3
Ini Sa Egoh Sa Medoo TegeIslaél Migbatas Sa Lawa’t Holdan
14 Na, egoh sa medoo tegeIslaél miglegkang diyà sa kenà da mig-esud anì matas da diyà sa lawa’t wayeg Holdan, muna diyà kenagda sa medoo tegesimbà mig-uwit sa Baul Tandà Sa Igpasad i Nemula. 15 Egoh iya, sasang keketu owoy nebensek wayeg sa kebatuwan sa lawa’t Holdan enù ka iya sa sasang di egkemahà. Dodoo egoh da migkogkog diyà sa wayeg sa medoo tegesimbà eg-uwit sa Baul Tandà Sa Igpasad i Nemula, 16 petow dé nebelel sa kedelug di, hediya ka duen sa mig-alang sa wayeg dutu dagel dò diyà sa selatal sa menuwa Adan medapag diyà sa menuwa Saletan. Dodoo sa wayeg denu dibabà sa kenà di nebelel, migdelug doo uman eg-angay diyà sa Dagat Alabaa taman sa egoh di netikal dé sa kebatuwan sa lawa’t Holdan. Egoh di netikal dé, iya da pelawà kumatin tanà dutu sa medoo tegeIslaél diyà selatal sa menuwa Héliko. 17 Ligò sa medoo etaw mig-ukit diyà sa netikal kebatuwan lawa’t Holdan, migtigdeg pelawà sa medoo tegesimbà eg-uwit sa Baul Tandà Sa Igpasad i Datù Nemula diyà sa teliwadà kebatuwan taman sa egoh sa langun duma da tegeIslaél nekekatin.