11
Ini Sa Egoh I Mosis Mighemilì Sa Pitu Pulù Kaunutan
4 Na, duen ma medoo etaw beken tegeIslaél mig-unut diyà sa medoo tegeIslaél egoh da migseesud-esud. Tigtu mesibelek da dé kumaen kaleni, owoy hediya ma sa medoo tegeIslaél, egselselen da Mosis i, guwaen da, “Mepion hedem amuk dumuen sa kaleni mekaen ta. 5 Enù ka netulengan ta sa medoo sedà kinaen ta egoh ta dutu Igiptu dò owoy endà duen bayad di. Netulengan ta ma sa medoo timun owoy gandulan owoy lansunà owoy bumbay owoy bawang. 6 Dodoo ini egoh di endà dé iseg ki egbagel. Endà duen kaenen ta liyu daa siini mana egkaenen ta uman agdaw.”
10 Na, dinineg i Mosis sa keselsel sa medoo etaw egoh da diyà sa selat sa medoo kemalig da. Huenan di, nebukul enù ka tigtu egbulitan i Datù Nemula kagda. 11 Mig-ikagi diyà si Datù Nemula, guwaen di, “Maen di ya egbegayan ko aken kelikutan, aken i egsuguen ko? Ngadan sa binaelan ku sa pesuwan di endà egketuuwan ka diyà kenak? Maen di ya binegayan ko aken sa galebek ku tegeipat siini medoo etaw? 12 Beken aken sa mig-anak kenagda owoy beken ma aken sa migpeduen kenagda. Huenan di, maen di ya guwaen ko aken sa eg-ipat kenagda lagà a daa sa tegegaet batà egseleban kenagda anì uwiten ku kagda diyà sa tanà igpasad ko diyà sa tupù da egoh anay? 13 Ngadan kenà ku i kumuwa kaleni sa ibegay ku diyà siini medoo etaw? Takà da egsinegaw diyà sa taengan ku owoy guwaen da, ‘Begayi ko kami kaleni.’ 14 Amuk aken daa, endà megaga ku duu umipat siini medoo etaw, enù ka miglowon sa kedoo da diyà sa naken daa egkegaga. 15 Amuk éhê ini sa egbaelan ko diyà kenak, imatayi ko dé aken lagbas amuk tuu sa egoh ko egketuuwan diyà kenak, anì endà dé meketigkel a siini dakel kelikutan.”
16 Agulé inikagiyan i Datù Nemula Mosis i, guwaen di, “Setipon ka sa pitu pulù maama kaunutan diyà sa medoo tegeIslaél, sa etaw netiigan ko mepion adat. Uwit ko kagda diyà sa taengan sa Dakel Kemalig kenà yu egsimbà diyà kenak anì tumigdeg da diyà sa dapag ko. 17 Tumenà a enù ka mikagi a diyà keniko dahiya. Kuwaen ku sa duma tunung ko sa igbegay sa Suguy ku diyà keniko owoy begayan ku ma kagda tunung kedu diyà sa Suguy ku anì metabangan da kuna maba sa keipat ko siini medoo etaw anì endà sebaen ko duu egbaba iya wé.”
24 Agulé mig-angay Mosis i egtulon diyà sa medoo etaw sa tinulon i Datù Nemula diyà kenagdi. Sinetipon di sa pitu pulù kaunutan tegeIslaél owoy pinetigdeg di kagda ulingut diyà sa Dakel Kemalig. 25 Agulé migtenà Datù Nemula i pineunutan gaeb owoy mig-ikagi diyà si Mosis. Agulé kinuwa di sa duma tunung i Mosis sa igbegay sa Suguy di diyà kenagdi egoh anay owoy igbegay di diyà sa pitu pulù kaunutan. Hê, egoh da linuhub sa Suguy i Nemula, mig-edung da egtulon sa kagi i Nemula egtebowtebow, dodoo endà iseg di nelugay.
26 Dodoo si Eldad owoy si Medad sa duwa maama diyà sa pitu pulù kaunutan hinemilì i Mosis, migpetangtang da daa diyà sa hagda kemalig, endà mig-angay da diyà sa Dakel Kemalig liyu diyà sa kenà da mig-esud. Dodoo linuhub da doo sa Suguy i Nemula, huenan di mig-edung da ma egtulon sa kagi i Nemula egtebowtebow egoh da diyà sa kemalig da. 27 Agulé duen sa melaud mig-angay egtulon diyà si Mosis, guwaen di, “Egtulon ma Eldad i owoy si Medad sa kagi i Nemula egtebowtebow diyà sa kenà ta mig-esud.”
28 Agulé mig-ikagi Hosuwa i anak i Nun salu i Mosis owoy kagdi ma sa sebaen sinaligan di. Guwaen di, “O Datù Mosis, hemalangi ko dé kagda.”
29 Dodoo mig-ikagi Mosis i diyà kenagdi, guwaen di, “Enù di ya, egkebukul ka denu kenak? Ungayà ku polo hedem ibegay i Datù Nemula sa Suguy di diyà sa langun etaw di anì tulonen da sa kagi di egtebowtebow.” 30 Agulé miglikù Mosis i owoy sa medoo kaunutan tegeIslaél diyà sa kenà da mig-esud.
Ini Sa Egoh I Nemula Migpeuwit Sa Medoo Pugù Diyà Kenagda
31 Agulé igpeuwit i Datù Nemula diyà sa kelamag sa medoo pugù kedu diyà sa dagat. Miglepal da sakamitelu kéen sa kehagtaw da kedu diyà sa tanà owoy migtenà da nekeulingut diyà sa uwang tanà kenà sa medoo tegeIslaél mig-esud. Segeagdaw ipanawen kedu diyà sa kenà da mig-esud, iya pelawà sa ilis sa neengkopon da. 32 Huenan di, neelut agdaw owoy neelut sigep owoy neelut ma sa keduwa di agdaw sa egoh da takà eghagkep sa medoo pugù. Nekeuma epat pulù owoy lima gesakù sa kedoo pugù nekuwa sa uman sebaen etaw. Agulé pinangus da diyà sa kenà da mig-esud. 33 Dodoo egoh di endà pa neimelut da duu sa kaleni diyà sa ebà da, binulitan i Datù Nemula kagda owoy pinelinadu di kagda temù taman nematay da. 34 Huenan di, pinengadanan da iya wé kenà Kiblot Hataba enù ka iglebeng da dahiya sa medoo etaw tigtu egkesibelek egkaen kaleni.