Turné Ílíːdéːla Angunné Réngamdé
2
Odok-légaːpé aíém appíng aimaːnamnokké, yadgoːnamnokké, séumonamnokké, dígmunsunamnokké, lukaːnamnokké moːtéːpé duːlang. 2 Anupé onam ojíng kísapé, yalolok molusumaːnam gakírém malang, odo odokki nolu nolum moturbinamdo puːpojaryépé, 3 kapéné Ruːtumbí aidag émnamdém suːpag nolu ankaːtagbo.4 Nolu Ru:tumkodoːpé gílang, édé turné ílíːdoːpé, okodém taniyé típakto, émpigeːla Ruːnébí balentag odokké édé bíkképé airuːpé arré kadag, 5 nolusin turné ílíng kísadag, angunné mirípé idopé Ruːnébí nolum yalolok kumliːpé mola dung, okolo nolu angunné mirí kísapé yalologla toríksunam amaném Jisu Kiristokokki Ruːnékoloːpé tosaglígyé. 6 Kapéné Ruːnék-gomugé ludag,
"Ngo arékané ílíngko batag,
okodém ngo Jaondok sungkendok tígodlígnam ílíːpéa tíyé;
odokké séːko bím méːtinsuyéji bí édíloːsin anyisumaːyé."
7 Suːpag nolukképé séːkobulu méngkésudagji, séː ílíːsé arrékadag. Émpigeːla séːkobulu méngkésuma:ji bulukkoloːpé,
"Okum-monékídíːdok típagnam ílíːdé
sungkendok tígodlígnam ílíːpé ikang,"
8 odokké
"Ílíngko okodé taniyém lésutsumodagji
odokké torné ílíːdé okodé taniyém kéttabmodang."b
Bulu lésutsudag kapilaːné bulu agomdém méngkésumang- odokké odoːpéi bulum ruːlíktag.
9 Émpigeːla nolu balennam taniyé, migom mirí-opíné, angunné réngamko, Ruːnék aíké taniyé, Ruːnéké méːpílaːmaːnam agerkídíːdém lugoːbidopé balentag, Ruːnébí nolum kémolokkém bík aíké méːpímaːnam píadoːpé goglentag. 10 Lékonkém nolu Ruːnék taniːmangngai, émpigeːla suːpag nolu Ruːnék taniyé; lékonkém nolu ayangém paːmangngai, émpigeːla suːpag nolu ayangém paːtag.
Ruːnék Pagbokídíng
11 Méːbomsunam ajonkídínga, ngo nolum kumdanna ludung, séː moːpíso kangkinmaːnamélang pamdoné taniːkísapé, adin-amírrok méːbolokké moːtéːpé duːlang, okodé noluk iji-yalodok kekonpé mimagém modag. 12 Uiːkumnékídíːdok araːdo aikangkanpé duːlang, bulu nolum aimaːném idag émna lujémdaggom, bulu noluk ainé agerém kaːla Ruːnéké gíladdoku édé longédo bulu bím luyitsuyé.
13 Ruːtumké légaːpé nolu taniːlok appíng ilang-gílaːlo ajjisulang; migomdém kéíksulang bí kínggípagyaːnédé, 14 odokké amoːruːtumkídíːdém séːkobulum aiman ager-gerném mokemoramdopéla ainé ager-gerném luyitsudopé bí tolíktag. 15 Kapéné Ruːnébí méːdag noluk ainé ager-gernamki makkorné taniːkídíːdok monban agom lunamkídíːdém lungasomotok émna. 16 Ilan taniːkísapé duːlang, émpigeːla noluk ilaːnamdém imurém takkomnanékopé inayok; Ruːnéké pagbo kísapé duːlang. 17 Appíngém asinbokké ménggésulangː Méngkésun bírrangkídíːdém ayaːlang, Ruːnémé pésolang, migomdém ménggésulang.
Kiristoké Duːgdonamdém Kaːyisunam
18 Pagbokídínga, appíng ménggésunamno nolu aíé noluk ruːtumkídíːdo ajjisulang, séːkobulu aila ansídagji bulugongkolomang, émpigeːla séːkobulu makkeresiyaːdagji bulukkkolosin ajjisulang. 19 Noluk paːpémaːnam ngasodlo nolu oijosumílo, odok légaːpé Ruːnébí nolum ayaːyé, kapilaːné nolu bík méːnamdém kindag. 20 Imurém igela nolu díngkosunamdém oijosumílo, odo oko luyitsunamé dun? Émpigeːla ainé agerém gergeːla duːgém oijosumílo, odok légaːpé Ruːnébí nolum ayaːyé. 21 Odoːpéi nolum goktag, kapilaːné noluk légaːpé Kiristobí duːgém dobito, édémpila nolu bík lékorkorkodo kormíndopé, bí nolum kaːyisunamko mébitag. 22 Bí édíloːsin imurém imangai; odokké édílai séːkomsin yadmangai. 23 Édílo bím lukangkan, bí séːkomsin lukaːlatsutomang, édílo bím duːgmoton, bí alígém laːyé émna morítsutomang, émpigeːla bí Ruːnémé méːtinsuto séːko aro-kébangém baːbidang. 24 Ngolu paːblo sidopé émna odokké arolok-duːnam légaːpé turdopé émna bí aíé bík adin-amírdo ngoluk paːbém ísí tayéːdo joːlíksuto; bím mojognamdokki nolum ésaːmotoku. 25 Nolu lambé gíyongksuné meːrémpé idaggai, émpigeːla meːr-kaːsínédémna ngoluk yalodém Kanggabinédok lédulo gímíndopé nolum suːpag gíladbotakku.