1 Pitor
Pitorké Adgotpoːnam Doːjíg
1
Séː doːjíksé Jisu Kiristoké mélígnam Pitorkolokké,Ruːnék balennam taniːkídídoːpé séːkobulu pamdoné kísapé Pontasdo, Galatiaːdo, Kappadosiaːdo, Esiaːdo, odokké Bitiniaːdo dukpitsula dun. 2 Ruːné Abuké ager légaːpé bí nolum balentag odokké Jisu Kiristoké agom-taddopéla bík iːdokki narédokupé, bík Yaloki nolum angunné taniːpé imotag.
Aséngéla asin-ansíngé noluk asinno biːpogdopé dungkaːlangka.
Turném Akaːnam
3 Kajé ngolu ngoluk Ruːtum Jisu Kiristoké Ruːnéméla Abumé aipai bilaiǃ Bík bottéruːné ayaːdo Jisu Kiristom sikodokkém turmokunamki bí ngolum anu turnamno turné akaːnamko bitag, 4 odokké édíloːsin yogma:né, yaːmaːné émmamílo rogmaːné panggom noluk légaːpé tayéːté léːbitag. 5 Édébulu nolukké, séːkobulum méːjígnamki Ruːnék tornamno moribila léːbitag, mortubinamdok légaːpé okodém gíngabdí ayírdo léngkanbipé émna moninsutag.
6 Odok légaːpé méːpotok, ngoluk bojéko bangkí bangkín ankanam ngasotkídíːdo suːpag ajji ayír légaːpé nolu duːgémsin dopénampé iyé. 7 Noluk méːjígdé arro émnamdém léngkannamdé buluk agerdé. Kangítok aíndém, okkom momíglaːdang, édém umíki romkaːdo; édémíːpé noluk méːjígdém, okodé aíndémyaːsin bojéruːngko arré kayaːdag, édémpila ankapé lagidag, édémpimílo édé oijosula duːyé. Odo édé Longédo édílo Jisu Kiristom léngkanbiyéji nolu luyitsunamém, unjígém odokké ménggésunamém paːyé. 8 Nolu bím kangkéíma, émgom nolu bím aipé-méːdag, odokké nolu bím suːpaksin kangkímang, émgom nolu bím méngkésudag odokké lubisula:maːnaméla unjígné méːpolo píːsíːla dung, 9 kapilaːné nolu noluk iji-yalok moturbinamdém paːdung, bím méːjíksula noluk duːnamdok légaːdé éddéi.
10 Séː moturbinamsok tayéːlo, lungor-lunékídíːdé séːkobulu nolukkoloːpé aséngé aːyé émna lungorém lukan, bulu mabíndanna mamil maka. 11 Édílo ayírdé aːyén odokké édé kapé aːyén édém bulu magapkípé maka. Kiristoké Yaloké bulum sutkanbinam ayírdé siddai, Kiristobí duːgém dododo oijosupaːyé odokké odok lédupé unjígdé aːyé. 12 Ruːnébí édé lungor-lunékídíːdém buluk gernam agerdé buluk aíképémangngai émna léngkanbitag, émpigeːla édébulu nolukképpai, Angunné Yaloké tornamki tayéng-amoːtokké mélígnam lugo:binékídíːdok buluk lugoːbinam tatpon lutaddém okodém nolu suːpag tattuːji. Édémbulum tayéng-yaːmekídíːdé:sin kinnídaggai.
Angunna Duːdopé Gognam
13 Édémpila noluk asiném agerém gerpé moninsutok, aíé-tejisulang, édílo Jisu Kiristomé léngkanbiyén odo nolum bipénam aséːdok tayéːdo nolu méːtinsula duːlang. 14 Édílo nolu kinmap dungngan odok aimaːném méːbonamkídíːdémpé édémbulum agom-tadné ommang kísapé méːboyoku. 15 Émpigeːla séːko nolum goktang bí kapé angunndagji, édémíːpé noluk gernam appíng agerro nolu angunnang. 16 Ruːnék-gomugé ludag, "Angunnang, kapilaːné ngo angunndag."a
17 Édílo nolu Ruːném kumtinsudon, nolu bím Abu émna gogdag, bí séːkomsin kéyama:pé, appíng taniːyém buluk aíːaíké gernam agerdok tayéːlo kébangém baːbidag; odok-légaːpé moːpíso turdag takamdo bím pésoménggélang. 18 Kapéné nolu kindag noluk tokutaːtobulukkolok nolum bikonsunam aré kaman turnamdokké nolum yokpéné attar, murkoːmanggom aínki répítkumang émnamdém, 19 émpigeːla airuːpé arékané Kiristok iːdokki, séːkobí lugépénamkommangom tarétapé kaman meːr-aoːkísanékkai. 20 Moːpísém ruːma:dapébo bím balentag, émpigeːla noluk légaːpé séː gíngabdí longékídíːso bím léngkanbidung. 21 Bíkkoki nolu Ruːnémé méngkésudung, séːko bím sikodokkém turmotoku odokké bím unjígmotag; édémpila noluk méːjíksunamdéːla akaːla duːnamdé Ruːnékolo dung.
22 Suːpag nolu arodém tadla nolu aíém pídesutag édémpila akon bírrangkídíːdok légaːpé nolukké aro ayangé dung, asin araːbokké akoné akoném ayaːlang. 23 Kapéné nolum lékoda otentakku, yokpéné amnikimang, émpigeːla yogmaːpéné amniki, Ruːnék turnélang duːyarpéné gomukki. 24 Kapéné,
Tani appíngé nésin kísadag,
buluk unjíg appíːdé arígolok appun kísadag;
nésiné sandag odokké appuné oripagdag,
25 émpigeːla Ruːtumké gomugdé loːdílongkípé duːyardag."
Odokké édé gomugdé tatpon lutaddé okodém nolum lubika.