याकुब बेतेलतगा मल्स वास्तोग़
35
1 अह आतस्के पया देवुळि याकुबिन वळ्ह्कता, “निमा इग्डाह पेसिसि बेतेल नाटे अनजि, अगान रोमिस मन. मीदादाल एसाना रेयतेनाह्क वितसोर मतिन, अस्के नीकु अदे नाटेनगा लेका ईस वळ्ह्कतन, तान सीता कीसि निमा बेतेल नाटेनगा एवतस्के अगा नयेनाह्क उंद गर्या पंडा,” इनजोर इता.2 अस्के याकुब तना लोतोरिन, ओसो ओना संगे मनवालोर सबेटोरिन केयिसि इतोग़, “मियगा मनदनव सबे माविस्किन तेंडिस पोहचीम्ह्ट, अह कीसि मीट सबेटोरु बेस एग़ मीसि बेसताङ गेंदेङ उहाटु. 3 माट इंजेके इद जागातुन विळ्सिसि बेतेल नाटेनेके दाकल, अगाने नना देवुळता सीतातेनाह्कु उंद गर्या पंडकन. बाराह्क इतेके, नना बेरा तिपलते मतस्के अदे देवुळ नावा अर्जतुन केंजता; अहे नना बेके अतेकायि अदे नावा तोळ मंदु,” इनजोर इतोग़.
4 अदिनेनाह्क ओरगा बेचोको माविस्क मताङ, अहे ओर तमाङ केव्कनगा तासतव बारिङ, अव सबेटविस्किन जमा कीसि याकुबना कयदे ईतोर. पया ओग़ु अविस्किन सेकेम नाटेना ऐरे मनदनदु बेरा उंद मरा इळ्न ओसि मिसिसीतोग़.
5 पया ओरु अग्डाह पेसिस अतोर. अस्के अद सेकेम नाटेना सर्ने मतव सबे नाह्कनोरिह्कु देवुळतेनाहि पका रेय दल्गता. अदिनेनाह्क ओरु याकुबिना ओसो याकुबना पेकोरा पयाह अनोर.
6 उचुक दियाना पया याकुब तना संगे मतोर सबेटोरा संगे कनान देसेमता लुज नाटे एवतोर. (अद लूज नाटेनु बेतेल वने इन्दुर.) 7 अगा याकुब उंद गर्या पंङटोग़, अह कीसि अद जागाता पेदिरि ‘एल-बेतेल’ (इतेके “बेतेलते दिसतदु देवुळि") इनजोर तासतोग़. मुने वेग़ु तमदादाना रेयतेनाह्क वितनेके देवुळ ओन्क अगान दिसिस वळ्ह्किस मता.
8 बेतेल नाटे मनेके, याकुबिना तलोग़ि रिबकाना सेवा-साकुर कीयनदु सेळो, दबोरा इनदनदु, डोलता. अद सेळो याकुबनाङ मुतेस्कना वने वेल्लाङे वर्साङ सेवा कीता. तान अद नाटेना कचुल मता उंदि पूसa मरा इळ्नु पोहचि अळतोग़. अदिह्के पया अद मरातुनु ‘अळयानद पूस मरा’ इनजोर इतोर.
9 इद्रमलेह्का याकुब पदान-अरामताहि (इतेके मेसोपोटामियातग्डडाह) मल्स वासि बेतेल नाटे मतोग़. अगा मनेके, देवुळि ओसो वने दुस्रा मल्का याकुबिन दिसिसि वळ्ह्कता. 10 देवुळ इता, “इंजेक एवनाह नीवा पेदिर याकुब मता, इंजेटाहि नीकु याकुब इनोर आयनुर, मति इस्रयेल इनदनुर,” इनजोर इता.b इद्रमलेह्का देवुळि ओना पूना पेदिर तासता.
