4
Édílo Kiristo Jisubí Migom kísapé gíyekuji, bí appíngém kébaːbaːbinépé iyé, bulu turradunggom sinola gígom. Ruːnémélang Kiristomé lubikupéné kísapé mégeːla ngo nom sém lulígdungː 2 Ruːnék doːyíngém lugoːbilang, appíng ayírro lenna duːlang; luyinsulang, geːyírrang odokké lusangém lulang-édémbulum kínggípé oijosulang odokké todla luyírrang. 3 Kapéné ayírdé aːdobo édílo taniyé aroluyírém oijosumaːyé. Émpigeːla bulu buluk aːgla duːné yerungkídíːdé okkom tadlíːdagji édém lubiné luyírném buluk aíké légaːpé langkumsuyé. 4 Bulu arodém tadmaːpé buluk yerungkídíːdém íyodamgeːla lekeké doːyíngkídíːdém tadngaksula duːyé. 5 Émpigeːla no loːdísém dagrasula duːlang, ngasodlo oijosula duːlang, tatpon lutadém lugo:bitílang, odokké nok gerpénam agerkídíːdém gerbomnang.6 Kapéné ngo, ngok turnamsém Ruːnékolo tosagnam kísapé pílenníktagbo. Ngok gíkunan ayírdé píngadobo. 7 Ngo mimagém aipé moletto, ngok dukpénamém dugamto, ngo méngkésuyarra duːto. 8 Odokké suːpag arolok-duːnam dumlubdé ngom toyaːla dung, okodém aro-kébang baːbiné kébaːmigom Ruːtumbí, bík gíladdoku longédo ngom biye. Édé amandém ngommong bimang émpigeːla séːkobulu asinbokkébo bík gílatkunamdém toyaːladun bulum appíngém biye.
Polké Lutér Lunam
9 Éddík lomna no ngokkosoːpé gílaːyéji gígorrang. 10 Kapéné Dimasbí moːpísém aipé-méːbola ngom atéroːpé mépagla Tisolonikaːpé gípakkang. Keresensbí Galatiaːpé odokké Taitasbí Dalmatiaːpé gíkang. 11 Lugbí atérroːdé ngok lédílo dung, Margmé magabgeːla nok lédílo ngokkosoːpé gíbolang; kapilaːné ngok agerém bí gerdumsulaːdag. 12 Ngo Taikikasmé Ipisiadoːpé mélíkto. 13 No édílo gíyén, Toroas nogordok Karpaské okumdo ngok ménam bortan galugdém odokké ngok potinkídíːdém bomna gílang, anguru:pé édé suktam tayéːlok adnamkídíːdém.
14 Yogír agergerné Alegjendarbí ngom airuːpé aimaːném ito. Ruːtumbí bík inam tayéːlo bím bipénammém biyé. 15 Noːsin bím ansulang, kapilaːné bí ngolum okkomsin lumogeːma émna lutumníːdagai.
16 Ngok lurasupoːdodo, séːkosin ngom ludumsukolo gíatomang; émpigeːla appíngé ngom mépakto. Émgom édém buluk tayéːlo sabgaptíla duːpé lagimang. 17 Émpigeːla ngokkoki lutaddém lubíndanna lubilaːdopé odokké Jiudiman taniːappíːdé édém tadbegdopé, Ruːtumbí ngok lédílo duːmínna ngom tornamém bito. Odokké bí ngom sumyé nappaːlokkém mopítto. 18 Ruːtumbí ngom appíng aimaːnélokkém morila léːyé odokké bík tayéng migomdokodoːpé ngom kangkanoːpé gíboyéku. Loːdílongkípé takam luyitsunamé bígongké. Amenǃ
Bitérnam Asin-Aséːdé
19 Pirisilamé, Akilamé odokké Onesiporaské okum-érangém ngok asin-aséngém bibilang. 20 Erastasbí Korin nogordo dungkang; Toropimasmé Miletasdo kila duːdupé ngo mépakto. 21 Dígín aːmangoːdapé gípíngkílang. Ibulasbí, Pudensbí, Linasbí, Kalaudiabí odokké takam ajoné nokkoloːpé asin-aséngém séglígdung.
22 Ruːtumbí nok yalo lédílo dungkaːlangka. Ruːnék aséngé nokkolo dungkaːlangka.