Ini Sa Igsulat Denu Si
HOSUWA
1
Ini Sa Inikagi I Nemula Diyà Si Hosuwa
1 Na, egoh i Mosis nehagtay pelawà, kagdi sa sinaligan i Datù Nemula, owoy iya sa salu di si Hosuwa anak i Nun. Agulé egoh i Mosis nematay dé, inikagiyan i Datù Nemula Hosuwa i, 2 guwaen di, “Nematay dé si Mosis sa sinaligan ku. Na, tapay ka dé igkes owoy sa langun tegeIslaél ini egoh di enù ka matas yu diyà sa lawa’t wayeg Holdan anì mekeangay yu diyà sa tanà igpasad ku ibegay ku diyà keniyu i medoo tegeIslaél. 3 Enù ka lagà mendaa sa egoh ku migpasad diyà si Mosis, ibegay ku diyà keniyu sa langun tanà meukitan yu. 4 Ini taman sa tanà ibegay ku diyà keniyu. Edung diyà sa melabel tanà mediyù dalesan denu kimataan taman diyà sa medoo getan Libano denu belabagan. Owoy edung ma diyà sa dakel lawa’t wayeg Upelatis denu tebowon agdaw owoy mig-ukit diyà sa tanà sa medoo tegeHétiyo taman sa Dagat Méditeliya denu eledan agdaw. 5 Endà duen sa mekeatu keniko taman sa lugay ko nehagtay, enù ka unut-unutan ku kuna lagà mendaa sa keunut-unut ku diyà si Mosis egoh anay. Endà pandayaen ku kuna owoy endà ma iniyugan ku kuna. 6 Na, pebagel ko sa pedu ko owoy pebalaw ka ma, enù ka kuna dé sa pangulu siini medoo etaw amuk tepelen yu siini tanà ibegay ku diyà keniyu, lagà mendaa sa igpasad ku diyà sa medoo tupù yu. 7 Huenan di, pebagel ko temù sa pedu ko owoy pebalaw ka ma. Tulik ka anì mangunut ka diyà sa langun uledin igsugkow i Mosis sa sinaligan ku diyà keniyu egoh anay. Yaka egsalibang nga diyà sa uledin anì tigtu kumepion sa langun egkebaelan ko. 8 Tulik ka anì pesagkat ko basa diyà sa medoo etaw sa medoo uledin ku igsulat. Inauwi yu agdaw owoy sigep anì kumepion sa kepangunut yu diyà sa langun uledin. Amuk hediya, kumepion doo sa kehagtayan yu owoy kumepion ma sa langun egkebaelan yu. 9 Petulengtuleng ko sa igsugù ku diyà keniko anì pebagelen ko sa pedu ko owoy pebalaw ka ma. Yaka egkelenawan na owoy yaka ma egkesemek ka, enù ka aken si Datù Nemula sa egpigtuuwen ko sa umunut-unut diyà keniko sumalà dé sa angayan ko.”