Méngkésunélok Ipénam
5
Abíné taniːkoném torpé luyok; émpigeːla bím abu kísapé lusaːlang odokké ameyaːném nok aíké bíro kísapé sablang. 2 Abíyan mimékídíːdém ané kísapé odokké ameyaːném bírmo kísapé méːla buluk tayéːlo naréné asiném gélangka.3 Aroné tumbonéːngkídíːdém séːkobulum kaːdusunamém lagiladagji bulum kangkinnang. 4 Émpigeːla tumbonéːngkolokké ommangélaː natiyé duːmílo, bulu buluk aíké yelam agerém gerpénamdém iyírsupoːla buluk éraːtaniːkídíːdém moːsípénamé odokké édémpé buluk ané-abbomna taːto-yaːyom bipénammém biladdoku, kapilaːné édépag Ruːném méːyumsumodag. 5 Aro tumbo-néːdé bí séːko atéroːpé duːdang, bím mosíːné séːkosin kamang, odokké Ruːnémé méːtinsulduːla longgé yummém kaːdumsubidopé kumyardag. 6 Émpigeːla séːkobí adin-amír agerém méːbola turra duːji, bí turra dunggom yalolo sinnébo. 7 Séː luyírkídíːsém bulum luyírbilang, odo séːkosin bulukkolok lugéːpénamko paːma:yé. 8 Séːkoi bík aíːtaniyém kaːsíːmosímaːmílo, bík aíːarké éraːtaníːyém, bík Ruːnémé kumnamdé aromang, édémpin taniːdé méngkésuman taniːyémsin aiyamaːnéko.
9 Yíngkéng dítakko ameyaːném tumbo émna tumbo amin adgapkodo adlíkpo:yo, odok tayéːpé tumboːdé amiloːsin gíténkupé lagima:yé. 10 Odokké bík ainé agerémsin kaːbekpé lagiyeː ommangém usaːnam, mibo-bonam, angunné taniːlok alé írnam, duːgla duːném kaːdumsunam odokké appíng ainé agerro bík asiném bidanna gernam.
11 Émpigeːla síːsaːné tumbonéːlok aminém adlígyok. Kapéné édílo bulu adin-amírrok laginammém méːboyekuji Kiristomé pesubinamdokké gíyodla bulu midaːmotennaːdoku. 12 Édémpé bulu buluk poːpéké pesunamdém mépagla buluk aíké tayéːlo mokemoramém laːlíksudag. 13 Odok tayéːlo bulu okum okumnoːpé gígola loːbagnamnoːpé aːdag. Odokké loːbagoːnépé ila duːmang lugégégonépésin ila ammem lukiluaddag, odokké lupémaːnam agomémsin lugoːdag. 14 Édémpila síːsaːné tumbonéːngkídíːdém midamotendokupé, ommang odokupé, buluk aíké okum-érangém kaːsíːmosíːdopé odokké miruém oːkai lulaːné lambéko bimaːdopé ngo lusílígdung. 15 Kapéné akke opagledla uiːké lambélo gílai duːbo. 16 Méngkésuné mimékolok okumno aro tumbo-néːngé duːmílo, bí kumgodém togélíkpé lagima, émpigeːla bulum kaːsí:pé lagidag. Édémpimílo kumgodé séːkobulu aro aro tumboji bulum kaːsílaːyépé.
17 Midumkídíːdé séːkobulu aikampopé miro agerém gerraduːji, bulum ménggésula lémyikopé bibadla bipénammé, anguruːpé séːkobulu lugo:binam odokké luyír agerém gerdang. 18 Kapéné Ruːnék-gomugdé ludag, "Monora samdodo, soːbokolok nappa:lo mukurangém raglígyo," odokké "Ager gernébí bík gerrédém paːpa:do." 19 Midumnok kekonpé bomaːnam lugéngém édíloːpé édé agomdé arro émna annyi aumkolok tatpaːsumaːji bagémpé tatpoːyok. 20 Séːkobulu imurém itíladun bulum appíngké tatkolo geːlang, édémpimílo akekídíːdéːsin pésola imurém imaːyé.
21 Ruːné odokké Kiristo Jisukélaː balennam tayéng-yaːmekídíːdok kanggaːlo ngo nom séː luyírnamkídíːsém kéyanammémna méːyanammém léngkanmaːpéla ibomdopé lulígdung. 22 Midumkoném tolígdoém airuːpé lompé lagimang. Amiké imurém idumsumínnépé imínyok. No aíém narépé duːsulang.
23 Assoːngém tíːyok, émpigeːla nok aki kinamdok légaːpélaː lomna lomna kila duːnamdok légaːpé angur alang-apongém ajjiːoko tíːlang.