Kiristo Jisuk Aroné Maglíngko
2
Édémpila, ngok aoːa, Kiristo Jisukolo duːné aséːdo kínggílang. 2 Odokké bojérungko lukanbikunékídíːdok kanggaːlo no ngokkolok oko okkom tadyírsutagji édémbulum méːtinsulaːnam taniːyém tolíglang séːkobulu akonémsin luyírbilaːyekuji.3 Kiristo Jisuké aro maglíng kísapé no ngoluk lédílo duːgém oijosula duːlang. 4 Maglíngkoné bík gerbomsunam agerdo bím lulígné opisardém méːyumsumolíːdag, édémpila bí aíké okum-érang agerém gerrusumang. 5 Dugnékoné séːko dukkamínsukol dugdang, bí dukkodok dumlubdém paːmaːyé édíloːpé bí dukkamdémpé dugledmaːyeji. 6 Oko aríg-inédé kínggípé agerém-gertang bí arígdok engotpoːné a:yédém dogotpoːpén taniːdé. 7 Ngok lunamkídíːsém méngkaːlang. Kapilaːné Ruːtumbí nom séː appíːsém kinmoyé.
8 Jisu Kiristo, séːkom sikolokké turmotakkuji, bí migom Debitké opelokkai, édém loːdísém méːpaːlang. Édé ngok lugoːbinam tatpon lutaddé. 9 Odokké séː tatpon lutatsém lubinam légaːpé ngo duːgém dola dung odokké ngom aiman tani kísapé makanaːlo tumtag. Émpigeːla Ruːnék agomdém ríntumnamang. 10 Édémpila duːyarné unjígdém paːtéːla, Kiristo Jisukolok duːné moturbikunamdém bulusin pangkaːlangka émna, ngo balenamkídíːdok légaːpé appíngém oijosula dung. 11 Séː méːtinsulaːnam lunamkoː
Ngolu bík lédílo simínmílo;
ngolusin bík lédílo turmínyéku;
12 Ngolu oijosumílo;
ngolusin bík lédílo migompé domínyéku;
ngolu bím lupaksumílo;
bíːsin ngolum lupaksuyé;
13 ngolu méːjíglo duːmaːmílosin,
bí arotíla duːyé,
kapéné bí aíém lupaksulaːmang.
Tolígnam Agergernéko
14 Sémbulum bulum méːpaːtímolang. Ruːnék kanggaːlo agom légangé geːmínsumaːdopé bulum lupaːlang; lumínsunamdé arré kamang, tadnékídíːdém édébulu aimapépag imodag. 15 Kínggípé agerém-gerrang odo no aíém Ruːnémé léngkasulaːyé odokké bíkkolok no kabodag émna tolígnammé paːyé. Ainé ager-gernép ilang, séːko anyisunam paːmaːji odokké séːko agomdok arodém lumurmaːpé lusarbilaːyé. 16 Aré kamaːné agomém mépaktok, kapéné séːkobulu odo aːbutsuyéji bulu aimaːnamnokké aiyamaːnamnoːpé gíbomyé. 17 Buluk luyírnamkídíːdé ngero rongkampé ronggoyé. Buluk araːlo Ameniasbíːlaː Pilatasbí. 18 Bulu aro lambédokké opagletkang. Bulu sikolokké lékod-turkunamdé gíbatkaːbo émna luyírra séːkkai séːkkaiké méːjígém momíkpagdung. 19 Émgom Ruːnék kabodopé aksaːbinamdé duːyarra duːyé, okolo abígém bígla lé:tagː "Ruːtumbí kindag séːkobulu bíkkén" odokké "Ruːtumké aminnok ludesuné appíngé aimaːnamnokké gíérra duːpé lagidag."
20 Bottén okumkolo aín murkongo:lok monam arém batio:ngé du:mang émpigeːla ísíːlogla amongki monam attarésin duːdag, akkem ménggésunam ager légaːpé odokké akkem émmum ager légaːpé motag. 21 Taniːkoné aíém édé aimaːnékídíːdokké mopusumílo, bím ménggésunam agerro lígyé, bím angunmoyé, odokké Ruːtumdé bím lagyi-laksaːla appíng ainé ager gernapé léːyé. 22 Síːsaːlok adin-amír méːbolokké duggélang, odokké arolok-duːnam, méːjíg, ayang, odokké asin-ansíngém, buluk lédílo ménmínna gílang séːkobulu narén asinki Ruːtummé goktinsudang. 23 Makkornélaː émmumpésin lukermínsunamnokké moːtéːpé duːlang; kapilaːné no kindag édébulu geːmínsunamém laːlendak. 24 Ruːtumké agergerné geːmínsupé lagimang émpigeːla bí appíngém asin-ainéko, luyírjoːnéko odokké oijosula duːlanékopé ipélagidag. 25 Bík kekonpé gínnémsin tatpopé luyírjoːnékopé ipélagidag. Odo édémpidodém Ruːnébí bulum méngkutsunam odokké arodém kinkunan asinangém bilaːdo. 26 Odokké bulu kinsulangkula uiːké tola léːnam ketelebdokké gílennaːyeku, séːkobí bulum bík agerém gerdopé sogabla léːtang.