पुटमुळि 34

सेकेम नाटे बेरा कट्‍ला

1 सेकेम नाटेनगा मनदह्‌पा याकुबना पिलाङ-पेकोर बेर्सतोर. उंद दिया बाताल आता इतेके याकुबना मयाळि दीनाल इनदनदु, लेआलिना पोटाते पुटटदु, अग्डाङ पिलान कलियिस वायकन इनजोर अता. 2 अस्‍के अग्डोग़ गाय्ताल हामोर इनवाना मग़ि सेकेम इनवाल पेकाल (वेरु इवति जातिनोर) अद दीनान ऊळिसि, आटमूट पोस ओसि ताना इजकतुन करब कीतोग़. 3 पया अद पिला बेस दिसिह्‌ता इनजि विचर कीसि, ताना संगे गूनमताङ पोल्‍लोङ वळ्ह्‌कतोग़. अह कीसि तान लोन ओतोग़. 4 पया ओग़ु ताना लोप्पाडाङ पोल्‍लोङ तना तपेनगा अनजि वेहतोग़. “नाक इदे पिलातुन मर्मिङ कीस ईम बाबा,” इनजोर इतोग़.

5 गय्‍क मनजि पया याकुबिह्‌कु ओग़ सेकेम इनवाल पेकाल तन मयानु करब कीतोग़ इनजि एर्का आता. मति अस्‍के ओनाङ पेकोर लोन इलेर, तमाङ एर्रेङ-गोरेङ मेहतलाह ओस मतोर; अदिनेनाह्‌कु ओर वानाह जोम ओग़ केमेन मतोग़. 6 अस्‍केने तपे ओसो सेकेम वेर मग़ इर्वुर याकुबनेके पोल्‍लोङ कीयलाह वातोर.

7 अ‍दे जोकने याकुबनाङ पेकोर गेळातेनाहि कोंदाङ मेहचि लोन वातोर. ओर वासि इव पोल्‍लोङ केंजताहे पकाय नारज आतोर, ओङ आतोर. “मावा एलोन कय कीसि वेग़ मावा इस्रयेल लोकुरा मोकम एग़ रेहतोग़, इद्रमताङ पोल्‍लोङ मावा नडुम आयनय आयो,” इनजोर इतोर.

8 मति पेकाना तपे इतोग़, “मीवाङ काल्‍क आय मोळ्‍किह्‌नन डा, नावा उंद पोल्‍लो केंजाटु, नावा मग़ि मीवा पिलातुन पकाय जीवा कीस्‍तोग़, अद पिलातुन ओन्‍के ईम्‍ह्‌टु. 9 इद्रम कीसि मीट मावा लोकुरा संगे बेस एळ्म कग़्साटु; मीवाङ पिलाङ माक ईम्‍ह्‌टु, ओसो मावाङ पिलाङ मीट ओम्‍ह्‌टु. 10 इद्रमलेह्‌का मीट मावा संगे कलियिस मन्‍ह्‌टु. इद मावा बूमते मीक बेगा विचर वास्ता अगा मन्‍ह्‌टु. इगा मनजि मीवा पिसना पिसवेग़ ऊळाटु, जागा-पग़्सा कीम्‍ह्‌टु,” इनजोर इतोग़.

11 अस्‍के ओग़ पेकाल सेकेम, अद पिलाता तपेनु ओसो तमदादालोरिनु इद्रम वेहतोग़: “नावा पेटळ दया कीसि मीवा पिलातुन ईम्‍ह्‌टु. मीट बह वेहतेकायि नना केंजकन. 12 मर्मिना कर्सातेनाह्‌कु बेद गावले अद नना ईकन. बेचोने ताल्‍ह्‌काटु नना ईकन. मति मीवा पिलातुन मात्रम नाक ईमटु,” इनजोर इतोग़.

13 पया याकुबनाङ पेकोर, ‘वेग़ सेकेम मावा एलोना इजक ओतोग, वेन विळ्‍सवाल’ इनजोर तम-तमय विचर कीसि कोदा तासतोर. मति ओरा मुनेह इद्रम वळ्ह्‌कतोर. 14 “माट पिला ऐवोम मीट हिति लोकुरगा इतेके डायना रिवजे इले. अद्रमतोरिह्‌क मावा पिला ईतोम इतेके, मावा इस्रयेल लोकुरा नडुमि मावा इजक मनो आयग़ा. 15 अदिनेनाह्‌कु मावाङ पिलान ओयना इतेके मावा लेह्‌का मीट सबेटोरिर डायना रिवज कीयना गावले. 16 अहे कीकोम इतेके, माट मावाङ पिलाङ मीक ईकोम, ओसो मीवाङ पिलाङ माट ततकोम. अस्‍केन माटु मीवा नडुमि जागा-पग़्सा कीस मनदकोम. मनजि, माट सबेटोर लोकुर उंदिय आयकल. 17 मति मीट बार मावा पोल्‍लो केंजिविर इतेके मात्रम, माट मावा पिलातुन पोसि इग्डाह पेसकोम,” इनजोर इतोर.

