Gíngabdí Longékídíːdo
3
Émpigeːla sém ménggablang, gíngabdí longékídíːdo míryadla pésokannam ayíré aːyé. 2 Taniyé aíém aipé-méːyaːsuyé, murkongém méːboyé, bottépé méːsuyé, pakkínépé-méːsuyé, lukangém-luyé, buluk ané-abulok agomém-tadmaːyé, aipai bimaːyé, angunmaːpé duːyé, 3 ayangé kamaːyé, méːyinsunamé kamaːyé, lugégégoyé, aíém-tejisula duːma:yé, aglíngé-saːyé, ainém aipé-méːmaːyé. 4 Yadyé, itér-itér iyé, pakkínépé-méːsuyé, Ruːnémé aipé-méːma:pé méːpoménganém méːboyaːyé. 5 Ruːnémé kumné émna séumoyé émpigeːla kumnamdok tornamdém arrompé méːmaːyé. Bulukkolokké gígérrang. 6 Bulukkolok akke amiké okumnoːpé gíaːla makkoriné mimékídíːdém yaddag, séːkobulu buluk paːblo obutsula duːji. Takam aisímaːnékídíːdé bulum pakogbomna dung. 7 Édémpin mimékídíːdé loːdísém anu anu luyírém paːdag, émpigeːla bulu édíloːsin arodém tatkinma. 8 Jennasbíːlaː Jamberesbí kapé Musi:ké kekonpé dagropkaji, édémíːpé séː taniːkídíːsé arodok kekonpé luyírdak. Buluk asinkídíːdé kémolo du:la méːjíglokké moːténgkang. 9 Émpigeːla bulu bojéko ibadmaːyé, kapilaːné édé annyidémpé, bulu éddík makkordang édém appíngé kaːbegyé.Lutér Luyír
10 Émpigeːla no ngok luyírnam appíngém, ngok duːnam-dagnamém, ngok turra duːnam légaːdém, méːjíksunamdém, aipé-méːnamdém, oijosula duːnamdém, 11 ipusire paːnamdém, duːgdonamdém, Entiogdo, Ikoniamdo odokké Listarado kapi kapiné ngasodé ngokkolo aːngkan, kapiné ipusirem ngo oijosula dungngan appíːdém no kindag. Émgom édé appíːdokké Ruːtumbí ngom mopítto. 12 Aroruːpé séːkobí Kiristo Jisukolo Ruːnék méngkamdémpé duːpé-dakpé méngkídang bím ipusireruːdag. 13 Émpigeːla aimaːnéla yadgoné taniːkídíːdé aimaːnélokké aiyama:néloːpé gíyaryé. Bulu ammem yadyé odokké aíémsin yatkosuyé. 14 Émpigeːla nom oko okkom luyírbitagji édébulum méːpaːlang odokké édémbulum nérkíkpé kinnang odokké séːkobulum nom édémbulum luyírbitagji no bulum kindag. 15 Ko:ka:dokkébo nom Angunné Ru:nék-gomugdém luyírbitag, odokké bulu nom moturbikunamdém toríksunan méːjongém bitag, okodém Kiristo Jisumé méngkésumílo paːdag. 16 Ruːnék-gomug appíːdé Ruːnék ngalennígnammé odokké édé luyírkolo, geːyírkolo, moyinsukolo, odokké arolok-dungkolok luyírkolo aibodag. 17 Édémpila séːko Ruːnék agerém gerdoji bím nérkíkpé kinmola appíng ainé agerém germoyé.