Arrom Luyírmankídíːdok Kekonpé Lupang
4
Angunné Yalobí nérkíkpé lubidung, aːpéné longékídíːdo taniː ékké aro méːjíksunamém mépagla yadgoːné yalolok lédulo gímínyé odokké butukídíːdok luyírnamno asiném biyé. 2 Édémpin luyírnammé yadgo:né séumonkídíːdokki aːyé, sék méːlodé guné yogírro baːnam kísapé singapkang. 3 Bulu midangém momaːdopé odokké donam ékkém domaːdopé lutumdag. Ruːnébí édémbulum ruːtag édémpila arodém séːkobulu méngkésudagji bulu aipai bigeːla édémbulum dopé lagidag. 4 Ruːnék ruːnam appíːdéi aidag, odokké aipai bigeːla toríksumílo okodémsin lupakpénamé kamang. 5 Kapéné Ruːnék gomukkilaː kumnamki édémbulum narémotag.Kiristo Jisuké Ainé Pagbo
6 Sé: luyírnamkídíːsém no méːtinsunékídíːdém aiyopé luyírbimílo, no Kiristo Jisuk ainé pagbopé iyé. Kapilaːné méːjíksunam doːyingém odokké aipagné luyírém okodém no kaːyísula duːji édém paːla no síːsaːtag. 7 Ruːnéké katémaːnam doːyingémna minékídíːdok aré kaman kímannamkídíːdém tadmanna duːyok, émpigeːla Ruːnémé aipé kinné taniːpé iyírsula duːlang. 8 Kapéné adin-amír dugnam-panamno ajjiːariko arré kadag, émpigeːla Yalolo dugnam-panamno arré appíːloi kadag, kapilaːné odo suːpakkélaː aːpéné longékídíːdok turnamdém pesubitag. 9 Séː méːtinsulaːnam lunamko okodém appíngéi toríksupé lagidag. 10 Sidok légaːpéi ngolu agerém kínggíp gerradung, ngolu ngoluk akala duːnamdém turné Ruːnékolo tolíktag, séːkobí takam taniːyém Moturbikunédé, anguruːpé séːkobulu bím méngkésuyéji.
11 No sémbulum lulíglaː bulum luyírbilang 12 No yaːmeyé émna séːkomsin kaːtítkosuyok, émpigeːla no nok agomno, nok duːnam-dagnamno, nok ayaːlo, nok méːjíglo odokké nok angunnamno méngkésunékídíːdok kaːyísunam taniːpé ilang. 13 Édíloːpé ngo gímaːyéji, taniːgíkumsukolo Ruːnék-gomugém ponam odokké lugoːbinamnoːla luyírbinamno nok ayírémna asiném bilang. 14 Édílo midumkídíːdé nok tayéːlo buluk alaggém pigabbila kumbikaji, nokkolok duːné édé amandém méːyaméːsaːyok, okodém lungor-lunamki nom bitagan. 15 Séː gerpénam agerkídíːsém asin-bila gerrang, édémpimílo appíngé nok aibomnammém kaːbegyé. 16 Nok aíké duːnamémnaː luyírnamém kaːsulang; édémbulumíng mégabla mélang, édémbulummíng ibomílo, no aíé odokké nok agom tadnékídíːdém no moturbinamém paːboyé.