18 ओराङ इव पोल्‍लोने वेर मग़ इर्वुर गिर्दा आसि, “बेसेरा, मावा लोकुरिन इद पोल्‍लो वेहतकोम,” इनजोर इतोर. 19 ओग़ पेकाल, याकुबना पिलातुन ततकन इनजोर इचोन कंद्रेम आतोग़ इतेके, ओग़ इद कबळतेनाह्‌कु पेग़्के-मुनेह आयोग़. ओग़ तपेना लोते ओर्वोग़ माल्‍काल लेह्‌का मनदोग़, लोकुर ओनु बेस मान ईन्‍दुर. 20 अदिह्‌क पया याकुबनग्डाहि पेसताहे वेरु तमा नाटेना दायना-वायना अग़दगा अनजि तमा लोकुरिनु वेहता बोटटोर. 21 “इह केंजाटु, वेर इस्रयेल लोकुर इतेके बेस्‍ता मन्‍कालोरु, मावा संगे बेस कलियिस-मलियिस मनदनुर. अदिनेनाह्‌क ओरु मयागने जागा आस मनजि बेस पिसिर. मयगा इतेके वेल्‍लाय जागा मन्‍ह्‌ता. पया माटु ओराङ पिलान ततकल, मावाङ पिलान ओरिह्‌क ईकल. 22 मति ओर इन्ह्‌तोर मुने ‘मावा रिवज लेह्‌का मीट सबेटोर कोय्तोर वने कीम्‍ह्‌टु. केविर इतेके, माट मियगा कलियिस मनदा पग़वोम,’ इनजोर इन्ह्‌तोर. अदिनेनाह्‌क माट इंजेके बार कीकल? 23 इंजेके मीटु इदिना सीता कीम्‍ह्‌टु. ओर मय‍गा मतेके, ओरगा मनदनवु सबे मालसोम, एर्रेङ-गोरेङ, मूरेङ-कोंदाङ ओसो अनम-दनम इव सबे मावाङ आयोङ आयनुङा? अदिनेनाह्‌कु मावा इद पोल्‍लो केंजाटु. माटु ओर वेहतप लेह्‌काने डायना रिवज कीकल, अस्‍केने ओर मावा संगे क‍लियिसि मनदनुर,” इनजोर इतोर. 24 अस्‍के अद नाटेनोर सबेटोर ओग़ गाय्तानाङ पोल्‍लोङ केंजतोर. अहे अग्डोर पेकोरा-कोय्तोरा उंदिय दियाते डायना रिवज कीतोर.

25 मूंड दियाना पया, अद नाटेनोर सबेटोर कोय्तोर नोमुस्‍कने कुरमुटिस मतस्‍के याकुबनाङ मग़्कु सिमियोन, लेवि (वेरु उंदिय पोटाते पुटटोरु दीनाना कासा दादालोर) तमाङ तल्वर्क पोसि रेयलेवा नाटेनगा ओळियिसि, सबे कोय्तोरिन हव्‍कतोर. वेरु इद्रम कीयनुर इनजि बोरे सीता वने केवोर आसि, अदिह्‌के वेरिन रोमिह केवालोर बोरे इलेर. 26 सेकेमिनु ओसो ओना तपेनु हव्किसि, तम एलोनु ओरा लोतग्डाह पेहचि ओतोर. 27 पया याकुबनाङ पिसतोर मग़्कु वासि, अद नाटेनोर डोलता ऊळिसि, ओरा सबे मालसोमतुन पोसि ओतोर. तमा एलाना लजा कीताह्‌कु ओर इद्रमता बद्‌ला एतोर. 28 नाटेनोराङ एर्रेङ-गोरेङ, मूरेङ-कोंदाङ, गाळ्‍दिङ ओसो ओरगा बेचोन अनम मता, अद सबे पोस ओतोर. पोलमतगा मतद बेदे सामनतुन वने विळ्‍सोर. 29 अचोने आयो मति अग्डोर पिलाङ-पेकोरिन, आस्‍किन वने दोहच ओतोर. ओसो ओराङ लोह्‌कने बाताङ-बाताङ मताङ अव सबे पोस ओतोर.

30 अस्‍के याकुब तनाङ मग़्किरिन इतोग़, “मीट नाक बूळेह कीतिर रा! ओर इतेके माक विळ्‍सोर आयनुर, इग्डोर कनानि लोकुर ओसो परिजि लोकुर नारज आयोरा, ओरा मुनेह माट ओसोय कमि लोकुराल मह्‌नल. ओर सबेटोर आसि मावा पेटळ वायनुर, मावा लोतुन कुटा-कुटा कीस पोहतनुर.” 31 मति ओनाङ मग़्कु सिमियोन, लेवि इतोर, “बह मावा एलान ओग़ बोगेस्‍कना लेह्‌का कीतेक बेसेया? माट बह ऊळिस मनदकोमा?” इनजोर इतोर.