Hosuwa 2

Ini Sa Egoh I Lahab Migbulig Sa Pineangay I Hosuwa Egpekuhì Diyà Sa Menuwa Héliko

¹ Na, egoh sa medoo tegeIslaél mig-esud pelawà diyà Sitim, duen duwa etaw pinekuhì i Hosuwa. Sinugù di kagda, guwaen di, “Angay yu kuhì sa menuwa Héliko diyà sa tanà Kanan.” Agulé mig-ipanaw sa duwa sinugù di owoy mig-angay da diyà sa menuwa Héliko. Miggemow da diyà sa dalesan i Lahab sa bayi tegepediyangdang, enù ka tumudug da dahiya.

² Dodoo duen sa etaw migtulon diyà sa datù tegeHéliko, guwaen da, “Hahaa ko, duen etaw tegeIslaél mig-awuh diyà sa menuwa ta siini sigep enù ka egkuhien da sa menuwa ta.” ³ Agulé pinesuguan sa datù tegeHéliko Lahab i, guwaen di, “Pelaun ko sa medoo maama mig-angay diyà keniko, enù ka tegekuhì da gaa. Iya daa sa ungayà da egkuhien da sa uwang menuwa ta.”

⁴ Dodoo tapay dé pinelidung i Lahab sa duwa maama. Agulé guwaen di, “Tuu ma doo, duen duwa maama mig-angay diyà kenak, dodoo endà netiigan ku duu sa keduwan da. ⁵ Agulé mig-ipanaw da dema egoh di sumigep egoh di buyu mepintuan sa bengawan sa kutà menuwa ta, dodoo endà inigsà ku duu sa angayan da. Dodoo amuk mesiyapat yu lumohot, meuma yu kéen kagda.” ⁶ Na, tapay dé inuwit i Lahab sa duwa maama diyà sa mepatag atep sa dalesan di enù ka linidung di kagda diyà leketanà sa medoo inay lino egbekolen di dahiya. ⁷ Na, egoh sa medoo tegeHéliko migdineg iya wé inikagi i Lahab, migpesiyapat da miglohot sa duwa tegekuhì taman diyà sa batasan lawa’t wayeg Holdan. Egoh da mig-ipanaw sa medoo eglohot, nepintuan dé sa bengawan sa kutà menuwa Héliko.

⁸ Na, egoh sa duwa tegekuhì endà pa egtudug da, miggemow dema Lahab i diyà sa atep dalesan kenà da miglidung. ⁹ Mig-ikagi diyà kenagda, guwaen di, “Netiigan ku igbegay i Datù Nemula siini tanà ké diyà keniyu, huenan di eglukub sa langun etaw diyà siini tanà danà da tigtu nelimedangan diyà keniyu. ¹⁰ Enù ka dinineg ké denu sa egoh i Datù Nemula migsekawang sa Melalegà Dagat kenà yu migbatas egoh yu miglegkang diyà Igiptu. Owoy netiigan ké ma inimatayan yu Sihon i owoy si Og, sa duwa datù sa medoo tegeAmoliya lapeg sa langun sundalu da ma dutu siedò tanà sa tanà dutu lawa’t Holdan denu tebowon agdaw. ¹¹ Egoh ké migdineg denu iya wé binaelan yu, nelimedangan ké owoy tigtu ké ma egpesu diyà keniyu, enù ka si Datù Nemula sa egpigtuuwen yu sa Nemula egsabà sa langit owoy sa tanà ma. ¹² Na, pengibeti yu, hih, Datù Nemula i anì tabangan yu aken owoy sa malayan ku ma, lagà mendaa sa ketabang ku keniyu ini egoh di. Owoy baeli yu ma sa tandà sa kesepasaday ta. ¹³ Egpegeni a diyà keniyu anì alukan yu sa emà ku owoy sa inay ku owoy sa medoo kakay ku owoy sa medoo hadi ku owoy sa langun malayan da ma. Yoko eglapeg kenami diyà sa medoo etaw imatayan yu.”

¹⁴ Migsagbì sa duwa tegekuhì diyà kenagdi, guwaen da, “Meimatayan i Nemula doo kami amuk pandayaen ké kiyu meimatayan. Amuk endà tulonen ko duu diyà etaw siini egbaelan ké, igpasad ké diyà keniko sa kehidu ké keniyu anì endà medaetan yu amuk ibegay i Datù Nemula siini tanà diyà kenami.”

¹⁵ Na, ig-unoy diyà sa kutà menuwa Héliko sa dalesan i Lahab, huenan di tinuntun di diyà tali sa duwa tegekuhì pineukit di diyà sa tatawan sa dalesan di anì mekepelaguy da kedu diyà sa menuwa Héliko. ¹⁶ Dodoo egoh di endà pa migpeipanaw kenagda, mig-ikagi diyà kenagda, guwaen di, “Angay yu pelawà diyà sa getan-getan anì endà mesiegungan yu duu sa medoo miglohot keniyu. Lidung yu pelawà dutu taman telu agdaw. Agulé amuk lumikù dé sa medoo tegelagbet keniyu, lagbas yu dé likù dutu kenà yu dò.”

¹⁷ Mig-ikagi sa duwa maama diyà kenagdi, guwaen da, “Petuuwen ké doo sa igpepasad ko diyà kenami amuk baelan ko ini i. ¹⁸ Amuk meuma sa kepelikù ké anì pekawen ké siini menuwa yu, poloti ko siini melalegà tali diyà sa tatawan kenà ko migtuntun kenami. Owoy setiponoy yu diyà sa dalesan ko sa emà ko owoy sa inay ko owoy sa medoo kakay ko owoy sa medoo hadi ko owoy sa langun malayan sa emà ko. ¹⁹ Amuk duen etaw lumaun diyà siini dalesan ko owoy amuk meimatayan, endà mesagbian ké duu iya wé enù ka hagdi salà dé. Dodoo nami salà amuk duen etaw meimatayan diatas sa dalesan ko. ²⁰ Dodoo amuk tulonen ko diyà etaw siini egbaelan ké, endà ipetuu ké duu sa igpepasad ko diyà kenami.”

²¹ Migsagbì Lahab i, guwaen di, “Meketuu doo sa inikagi yu.” Agulé tinuntun di kagda diyà sa liyu sa kutà menuwa Héliko. Egoh da mig-ipanaw dé, igpolot di sa melalegà tali diyà sa tatawan sa dalesan di.

²² Na, egoh sa duwa tegekuhì miglegkà dahiya, mig-angay da diyà sa getan-getan owoy miglidung da taman telu agdaw, enù ka inuman da kagda eglagbet sa medoo egkelukuy sumigkem kenagda. Egoh di neuma sa ketelu di agdaw, miglikù sa medoo etaw eglagbet enù ka endà hinaa da duu kagda. ²³ Agulé miglungel ma dé sa duwa tegekuhì, owoy iya da pelawà matas sa lawa’t wayeg Holdan enù ka mangay da diyà si Hosuwa anak i Nun. Egoh da migtebow, tinulon da diyà kenagdi sa langun nebaelan da. ²⁴ Owoy guwaen da, “Tuu doo ibegay i Datù Nemula siini tanà diyà kenita, enù ka egkelimedangan sa langun etaw dahiya diyà kenita.”