Kiristan Duːnam-dagnam
3
Migomémnaː ilang-gílanékídíːdém kéíksula du:dopé odokké agom-taddopé, ainé agerém-gerdopé loːdísém lennoːla duːdopé méngkésunékídíːdém méːpa:molang. 2 Séːkomsin aimaːpé luma:dopé, geːmínsumaːdopé, ansíngoːpé duːdopé, odokké appíngém ajjisunamém léngkandopé luyírrang. 3 Longéko ngolusin makkorra dungngai, agom-tadmangai, yadgoːdaggai odokké adin-amírrok takam méːbokaːbolok pagbopé ila dungngai. Ngoluk asindo aimaːnélaː dígnamé biːla duːdagai, odokké akoné akoném tayumkaːmínsudagai. 4 Émpigeːla édílo ngolum Moturbiné Ruːnék asinang-onamdémnaː aipé-méːnamdém léngkanton, 5 bí ngolum moturbito, ngoluk arolok-duːnam ager gernam légaːpémang, émpigeːla bík ayaːlo. Otenkunamdok írpunamkila Angunné Yaloké anu mokunamki bí ngolum moturbitag, 6 séːkomé bí ngolum Moturbikuné Jisu Kiristoki ngoluk tayéːlo biːpoggédopé pílenbitag. 7 Édémpila bík aséngki ngolum arolok-duːné émna sablígnammém paːla, ngolu panggopé ila turyarné turnamdok akaːla duːnamdém paːyé. 8 Sé: lunamsém méːtinsulaːdag.Odokké séː luyírnamsém no aipé ménggaptoka émna ngo méːdag, édémpimílo séːkobulu Ruːnémé méngkésudagji bulu ainé agerém gernam légaːpé aíém ansuka:sula tolígyépé. Séːbulu aiyaːpagné ageré odokké appíngképéi aidag. 9 Émpigeːla luro tayéːlo makkorné lumínsunamdém, ope-doːyidém, lukermínsunamdém, odokké geːmínsunamdém mépaktok, kapilaːné édébulu aisinmang odokké agerroːsin aːmang. 10 Noluk araːdo lupen-lurenné taniːdém léko lémyíkopé lupaːpoːlang, odok lédupé bím okkomsin lusetpénam kamaːbo. 11 Édémpin taniyé arolokké gíyotkaːbo, odokké buluk aíké imurríːdé bulum sappagyé.
Lutér Luyír
12 Édílo ngo Artemasmémam Taikikasmé nokkodoːpé mélígyéji, Nikopolis nogordoːpé ngom ríksukolo no lomna gílang, odo ngo dígín poːlokídíːdém duːpé méːdung. 13 Jenas ukilmélang Apollosmé buluk gíladuːdodo buluk lambédok laginam appíngém no éddíko pagyéji odokíddíko bidumsulang. 14 Ngoluk taniyé kaman taniyém bidumsula okko aidang édém iyírsupénammé; odo bulu aːyé eːné taniːpé iyé.
15 Sidok duːné appíngé nokkoloːpé asin-aséngém séglígdung. Méːjíglo séːkobulu ngolum aipé-méːdagji bulum asin-aséngém bibilang.
Ruːnéké aséngé noluk appíngkolo dungkaːlangka.