Kumgodo Kumnam
2
Ngo lupoːdanna kumdanna ludung, appíng taniː légaːpé kumnígbilang, kumbilang kumpaːbilang odokké aipai bilang. 2 Migom odokké ilang-gílaːnékídíːdok légaːpé kumbilang, odo ngolu appíngé Ruːnémé-kumnamno naréla duːla ansíngoːpélaː aikangkanpé duːlaːyépé. 3 Ngolum Moturbikuné Ruːnék kanggaːlo édé ainélaː méːlíksunam ageré. 4 Séːko appíng taniyé moturkunamém pangkaːlangka odokké arodém kinkaːlangka émna méːbiːdang. 5 Kapéné Ruːnébí atérongko, odokké Ruːnékélaː taniːké pongkokké-taniːdéːsin atérongko, édé taniːdé, Kiristo Jisubí. 6 Séːko aíém appíng taniːyém dorpítkunan aré kísapé bisuto, Jisuk édé agerdé bík ayírardo appíngém lukanbitag. 7 Odokké odok légaːpéi ngom mélígnam kísapélaː Jiudimaːnélok luyírnépé, méːjíg doːyídémnaː arodém lugoːbidopé mélíktag. Ngo luboːsula lumang- arodém lubidung.8 Taniːkídíːdé lukerkaːmínsumaːpé aglíngé saːmaːpé buluk angunné alagém laksaːla appí:loi kumtoka émna ngo méːdag. 9 Mimékídíːdé géyumbomyumdopélang buluk génam tayéːlo ansula aikampopé gédobomdopé. Bulu dumídém kérmonaki, aín bakor génamki, odokké arékan galugém génamki seruːsupélagimang, 10 émpigeːla Ruːnémé kumné mimékídíːdé, ainé agerki bulu seruːsupé lagidag. 11 Appíng ayírro mimmé ajjisula asoːpé duːyírsunamdé aidag. 12 Luyírém ludopélaː milbong taniː tayéːlo ilang-gílang kadopé ngo mimékoném lulíglaːmang; bí aso:pé duːnamdé aidag. 13 Kapéné Adommé ruːpoːtaggai, odokké Ibmé ruːto. 14 Odokké Adommé yadmangai, mimédém yatto odokké bí imurénékopé ikang. 15 Émpigeːla bulu méːjíksunamno, ayaːlo odokké angunnamno aikangkanpé duːyarra duːmílo, ommang onamki mimékoném moturbiyé.