मत्याल रासतद बेसता कबुरि
उंद दिया बार आता इतेके, राजाना वग़ोग़ कोत्लाल नीवा लोतगा वातोग़. “नाळि राजाल नीक कलियलाह वायनोग़,” इनजोर ओग़ कबुर वेहतह्‌तोग़. पया नीवा कयदे उंद पुस्तक ईसि नीक इन्ह्‌तोग़, “इद पुस्तक अर्विसि राजाना लोप्‍पा कतम पुनदकिन. पया ओग़ वातस्के निमा तयर आयकिन.”
“देवुळ लोहतोग़ पिसिह केवाल येसुराजाल मावा बूमते वातोग़,” इनजि मत्याल इद पुस्तकते माक कबुर वेहतह्‌तोग़. वेग़ येसुराजाल मीक जीवा कीसि, तना राजेमते ओयलाह मीक पर्ह्‌किह्‌तोग़. अद राजेमते मीटु अमेसा-अमेसातुह्‌क ओना संगे गिर्दाते मनदा पग़यकिर. इद पुस्तकतुन अर्विसि मीटु ओनु बेस पुनदा पग़यकिर.
मत्याल ऊक-ऊके यहुदि जाततोरा सास्त्रमता सीता कीस्तोग़. अद सास्त्रमते रासतपु यहुदिरा बेरोग़ राजाल दाविद, वेना राजपुळ्गते येसुसामि पुटटोग़. मति यहुदिर केपसोर मतपु येसु इद दुनियाता राजानलेह्‌का आयोग़. ओग़ उंद पूना रीतता राजेमतुन निल्पिह कीयलाह वातोग़.
मत्याल मुने सिद्‌वा एनवाल मनजि कोताना ऊपे जीवातोग़ मंदोग़. मति येसु ओन केयताह्‌कु, ओग़ तना लालुसतुन पोहचि येसुनाङ कग़यलाह अतोग़. अद्रमलेह्‌का वेन केयतपु, येसुराजाल मीक वने नेंड केयसोर मन्ह्‌तोग़. ओग़ तना राजेमि मीवा जीवातगा निल्पिह कीयलाह ऊळिह्‌तोग़.