Kumgodok Mirokídíng
3
Séː méːtinsula:nam lunamkoː Séːkai kumgodok miropéa ilíːduːmílo, bí aiːyapagné agerdém gerpé méːdung. 2 Suːpag mirodé lugéng kamaːnéko, yamné akolok milbongko, aglíng sanggormaːnéko, aíém-tejisunéko, amiké ménggésunamko, mibo-bonéko, luyírjoːnéko, 3 apongém tíːmaːnéko, makkeresiaːmaːnéko émpigeːla ajjisunéko, pamunsugomaːnéko, odokké murkongém méːbomaːnékopé ipa:yé. 4 Bí aíké okum-érangém aipé kaːsíːnéko, odokké bík ommangé bík agomém-tadla appíːloi bím ménggésupaːyé. 5 Séːkoi bík aíké okum-éraːdéméi kaːsísulaːmaːmílo, bí kapé Ruːnék kumgodém kaːsílaːyén? 6 Bí anupé aːné taniːpé ipé lagimaːyé, émmamílo bí bottép-méːsula opagledla uiːké mokemoram pangkampé paːmínpéké. 7 Odok tayépé bím ruːyiké taniːyésin méngésaggépé lagiyé, édémpé imílo bí anyisumaːyé odokké uiːké keteleblo panmaːyé.Dikonkídíng
8 Édémíːpé dikonkídíːdéːsin ménggésunam taniːpé, aroné, apongém tíːma:né, odokké aiman lambélok murkong magomaːné taniːpé ipa:yé. 9 Bulu méːjíksunamdok oːríːné arodém naréné méːlotki sogabla léːpa:yé. 10 Bulum aːnkapo:lang, odokké lugéːpénam okkomsin paːmaːmílo, bulum dikon kísapé agerém tolíglang. 11 Édémíːpé buluk yamnékídíːdéːsin ménggésunamé kapaːyé, lugégégonépé ipélagimang, émpigeːla aíém-kinsunépé ipélagiyé, odokké appíːloi méːtinsulaːnampé ipélagiyé. 12 Dikoné yamné akolok milbo:pé ipaːyé odokké bík ommangémna bík okum-érangém aipé kaːsíːnékopé ipaːyé. 13 Séːkobulu dikon agerém aikampopé gerdogji, bulu amikolok ménggésunamém aman kísapé paːyé, odokké Kiristo Jisumé buluk méːjíksunamdém kínggíːyaːla gíyé.
Bottéruːné Kinpíːmaːnamko
14 Nokkodo:pé ngo gígorpé méːladung, émdaggom ngo nokkoloːpé sémbulum adlíkpoːdung, 15 odo ngo gípínggorramaːmílo, Ruːnék okumdo, taniyé kapé duːpé-dakpé lagidang édém no kinyépé. Odokké turné Ruːnék kumgodé, arodok gai kuntadélaː aksaːnamdé édém kinyé. 16 Méːmo kamaːpé, séː ngoluk méːjíksunamdok bottéruːné kinpíːmaːnamdéː
Jisumé tani:pé oto,
Yalobí édém arro émna léngkanbito,
tayéng-yaːmeyé bím kaːto,
odokké bím réngam araːlo lugoːbito.
Moːpísok appíːloi bím méngkésuto,
odokké unjíglo tayéng-amoːpé gísabokangku.