11 ओसो देवुळ ओन इता, “बेरा डीसाता देवुळतन ननान आंदन! नावा देय्वाते मीवोर बोल्गिर! मीवोर उंद बेरा देसेममेंड आयिर, अहे वेल्लाङे देसेह्क वने आयिङ! नीवाय कुट्मळताहि राजालोर पुटटनुर. 12 बेद बूमि, नीवा तादो अब्रहमिह्क, ओसो नीवा बाबाल इसकिह्क ईस मतन, अद बूमि इंजेके नीवा कयदे ईय्ह्नन. ओसो इद बूमि नीवा पेग़्केडोर पिला-वाळामतुह्क वने आयग़ा,” इनजोर इता. 13 इव बर्कतताङ पोल्लोङ वेहचि पया देवुळि अग्डाहि पोग़ोन अता. 14 बेद जागातग्डाह देवुळ याकुबिन वळ्ह्कता, अगा ओग़ु ताना सीना इनजोर उंद बंडा निल्पिह कीसि, अंगुर जोमा ओसो नेय दोसतोग़. 15 अह कीसि पया, ‘देवुळि इद जगातगा वासि नाक वळ्ह्कता’ इनजोरे ताना पेदिरि बेतेल (इतेके “देवुळता लोनु") इनजोर तासतोग़.
रागो सेळो डोलिह्ता
16 पया ओरु बेतेलतुन विळ्सिसि एप्रात नटेनेके दायालाह पेसतोर. अगा एवयाना मुने याकुबिना उड्ला मुते रागोना रिकम आयनाङ दियाङ एव्स मताङ. 17 अस्के अदु वेल्लाय तिपल आंदु. तान पोयानदु सुईन सेळो इता, “निमा रेयमा अवा नीक ओसो वने ओर्वोग़ पेकाले पुटनोग़,” इनजोर इता.
18 रागो अचोन तिपल आसि ताना जीवा पेसतप आंदु, जीवा अनेक-अनेके ओग़ पेकान ऊळिसि बेनोनि (इतेके तिपलते पुटटवाल पेकाल) इनजोरे पेदिर तासता. अह इताहे ताना जीवा पेसता. पया ओना तपे ओग़ पेकाना पेदिरि बिन्यमिनc इनजोरे तासतोग़.
19 इद्रम आसि रागो डोलता. तानु एप्राता नाटेनेके दायना अग़दा कचुलि पोहतोर. (अद जागातुन इंजेके बेतलेम इंतोर) 20 याकुबि रागोना गुमयातगा कल बंडा ओग़्सतोग़ . ताना कल बंडा नेंड एवनाह अगा मन्ह्ताये. 21 पया इस्रयेल, ओग़े याकुबि, अग्डाह पेसिस अनजि एदेर नाटेना दडता अबरि तमाङ टमिङ तेहतोग़.
22 अगा मतस्के रूबेन तना तपे तासिस मतद ओर्युल आंचाळि बिल्हाना संगे मतोग़. इद पोल्लो तपेह्क एर्का आतस्के ओग़ नारज आतोग़.
याकुबनाङ बारा मग़्कु
23 याकुबिह्क बारा मग़्कु मतोर. लेहलिना पोटाते पुटटोर आग़वुर: माळा पेकाल रूबेन आंदोग़, ओना पेग़्केडोरु सिमियोन, लेवि, यहुदा, इसाकर ओसो जबुलुन वेरे पेकोर आंदुर. 24 रागोना पोटाते पुटटोर: योसेप ओसो बिन्यमिन वेर इर्वुर आंदुर. 25 रागोना सेवा-साकुर कीयनद बिल्हानाङ पेकोर: दान, नपतालि वेर इर्वुर आंदुर. 26 ओसो लेहलिना सेवा-साकुर कीयनद जिल्पानाङ पेकोर: गाद, आसेर. याकुब पदान-अरामते (इतेके मेसोपोटामियाते) मनदह्पा पुटटोर मग़्कु वेरे आंदुर.
इसक मुय्तोग़ डोलिह्तोग़
27 पया आक्रि याकुब तनाङ मग़्किरा संगे तना तपे इसक मनदनद मम्रे इनदनद नाटे एवतोग़. अद नाग़ किर्याता-अरबा (इतेके हेब्रोन) नाटेना ऐरे मता. मुने तना तादो अब्रहम मुय्तोग़ वने अदे बूमतगा जागा आस मतोग़.