Ruːnéképé Turbinam
4
Kapilaːné Kiristobí adin-amírro duːgém doto, bík méngkamdémpé nolu aíkídíːdéːsin méːpaːyé, kapéné séːkoi adin-amírro duːg dodoji bí paːbém ingasudag. 2 Suːpakkolokké moːpíso nolu turra duːdag takamdo Ruːnéké méngkampé turpa:yé taniːlok aiman méːbonamki turpaːmaːyé. 3 Kapéné uiːkumné okkom ilíːdang, langgonam, aimaːném méːbonam, doman-tíːman, tíngursunam, okkomsin kangkingémaːdop tíːnam, odokké tayumkannam moimang kumnam, édémbulum ila nolu píːnamkopé ayírém lekkem gíbadmoto. 4 Odokké suːpag nolu uiːkumnékídíːdok lédílo lekoné agerém germínmaːnamdém kaːla bulu méngaksula nolum lukaːdung. 5 Émpigeːla buluk aíké inamdém Ruːnémé lukansubipaːyérung, séːko turnémna sinném kébaːbaːpé émna lenna duːbong. 6 Odok-légaːpé suːpakké sila duːnékídíːdém tatpon lutatsém lugoːbika, tani kísapé bulum adin-amírro kébaːbanggom, Ruːnékémpé bulu yalolo turyépé.Ruːnék Binam Amandok Ainé Menejar
7 Appíng attarrok yogdé kérapé píngadoːbo. Édémpila kumnam légaːpé aíé-tejisula totsula duːlang. 8 Appíngkémyang tayéːpé, akoné akoném oːríːpé ayamínsulang, kapilaːné ayaːdé bojérungko paːbém takkombidag. 9 Marmínsumaːpé akoné akoném mibo-bolang. 10 Appíngé kapé amanko paːtuːji, édém Ruːnéké bangkí bangkíné aséːdo ainé menejar kísapé, akoné akoném gerdumsunalang. 11 Séːkoi agom lubidoji, édém Ruːnék agomki lumolang. Séːkoi agergerdoji, Ruːnék binam tornamno édém gerrang, odo Jisu Kiristokokki appíːlo Ruːném unjígmoyé. Unjígélang tornamé loːdílongkípé bíggíngké. Amen.
Méngkésuné Kísapé Duːg Donam
12 Méːbomsunam ajonkídínga, nolum ankaːnam dorné umí kísan ankaːdém nolu méngaksuyok, oːkai ipémaːnamko nolukkolo idung émna méːyok. 13 Émpigeːla méːpolang nolu Kiristoké duːgdém domíndung, édílo bík unjígdém léngkanyen odo nolu airuːpé méːpoyépé. 14 Kiristoké amindok légaːpé nolum lukaːduːmílo, nolu ayang-paːné, kapéné unjígné Yalodé, okodé Ruːnék Yallon noluk tayéːlo duːrasula dung. 15 Nolu duːgém domílo édé mokela, dopso:la odokké amik agerro níkpolila paːnampé ipé lagimang. 16 Émgom nolu kiristan kísapé duːg domílo, édém nolu anyisuyok, émpigeːla Ruːnémé aipai bilang kapilaːné nolu Kiristoké aminém gébomdag.
17 Kapéné kébaːdém baːrobnan ayírdé píngadobo, odokké Ruːnéké aíké taniːkídíːdém baːroppoːyé. Odokké édé ngolukkolo irobmílo, Ruːnék tatpon lutaddém méngkésumankídíːdok lédílo kapé baːtéryén? 18 Kapéné Ruːnék-gomugé ludag,
"Arolok-duːnémméːi kappouji moturbimílo,
Ruːném-kinmaːnélaː imurnékídíːdokkolo okko kapiyén?"a
19 Édémpila séːkobulu édé bulukképé Ruːnék méːnamé émna duːgém dodoji, bulu aíé buluk aroné Ruːnémé tolíksupénammé odokké ainé agerém geryarpénammé.