Yamnékídíːdéːlang Milbongkídíng
3
Édémíːpé, yamnékídínga noluk milbongkídíːdo kéíksulang, buluk araːdo séːkai Ruːnék agomém méngkésumaːmílo, noluk ainé séudé bulum méngkésumoyé, odo nolu agom apirkosin lupénammé kamaːyé, 2 kapilaːné éddík naréla pésoménggédang noluk ainé séudém bulu kaːbegyé. 3 Noluk kangkannamdé ruːyidok tíːbunamdokké lenpé lagima, gérné dumítki odokké aín bangé génamkila arékané génambomnamkimang. 4 Édémpimap, édé noluk aíké araːdokké, édíloːsin gípagman ajjisunéla ansíné yalolok kangkandé, okodokké Ruːnék kanggaːlo airuːpé arré kadang. 5 Kapéné lekeké angunné mimékídíːdé séːko buluk akaːnamdém Ruːnékolo tolígdaggan, bulu aíé buluk milbongkídíːdo ajjisula aíém kangkanmodagai. 6 Sara:bí édémpé idagai; bí Abraamké agom-taddagai odokké bím bík ruːtum émna gogdagai. Nolu ainém imílo suːpag bík ommé odokké nolu okkomsin pésomaːyé.7 Édémíːpé nolu milbongkídínga, noluk yamnékídíːdok lédílo kinna duːjonsulang, rémagyan ajoné émna sabla bulum ménggésunamém bilang, kapéné bulusin noluk lédílo Ruːnék binam turnamnok aséngém paːyé. Okkosin noluk kumnamém motummaːdopé édém ilang.
Ainé Agerém Gernam Légaːpé Duːgdonam
8 Léddarso, nolu appíngé lékoné asiném gélang. Akoné akoném asinang-omínsulang. Akoné akoném ayaːmínsulang, odokké asiné-rémagla ajjisulang. 9 Aimaːném aimaːpé odokké pelígnammém pelígnampé bilatsuyokuk, émpigeːla peyunamno biladlangku, kapilaːné odok légaːpéi nolum goktag édémpila nolu peyubinamko paːyépé. 10 Kapéné Ruːnék-gomugé ludag,
"Séːkoi turnamém aipé-méːyeji
odokké ainé longém kaːlíːyeji,
aima:ném lupé lagimang
odokké aromaːném lungasupé lagidag.
11 Bí aimaːnélokké gíladlangkula ainém ikupé lagidag;
bí asin-ansíngém mala édém mamínpé lagidag.
12 Kapéné Ruːtumbí arolok-duːném kanggabbomdag;
odokké buluk kumnamém tadbidag;
émpigeːla aima:ném gernékídíːdok kekonpé bí dagrobdag."a
13 Nolu ainé agerém gerrímílo séːko noluk aima:namko méːyén? 14 Émpigeːla okodé arodang odok légaːpé nolu duːgém dopénampé igom, nolu ayangém paːné. Buluk morídnamdém pésoyok, odokké méːdíryok. 15 Émpigeːla Kiristomé noluk asinki Ruːtumpé ménggésulang. Odokké séːkai nolukkolok duːné akaːdém lusattei émna taumílo édém lusarbipé appíng ayírro lennola duːlang, 16 émpigeːla édém ajjisula ménggésula lulatsubilang. Noluk méːloddém narépé méːlang, odo édílo nolum lukaːyéji, séːkobulu nolum Kiristolo gímínné kísapé noluk ainé séuém aimang émna ludagji, buluk lunamdé buluk anyisunampé iyé. 17 Kapéné édé Ruːnéké méːnammílo, aima:ném igeːla duːgém dotaying, ainé agerém gergeːla duːgém donamdé aiyaːdag. 18 Kapéné arolok-duːnébí arolok-duːmaːnélok légaːpé, nolum Ruːnékoloːpé gíabokunam légaːpé Kiristobí appíngkképé léko paːb légaːpé sibikang. Bím adin-amírro moketo émpigeːla Yaloki turmotoku, 19 édé yalodokki bí gíla makanaːlok duːné yalokídíːdém lugoːbito. 20 Édílo Nuabí bík bottén olludém omna dungngan odo ayírdok Ruːnéké oijosula toyaːla duːnam édébulu agom-tadman édé yalokídíːdéai. Assidokki bottén olluːdo ajjiːoko taniyém moturbito, tani piːnyongkoném, 21 édé asidé kanggotkai okodé baptis laːnamdoːpé sutkanbidung, okko nolum suːpag moturbidang. Sidé amírdok koyaːdém írpubinammang, émpigeːla Jisu Kiristoké lékod-turkunamdo, ainé méːlotki Ruːném pesubinamko, 22 Jisubí séːko tayéːtoːpé gísangkangku odokké Ruːnék lagbígdo dung odokké takam tayéng-yaːmeye, ilang-gílangkanékídíːdé odokké tornamkanékídíːdé bíkkolo kéíksudag.