2 Timoti
Timotikoloːpé Polké Adnam Bornyinané Doːjíg
1
Ngo, Polbí, Ruːnék méːnamnok mélígnamko, ngom pesula léːbinam turnamdém okodé Kiristo Jisukolo dun, édém lugoːbidopé mélíktag.2 Ngok méːbomsunam ao Timotikoloːpé séː doːjíksém adlígdungː
Ayangé, aséngé odokké asin-ansíngé Ruːné Abukolokkéla: ngoluk Ruːtum Kiristo Jisukolokké nokkolo dungkaːlangka.
Aipaibila: Lusaːnam
3 Ngo Ruːnémé aipai bido, sék agerém ngo naréné méːlotki gerbidun, kapé ngok tokutaːtobulu gerkan. Longgé yummém ngok kumdom ngo nolum méːpaːla bím aipai bido. 4 Nok miksi dínamdém méːpaːla, ngo nom airuːpé kaːlílaːdung. Nom kaːpaːmílo ngok asinsé airuːpé méːpoyé. 5 Nok aro-arop méːjíksunamdém ngo méːpaːtído, okodé nok ya:yo Loiskodo duːpoːdungngai odokké nok ané Uniskodo, odokké suːpag nokkodo aroruːpé dung émna ngo kindag. 6 Odok-légaːpé Ruːnék nom binam amandém okodé nokkolo dun, ngo nom méːpaːmodungku, nok tayéːlo ngok alag pigabbigeːla kumbidodo édém bitag, édém umí kísapé dortímolang. 7 Kapéné Ruːnébí ngolum pésoné yallom bimang, émpigeːla torné, ayaːné odokké aíém-kinsulaːné yaloko bitag.
8 Édémpila ngoluk Ruːtummé ammem lukanbinamdém odokké bík légaːpé ngok makana:sok duːnamsém édíloːsin anyisuyok. Émpigeːla tatpon lutatsok légaːpé Ru:nék tornamki ngok lédílo duːgmínnang, 9 séːko ngolum moturbigeːla angunné turnamkoloːpé goktang. Ngolu oːkai ainék itag émnamang émpigeːla bík aíké légaːpélaː bík aséngki. Séː aséːsém moːpísém ruːlenmaːdapé Kiristo Jisukolo ngolum bitag, 10 émpigeːla suːpag ngoluk Ruːtum Kiristo Jisuk gínamsokki édém ngolum léngkanbitag. Bí sinamdok tornamdém momíkto odokké tatpon lutatki sidanman turnamém léngkanbitag.
11 Odokké séː tatpon lutatsém lugo:bidopé Ruːnébí ngom mélígnamkopélaː luyírbinékopé tolíktag. 12 Odok-légaːpé ngo sido duːgém dola dung. Émgom ngo anyisumang, kapilaːné ngo kindag séːkom ngo méngkésula duːji, odokké ngo kinsudag bí kaːsíːbila duːbilaːpénédé okodém ngo bím bík gíladdoku longédoːpé tolíktag. 13 Nok kaːyísula gílaːnam légaːpé, nom ngok luyírnam aro agomkídíːdém sogabla léːlang, odokké méːjíksunamdoːla ayaːdo duːyarrang okodé Kiristo Jisukolo lékonamdo ngolukké. 14 Angunné Yaloké tornamki séːko ngolukkolo duːji, nom binam arékané arodém bíkkoki kaːsíːladuːlang.
15 No kindagéi Esia moːtagdok appíngéi ngom mépakto, Armogenes bíːlang Pigelasbíːsin mépakto. 16 Ruːtumbí Onesiporoské okum-érangém ayangkaːlangka, kapilaːné bí ngom bojéko kaːdumsuto, odokké ngok makana:sok duːnamsémsin bí anyisumangai. 17 Édílo bí Rum nogorpé gípíːton, édíloːpé bí ngom magabmanggan odoloːpé bí ngom appíːloi magoːto. 18 Ruːtumké gíladdoku Longédo bí bíkkolok ayangém paːdopé Ruːtumbí bím bojéko asin-ayangém bikaːlangkaǃ Odokké no aiyopéi kindag Ipisiaːdo bí éddíko kaːdumsutagan.