Taitas
Taitaskoloːpé Polké Adnam Doːjíg
1
Ngo, Pol, Ruːnéké pagbokoːla Jisu Kiristoké mélígnamko.Ruːnébí séːkobulum balentang ngo bulum méːjíksunamdém lubidopélaː bulu arodém kinna Ruːnémé ménggésula kapé duːpé lagidang édém luyírbikolo ngom mélíktag. 2 Séː arosé bulum turyarné turnamdok akaːla duːnamdoːpé gíbodag, bí moːpísém ruːmaːdapé édém pesubitag. Ruːnébí arrom ludag. 3 Odokké bí bík doːyido édémbulum bík ayírrado léngkanbitag. Odokké édém ngolum moturbikuné Ruːnébí ngom tolíktag odokké édém ngo lugoːbidung.
4 Ngo Taitaskoloːpé séː doːjíksém adlígdung, bí méːjíglo ngok aro aoːko.
Abu Ruːné odokké ngolum Moturbiné Kiristo Jisukolokké nokkoloːpé aséngélaː asin-ansíngé dungkaːlangka.
Kirit Bogléːdo Taitaské Agergernam
5 Nom Kirit bogléːdo ngok léːpagnam légaːdé, ngoluk ingabmaːnam agerdém no ingabdopé odokké ngok luyírnamdémpé nogor nogorro midumém balenna tolíglang. 6 Midumdé lugéng kamaːnéko, yamné akkongkolok milbongko, odokké bík ommangé méngkésuné odokké agamnépéːla agom-tadnépé ipélagidag. 7 Mirodém Ruːnék agerém tolígnammé, bí lugéng kamaːnépé ipaːyé. Bí bottépé-méːsupé lagima:yé odokké bagémpé aglíngé saːpé lagima:yé. Bí apongém tíːpé lagima:yé, pamunsugoːpé lagima:yé, odokké murkong paːnam légaːpé anyisukanné agerém gerpé lagima:yé. 8 Édémpimap bí mibo-bolíːnéko, ainém méːbonéko, aíém-tejisunéko, kumjoːnéko, angunnéko, odokké méːjoːnékopé ipélagiyé. 9 Okodém méːtinsulaːdang odokké okodé luyírnamkídíːdok lédílo lékodang édé agomdém sogabla léːlang. Édémpé bí akoném aro luyírki lusalaːyé odokké odok angupé luyírnékídíːdém lupagla:yé.
10 Kapéné bojéko agom-tadlíːmaːné, arékaman agom-lugoːné odokké yadgoːné taniyé dung, anguruːpé édé séːkobulu gatpugnama opedokkén bulu aiyaːpagmaːnékídíːdé. 11 Bulum lutumruːpénamé, kapilaːné buluk luyírpémaːnammé bulu luyírra okum-érangém momígdung, odokké édémbulum bulu anyingkamaːpé murkong paːnam légangé igoːdag. 12 Buluk aíké araːlok lungor-luné aːko lutag, "Kirit taniyé édíloːsin arrom lumang, bulu aiman simín kísadag, bulu loːbagdag odokké dorídag." 13 Séː lukanbinamsé arro. Odok-légaːpé bulum kínggípé morídlang, édémpímílo buluk méːjíksunamdé aroyé. 14 Odokké Jiudikídíːdok émmum doːyingkídíːdémnaː aro-agomém topaksunékídíːdok lulígnammém asin bila tadyo. 15 Naréné taniːlokképé appíngéi narédag, émpigeːla séːkobulu narémaːji odokké méngkésumaːji, bulukképé okkosin narémang. Kapilaːné buluk asinélaː méːlod annyipagdéi yangkaːbo. 16 Bulu Ruːnémé kindag émsudag, émpigeːla buluk agerki bulu bím topaksudag. Bulum tayumkandag, bulu agom-tadmang, odokké ainé ager akolokképésin bulukké arré kamang.