<<    <   Hosuwa 7   >    >> 
7
Ini Sa Egoh I Akan Nesalà
1 Na, igsugù i Datù Nemula diyà sa medoo tegeIslaél anì ulowen da sa langun taman diyà sa menuwa Héliko, dodoo endà pinangunutan da duu sa igsugù di denu sa langun taman hinawidan di kuwaen. Migtipay polo Akan i anak i Kalemi, sa bébê i Sabdi owoy bébê lulud i Silah, tugod i Huda, enù ka kinuwa di sa duma langun taman. Huenan di, binulitan i Datù Nemula sa medoo tegeIslaél.
2 Na, duen dema etaw pineangay i Hosuwa egpekuhì sa menuwa Hai, sa menuwa denu tebowon agdaw amuk diyà ki sa menuwa Bétél owoy medapag ma diyà sa menuwa Bét-aben. Egoh da migkuhì sa menuwa Hai, 3 miglikù da owoy mig-ikagi da diyà si Hosuwa, guwaen da, “Mebaluy amuk endà langun di etaw sa mangay dutu. Enget amuk duwa ngibu geetaw daa ataw ka telu ngibu sa peangayen ko egpepeka sa menuwa Hai. Yaka eglengon duu sa langun duma ta, enù ka endà iseg di medoo sa etaw eg-ugpà dahiya.”
4 Huenan di, telu ngibu daa sa kedoo tegeIslaél mig-angay egtepel sa menuwa Hai. Dodoo endà nekegaga da. Tinabanan polo sa medoo etaw Hai kagda. 5 Linohot da ma kagda kedu diyà sa bengawan sa menuwa da taman sa atung kenà etaw egkuwa batu pinengadanan da Sibalim. Egoh da eglungel, neimatayan doo sa telu pulù owoy enem geetaw. Huenan di, tigtu migkelungoy dé sa pedu sa medoo tegeIslaél owoy nelimedangan da ma.
6 Agulé kinisì i Hosuwa owoy sa medoo ulu-ulu tegeIslaél sa ginis da enù ka tigtu migkedaet sa pedu da danà sa nebaelan sa medoo duma da. Miglagkeb da diyà sa taengan sa Baul Tandà sa Igpasad i Datù Nemula, owoy binuhbuhan da ma kepung sa ulu da. Mig-ugpà da dahiya taman mig-eled sa agdaw. 7 Migsimbà Hosuwa i, guwaen di, “O Datù Nemula, kuna sa egsabà sa langun. Maen di ya pinekatin ko kami tanà dini diyà sa lawa’t Holdan amuk ipegelà ko doo kami diyà sa medoo tegeAmoliya? Mepion pa hedem amuk endà dé miglegkà ké diyà sa tanà dutu sa lawa’t Holdan. 8 O Datù Nemula, ngadan sa mebaelan ku ini egoh di enù ka minekeesud-esud siini medoo tegeIslaél kedu diyà sa kuntelà ké? 9 Amuk dumineg sa medoo tegeKanan owoy sa medoo liyu balangan etaw diyà siini tanà denu ini i, iya kéen sa baelan da seulingutan da kami anì meimatayan ké langun. Amuk hediya, ngadan sa baelan ko anì endà mesumbung ka?”
10 Sinagbian i Datù Nemula Hosuwa i, guwaen di, “Tigdeg yu dé. Maen di ya iya sa binaelan yu eglagkeb yu diyà tanà? 11 Nesalà doo sa medoo tegeIslaél, enù ka endà pinangunutan da duu sa igsugù ku diyà kenagda. Kinuwa da sa duma langun taman igsugù ku ipeulow. Pinenakaw da owoy igtagù da diyà sa hagda munoy langun taman, agulé migbutbut da diyà sa binaelan da. 12 Iya sa pesuwan di endà mig-atu da eggila diyà sa medoo kuntelà da. Huenan di, minekepeesud da enù ka mig-ikagi a kagda polo sa metabanan. Endà dé umunut-unut a diyà keniyu taman endà ulowen yu duu sa langun taman kinuwa yu hinawidan ku. 13 Na, tigdeg ka dé, owoy ikagiyi ko sa medoo etaw anì petiengawen da kagda diyà sa kehaa ku anì mangay da diyà sa taengan ku simag. Ini sa kagi ku, aken i Datù Nemula egpigtuuwen sa medoo tegeIslaél, guwaen ku, ‘Duen sa etaw diyà keniyu miglidung sa duma langun taman igsugù ku ipeulow. Endà mekeatu yu diyà sa medoo kuntelà yu taman endà mekedan di diyà keniyu iya wé langun taman.’ 14 Huenan di, simag peangay ko diyà sa taengan ku sa uman segeumpung tugod i Islaél. Agulé ini sa baeli ko diyà sa umpung di tandaan ku diyà keniko, setigesa ko sa uman segeapilidu. Agulé sa apilidu da tandaan ku diyà keniko, setigesa ko ma sa uman segemalay. Hediya ma, setigesa ko dema sa malayan tandaan ku diyà keniko anì sigbaenbaenay da mangay diyà sa taengan ku. 15 Meulow doo sa etaw metandaan migkuwa sa langun taman igsugù ku ipeulow. Endà dumuen sa mesamà diyà sa langun malayan di, lapeg sa langun taman di diatas, enù ka tinipay di sa igsugù ku denu sa langun taman diyà sa menuwa Héliko, owoy tigtu nemalaan sa medoo tegeIslaél danà iya wé binaelan di.”
