27
Ini Sa Egoh I Nemula Mighemilì Si Hosuwa Sa Nekesambì Si Mosis
12 Agulé mig-ikagi Datù Nemula i diyà si Mosis, guwaen di, “Tekedeg ka diyà sa Tuduk Abalim anì sugpayalen ko sa uwang tanà ibegay ku diyà sa medoo tegeIslaél. 13 Amuk eghauwen ko iya wé tanà, mematay ka lagà mendaa sa kakay ko si Alon, 14 enù ka endà migpangunut yu diyà sa igsugù ku keniyu dutu siedò melabel tanà Sin mediyù dalesan. Enù ka egoh sa medoo tegeIslaél migselsel diyà kenak dutu wayeg Méliba dò, endà igpehaa ko duu diyà kenagda sa kenemulawan ku.” Na, Méliba sa kepengadan da sa tebulan wayeg diyà Kades diyà sa melabel tanà Sin mediyù dalesan.
15 Agulé migsimbà Mosis i, guwaen di, 16 “O Datù Nemula, sa Nemula keduwan sa langun nehagtay, egpegeni a diyà keniko anì gelalen ko sa maama mekegaga umuwit siini medoo etaw, 17 owoy sa mekegaga ma mangulu amuk gumila da, anì endà mekeiling sa medoo etaw ko sa kebilibili melemu metelas amuk endà duen sa eg-ipat kenagda.”
18 Agulé mig-ikagi Datù Nemula i diyà si Mosis, guwaen di, “Peumowi ko Hosuwa i anak i Nun sa mekegaga danà sa Suguy ku, agulé tenai ko sa belad ko diyà sa ulu di anì metandaan kagdi sa umuwit sa medoo tegeIslaél. 19 Petigdeg ko ma diyà sa taengan i Iliyasal sa tegesimbà owoy diyà sa taengan sa langun tegeIslaél, owoy tulon ko ma diyà kenagda si Hosuwa sa mekesambì keniko. 20 Owoy begayi ko ma kagdi sa duma egkegaga ko anì mangunut sa langun tegeIslaél diyà kenagdi. 21 Pegeniyen di sa ketabang i Iliyasal sa tegesimbà amuk igsaen di diyà kenak sa mepion baelan da danà sa tandà hauwen di diyà sa ulim owoy tummin,a enù ka iya sa ukit i Iliyasal tumulù diyà si Hosuwa owoy sa langun tegeIslaél sa langun egbaelan da.”
22 Agulé pinangunutan i Mosis sa igsugù i Datù Nemula diyà kenagdi. Pinetigdeg di Hosuwa i diyà sa taengan i Iliyasal sa tegesimbà owoy diyà sa taengan sa langun tegeIslaél. 23 Agulé igtenà di sa belad di diyà sa ulu i Hosuwa owoy igpetiig di ma kagdi sa mekesambì kenagdi, enù ka iya sa igsugù i Datù Nemula diyà kenagdi.