13
13:1-16 Na, egoh sa medoo tegeIslaél mig-ipanaw diyà sa melabel tanà mediyù dalesan, mig-angay da diyà sa dapag tanà Kanan. Agulé danà sa igsugù i Nemula, hinemilì i Mosis sa uman sebaen kaunutan kedu diyà sa sepulù owoy duwa geumpung tugod i Islaél, owoy pineangay di kagda anì kuhien da sa tanà Kanan. Na, si Hosuwa owoy si Kaleb sa duwa ma maama diyà sa sepulù owoy duwa pineangay di egpekuhì diyà sa tanà Kanan.
Ini Denu Sa Medoo Mig-angay Egkuhì Sa Tanà Kanan
17 Na, egoh sa medoo tegeIslaél buyu dé migtebow diyà sa tanà Kanan, mig-ikagi Mosis i diyà sa medoo kumuhì hinemilì di, guwaen di, “Angay yu kuhì sa uwang tanà Kanan. Edung yu diyà sa sugud Negeb, agulé lagbas yu angay diyà sa getan-getan. 18 Hahaa yu temù sa palas iya wé tanà. Hahaa yu ma amuk épê egkegaga sa medoo etaw eg-ugpà dahiya ataw ka endà, owoy hahaa yu amuk medoo da ataw ka endà. 19 Owoy hahaa yu ma amuk mepion sa tanà da ataw ka endà. Owoy hahaa yu ma sa palas sa medoo menuwa da amuk duen kutà da ataw ka endà. 20 Owoy hahaa yu ma palas sa tanà da amuk kebaluyan langun hinemula ataw ka endà, owoy amuk duen medoo kayu dahiya ataw ka endà. Amuk pelikù yu dini, mepion amuk umuwit yu sa medoo mekaen bunga kedu dutu.” Na, iya sa inikagi di enù ka neuma dé sa sasang di egkelegà sa bunga palas.
21 Agulé inangay sa medoo maama egkuhì sa tanà Kanan, edung diyà sa melabel tanà pinengadanan da Sin denu kimataan taman sa menuwa Lohob medapag diyà sa benganga tuduk eg-angay diyà sa menuwa Hamat denu belabagan. 22 Na, egoh da mig-ukit diyà sa sugud Negeb, migtebow da diyà sa menuwa Hibelon kenà da mig-ugpà sa umpung tugod i Ahiman owoy sa umpung tugod i Sesayi owoy sa umpung tugod i Talmayi sa medoo tugod i Anak. Na, pitu gepalay sa lugay di nekehuna nemenuwa sa menuwa Hibelon diyà sa menuwa Sowan dutu Igiptu dò egoh anay. 23 Agulé egoh da migtebow diyà sa sugud Iskol, miggetas da sa panga palas épê segepungu bunga di tigtu mebegat, huenan di sineoyongon sa duwa geetaw. Migkuwa da ma sa bunga kayu pomegelanti owoy sa bunga kayu pigus. 24 Pinengadanan da iya wé sugud Iskola enù ka iya sa kenà sa medoo tegeIslaél migkuwa sa segepungu bunga palas.
25 Na, egoh di neuma epat pulù agdaw, iya da pelawà eglikù sa medoo migkuhì sa tanà. 26 Agulé egoh da migtebow, mig-angay da egtulon diyà si Mosis owoy si Alon owoy sa langun duma da tegeIslaél diyà Kades diyà sa tanà Palan sa melabel tanà mediyù dalesan. Tinulon da diyà kenagda sa langun hinaa da owoy igpehaa da ma diyà kenagda sa medoo bunga hinemulaan inuwit da. 27 Mig-ikagi da diyà si Mosis, guwaen da, “Nekeuma ké diyà sa tanà igpekuhì ko diyà kenami. Mepion sa palas iya wé tanà owoy tigtu egkebaluyan langun balangan hinemula. Haa yu, ini sa palas bunga sa hinemulaan diyà iya wé tanà. 28 Dodoo épê dakel egkegaga sa medoo etaw eg-ugpà dahiya. Tigtu dakel sa medoo menuwa da owoy duen ma sa kutà da. Owoy hinaa ké ma dutu sa medoo dakel etaw tugod i Anak. 29 Eg-ugpà sa medoo tegeAmalék diyà sa sugud Negeb denu kimataan. Dodoo getan-getan sa kenà da eg-ugpà sa medoo etaw Hétiyo owoy sa medoo etaw Hébusiyo owoy sa medoo etaw Amoliya. Owoy eg-ugpà ma sa medoo tegeKanan medapag diyà sa Dagat Méditeliya owoy diyà sa kilidan lawa’t wayeg Holdan.”
30 Agulé egpetemeden i Kaleb sa medoo etaw egselsel diyà si Mosis. Guwaen di, “Mangay ki dé gumila anì tepelen ta sa tanà enù ka mebagel ki doo owoy mekegaga ki ma meka diyà kenagda.”
31 Dodoo mig-ikagi sa medoo duma di migkuhì, guwaen da, “Endà megaga ta duu gumila sa medoo etaw dutu enù ka uman sa hagda kebagel diyà kenita.” 32 Huenan di, medaet sa tinulon da diyà sa medoo tegeIslaél denu sa tanà kinuhì da. Guwaen da, “Dutu siedò tanà, endà egpekeenget sa kedoo bunga hinemulaan diyà sa kedoo etaw di. Owoy tigtu dakel sa langun etaw hinaa ké dutu. 33 Hinaa ké ma dutu sa dakel etaw tegeNepilim tugod i Anak. Diyà sa penemdem ké, lagà ké daa kasuk, owoy hediya ma kéen sa kehaa da kenami.”