16 Na, egoh di sumimag, pinelapus i Hosuwa sa langun tegeIslaél anì mangay sa uman segeumpung diyà sa taengan i Datù Nemula. Hê, netandaan sa umpung tugod i Huda. 17 Agulé pinedapag i Hosuwa sa medoo apilidu tugod i Huda, owoy iya sa netandaan sa apilidu Silah. Agulé pinedapag di ma sa medoo malayan apilidu Silah, owoy iya sa netandaan sa malayan i Sabdi. 18 Hê, pinedapag di ma sa medoo etaw sa malayan i Sabdi, owoy iya sa netandaan si Akan anak i Kalemi, sa bébê i Sabdi owoy bébê lulud i Silah.
19 Agulé mig-ikagi Hosuwa i diyà si Akan, guwaen di, “O Adug, egtigdeg ka dé diyà sa taengan i Datù Nemula sa egpigtuuwen sa medoo tegeIslaél, huenan di tulon ko daa sa tuu. Tuloni ko aken sa binaelan ko. Yaka eglidung duu diyà kenak.”
20 Migsagbì Akan i, guwaen di, “Tuu doo, nesalà a diyà si Datù Nemula sa egpigtuuwen ta, kita i medoo tegeIslaél. Ini sa binaelan ku. 21 Hinaa ku sa tigtu metolol kawal kedu Babiloniya dò diyà sa medoo langun taman diyà sa menuwa Héliko. Owoy duen ma segepapan bulawan tengà kakilu kéen sa kebegat di owoy duen ma duwa kakilu pilak. Tigtu neiyapan ku iya wé, huenan di kinuwa ku owoy iglidung ku diyà tanà diyà sa kenà kemalig ku. Igtagù ku sa pilak denu leketanà.”
22 Na, egoh i Hosuwa migdineg iya wé, duen etaw sinugù di. Hê, migletu da eg-angay diyà sa kemalig i Akan. Tuu doo, hinaa da dahiya sa langun taman nekelidung lapeg sa pilak denu leketanà. 23 Kinuwa da owoy inuwit da diyà si Hosuwa owoy diyà sa langun duma da tegeIslaél. Igtenà da dahiya diyà sa taengan i Datù Nemula. 24 Agulé inuwit i Hosuwa owoy sa medoo tegeIslaél Akan i owoy sa pilak owoy sa kawal owoy sa segepapan bulawan, owoy sa sawa di owoy sa medoo anak di ma, owoy sa langun hinagtay da sapì owoy asnu owoy kebilibili, owoy sa langun taman da owoy sa kemalig da ma. Inuwit da diyà sa lepak pinengadanan da Lepak Kebogowon.
25 Mig-ikagi Hosuwa i, guwaen di, “Na, binogo yu kami danà sa binaelan yu, huenan di begayan i Datù Nemula ma kiyu sa dakel bogo ini egoh di.” Agulé binuung sa medoo tegeIslaél batu Akan i owoy sa sawa di owoy sa medoo anak da taman mematay da. Hê, inulow da ma kagda langun, lapeg sa langun taman da inuwit da dahiya. 26 Agulé dinugkowon da kagda batu owoy tapay doo dahiya sa medoo batu taman ini egoh di.a Huenan di, Lepak Kebogowon sa kepengadan da iya wé lepak taman ini egoh di. Na, egoh da mig-imatay si Akan, nekedan ma dé sa kebulit i Datù Nemula sa medoo tegeIslaél.