21
Ini Denu Sa Galang Binaelan I Mosis Éhê Palas Uled
4 Na, egoh sa medoo tegeIslaél miglegkà dema diyà sa Getan Hol, mig-ukit da diyà sa dalan eg-angay diyà sa Dagat Akaba enù ka eg-iwoden da sa tanà Idom. Dodoo egoh da eg-ipanaw, neelut dé sa tali da 5 owoy sinelsel da dema Nemula i owoy si Mosis, guwaen da, “Maen di ya inuwit ko kami kedu Igiptu dò anì mematay ké diyà siini melabel tanà mediyù dalesan? Enù ka endà duen kaenen ké owoy endà ma duen sa inemen ké. Migtalawen ké dé egkaen siini mana sa kaenen lagà endà dé duen nanam di.”
6 Agulé pineangay i Datù Nemula diyà kenagda sa medoo uled mekehilu amuk memued. Huenan di, medoo sa tegeIslaél nematay danà da hinemued uled. 7 Agulé mig-angay sa medoo etaw dema diyà si Mosis, owoy guwaen da, “Nesalà ké dé danà ké migsumbung si Datù Nemula owoy diyà keniko ma. Na, simbai ko diyà kenagdi anì kedanan di sa medoo uled.” Huenan di, igsimbà i Mosis sa medoo etaw. 8 Agulé sinugù i Datù Nemula Mosis i anì baelan di sa galang éhê palas uled anì itagù di diyà sa kayu igbugsud. Enù ka amuk uminengteng daa sa etaw hinemued uled diyà sa galang éhê palas uled, endà mematay di. 9 Huenan di, binaelan i Mosis sa galang éhê palas uled owoy igtagù di diyà sa kayu igbugsud. Sumalà dé sa etaw hinemued uled, amuk inengtengen di sa galang éhê palas uled, endà mematay di.