Ruːnék Kéréːdé
5
Ngo midum ajon kísapé, noluk ara:dok duːné midumkídíːdém lusalígdung. Ngo Kiristok duːg donamdém lukanbikunéko, odokké léngkanbipénam unjígdo ngoːsin paːmínpénéko. 2 Ngo nolum kumdanna ludung, Ruːnék nolum binam kéréːdém kaːsínépé ilang, Ruːnébí nolum kaːsímolíːnam kísapé, nolu édém méːyumsula kaːsíːlang, kaːsíːlíːmaːpé kaːsíyok. Murkongém méːbola agerém geryok, émpigeːla agerdém asinbokké méːbola gerrang. 3 Séːkobulum nolum kaːsíbidopé tolíktuːji buluk tayéːlo ruːtumpé ikipé méːyok, émpigeːla kéréːdok kaːyisulaːnampé ilang. 4 Odokké édílo Abíngaryan Meːr-kaːsínédé dakkansuyén, odo nolu édíloːsin unngasuman unjígné dumlubdém paːyé.5 Édémíːpé nolu séːkobulu ameːya:nén, abíyaːnélo kéíksulang. Odokké nolu appíngé akoné akoném ajjisunam galugém gélíksulang, kapéné "Ruːnébí pugdasunném ajjimodag, émpigeːla ajjisunném aséngém bidag." 6 Odok-légaːpé Ruːnék kínggín alag kéígdo nolu aíém ajjisulang, odo bí bík aíké ainé ayírdo nolum bosa:lígyé. 7 Noluk méːdír appíːdém bík tayéːlo joːlíglang, kapilaːné bí nolum kaːsíːladung.
8 Aíé-tejisula odokké totsula duːlang. Noluk mirudé, uiːbí, séːkaimé kepetpé émna mala sumyompé ngírra gíyedla duːdag, 9 Noluk méːjíksunamdo kínggíla bím morasulang, kapilaːné nolu kindag moːpísok appíːloi bírrang ékké séː lékoné duːksém dola dung émna. 10 Émpigeːla noluk kontégoːuko duːg donam lédupé, appíng ayírrok aséːné Ruːnébí, séːko nolum Kiristok lédílo lékola bík duːyarné unjígdém paːmíndopé gogduːji, bí aíé nolum mosítenna, dagrasumola tornamém biyé. 11 Loːdílongkípé tornamé bíggongké. Amen.
Pitorké Bitérnam Asin-aséng
12 Sailas, séːko ngok aroné bíroko, bík addumsunamki, séː andén doːjíksém ngo nolukkoloːpé adlígdung. Sidé Ruːnéké aro aséngé édém ngo nolum lusaːla ngok lukanbinamém lupé méːla addung. Odo dagrasula duːlang.
13 Noluk lédílo balennam Bebilondok nok bíromé kumgodokkéla ngok ao Margbí nolukkoloːpé asin-aséngém séglígdung. 14 Ayang dosukki akoné akoném asin-aséngém bilang.
Séːkobulu Kiristok taniyén noluk appíngkolo asin ansíngé dungkaːlangkaǃ