sa menuwa Gibayon danà sa kinetebow da i Hosuwa. 10 Ini sa binaelan i Datù Nemula, linimedang di sa medoo tegeAmoliya egoh da mighaa sa medoo sundalu tegeIslaél. Huenan di, medoo sa tegeAmoliya inimatayan sa medoo tegeIslaél diyà sa menuwa Gibayon, owoy linohot da ma eg-imatayan sa medoo duma tegeAmoliya migpelaguy eglungel diyà Bét-holon taman nekeuma da diyà sa menuwa Asikah owoy menuwa Makidah. 11 Ligò sa medoo tegeAmoliya egpelaguy eglohoten sa medoo tegeIslaél, egkenabù diyà kenagda sa dakel bunga’t udan danà i Datù Nemula. Huenan di, medoo temù sa nematay. Uman pa kedoo sa nematay danà da nesugat sa dakel bunga’t udan diyà sa kedoo nematay danà sa kinemkem sa tegeIslaél.
12 Na, egoh iya wé agdaw egoh i Datù Nemula migpetaban si Hosuwa owoy sa medoo tegeIslaél diyà sa medoo tegeAmoliya, mig-ikagi Hosuwa i diyà si Datù Nemula diyà sa taengan sa medoo tegeIslaél. Guwaen di, “Agdaw, ugpà ka diyà sa belungon langit diyà sa selatal menuwa Gibayon. Owoy bulan, ugpà ka ma diyà sa selatal sa lepak Ayalon.” 13 Hê, tuu doo, mig-ugpà sa agdaw owoy mig-ugpà ma sa bulan taman sa egoh da migtaban diyà sa medoo kuntelà da. Na, nekesulat ma ini i nebaelan diyà sa igsulat i Hasal. Tuu doo, mig-ugpà sa agdaw diyà sa selatal belungon langit, owoy endà migsalep di. Huenan di, lagà duwa agdaw sa lugay iya wé segeagdaw. 14 Edung egoh anay taman ini egoh di, endà dé duen sa agdaw hauwen ta éhê iya wé agdaw, egoh i Datù Nemula migpangunut diyà sa igsugù sa etaw, enù ka tigtu pinetaban i Datù Nemula sa medoo tegeIslaél.
15 Agulé miglikù Hosuwa i owoy sa langun sundalu di diyà sa kenà da mig-esud diyà Gilgal.