Aro Luyír
2
Okodé aro luyírkídíːdok lédílo lékodagji édémpag no luyírrang. 2 Abíyan taniyé aglíng saːmaːdopé, amme ménggésudopé, aíém-tejisudopé, odokké méːjíglo, ayaːlo, odokké oijosunamno arola-duːdopé luyírrang. 3 Édémíːpé, abíyan mimékídíːdém buluk dunggolo ménggésunam paːdopé luyírrang, odokké lugé-gégola apo: tí:namno pagbopé imaːdopé, émpigeːla okodé aidang édém luyírbidopé luyírrang. 4 Odo bulu ameːyan mimékídíːdém buluk milbongémnaː ommangém ayaːdopé luyírraːyé, 5 aíém-tejisudopé, naréːla duːdopé, okum agerém gerdopé, asinang-aidopé odokké buluk milbongém ménggésudopé luyírrang. Odo séːkosin Ruːnék agomdém anyisumomaːyé.6 Édémíːpé, ameːyan taniːkídíːdém aíém-tejisula duːdopé lusaːlang. 7 Appíːloi ainé agerém-gerra no buluk kaːyisunam taniːpé ilang. Nok luyírnamdo arolang, 8 odokké luyírnamno lumurma:dopé asiném bilang, odo séːkosin nom lukalaːmaːyé. Séːkobulu nok angupé agom ludang odo bulu anyisuyépé odokké ngolum bulukké oːkai aimaːnamko lusetpénam kamaːyé.
9 Pagbokídíːdé appíːloi buluk ruːtumkídíːdok agomém-taddopé, bulum méːyumsudopé odokké bulum lulatsukumaːdopé, 10 bulukkolok okkomsin dopsomaːdopé, émpigeːla appíːloi bulum méːtinsulaːnamém léngkandopé luyírrang. Odo bulu ngolum Moturbiné Ruːnék tayéːlok luyírnamkídíːdém tadlíksuyé.
11 Kapéné Ruːnék aséːdé okodé moturbikunamém bidang, édém appíng taniːyém léngkanbitag. 12 Édé aséːdé ngolum ruːnék-katémaːnam ager odokké moːpísok méːboka:bonamdém lagima émna lupaksumodag, odokké aíé-tejisula duːdopé, arolo-duːdopé odokké séː moːpíso ruːnék-taniːpé idopé luyírdag. 13 Ngoluk toyaːla duːnam ayang-paːnam longé, okodém ngolu akaːla dun, oko longédo ngoluk kínggí-taríːné Ruːnékéla Moturbiné Jisu Kiristoké unjígdém léngkansuyé. 14 Bí ngolum appíng imurrokkém répítkunam légaːpé aíém bípaksuto odokké bík aíké taniːpé idopé ngolum írpuːbitag, odokké bí ngolum ainé agerém gertoka émna méːdag.
15 No sémbulum luyírrang. Lusangkilaː appíng ilang-gílangki bulum geːyírrang. Séːkomsin no méːtitkosuyok.